Ka Shithi U Paul Sha Ki Nong Rom 10 - Khasi CL Bible (BSI)

¹ Ko ki parabangeit jong nga, katno nga kwah da ka dohnud jong nga baroh ba ki briew jong nga hi kin long ïa kiba la pynim! Katno nga duwai ïa U Blei na ka bynta jong ki!

² Nga lah ban ong skhem ïa phi ba ki long kiba ieit ïa U Blei naduh ka dohnud; hynrei ïa ka jingieit jong ki ïa U Blei, ym shym la pynshong nongrim ha ka jingtip bashisha.

³ Kim shym la tip ïa kata ka lynti kaba U Blei u pynlong ka jingïadei hapdeng ki briew bad ma u hi, bad pynban, ki la pyrshang ban thaw hi da la ka jong ka lynti; bad kumta kim shym la pyndem ïa lade ha ka lynti U Blei ban pynlong ka jingïadei bad ki.

⁴ Naba U Khrist u la pynkut ïa ka Hukum, khnang ba uei uei baroh uba ngeit u don ka jingïadei bad U Blei.

Ka jingpynim ïa baroh

⁵ U Moses u la thoh ïa kane, shaphang ka jingïadei bad U Blei da kaba kohnguh ïa ka Hukum: “Uno uno uba kohnguh ïa ki aiñ jong ka Hukum un ïap.”

⁶ Hynrei kaei kaba ka Jingthoh Bakhuid ka ong shaphang ka jingïadei bad U Blei lyngba ka jingngeit ka long kane: “Phim dei ban kylli ïa lade, Uei u ban leit sha bneng?” (kata ka long, ban wallam ïa U Khrist sha tbian).

⁷ “Lymne ba phin kylli, Uei u ban leit hiar sha ka pyrthei shapoh?” (kata ka long, ban wallam ïa U Khrist na ka jingïap).

⁸ Kaei kaba ka ong ka long kane: “Ka khubor U Blei ka don hajan jong phi, ha ki rmiang shyntur jong phi bad ha ka dohnud jong phi” — kata, ka khubor jong ka jingngeit kaba ngi ïalap.

⁹ Lada phi phla ba U Jisu u long U Trai bad ngeit ba U Blei u la pynmihpat ïa u na ka jingïap, phin lait im.

¹⁰ Naba ka long da ka jingngeit jong ngi ba ngi don ka jingïadei bad U Blei; ka long da ka jingphla jong ngi ba ïa ngi la pynim.

¹¹ Ka Jingthoh Bakhuid ka ong, “Uno uno uba ngeit ha u un ym ngat ha ka jingsngewsih.”

¹² Kane ka long ïa baroh, namar ym don ka jingïapher hapdeng ki Jiw bad ki Jentil; U Blei u long ujuh U Trai ïa baroh bad u kyrkhu kyrhai ïa baroh kiba khot kyrpad ïa u.

¹³ Kumba ka Jingthoh Bakhuid ka ong, “Uwei pa uwei uba khot kyrpad ïa U Trai ban ïoh jingïarap, un ïohlait im.”

¹⁴ Hynrei kumno kin lah ban khot kyrpad ïa u na ka bynta ka jingïarap lada kim shym la ngeit? Bad kumno kin lah ban ngeit lada kim shym la ïohsngew ïa ka khubor? Bad kumno ki lah ban ïohsngew lada ïa ka khubor ym shym la pynbna?

¹⁵ Bad kumno ïa ka khubor lah ban pynbna lada ïa ki nongrah-khubor ym shym la phah? Kumba ka Jingthoh Bakhuid ka ong, “Katno ka long kaba phylla ka jingwan jong ki nongrah-khubor kiba wallam ïa ka khubor babha!”

¹⁶ Hynrei ym baroh ki la pdiang ïa ka Khubor Babha. U Isaïah da lade hi u la ong, “A Trai, uei uba la ngeit ïa ka khubor jong ngi?”

¹⁷ Kumta te, ka jingngeit ka wan lyngba kaba ïohsngew ïa ka khubor, bad ka khubor ka wan lyngba kaba ïalap ïa U Khrist.

¹⁸ Hynrei nga kylli: Hato ka long kaba shisha ba kim shym la ïohsngew ïa ka khubor? Da shisha ki la ïohsngew — naba kumba ka Jingthoh Bakhuid ka ong: “Ka jingsawa jong ka sur jong ki ka la leit sha ka pyrthei baroh; ki ktien jong ki, ki la poi shaduh kiba kut ka pyrthei.”

¹⁹ Ngan kylli biang: Hato ki paid Israel kim shym la sngewthuh? U Moses hi u long uba nyngkong ban jubab: “Ngan pyndonkam ïa kata ka jaitbynriew ban pynlong ïa ki briew jong nga ban bishni; bad da kaba pyndonkam ïa ka jaitbynriew jong ki bieit ngan pynlong ïa ki briew jong nga ban bitar.”

²⁰ Bad u Isaïah u la long uba kham shlur haba u ong, “Ïa nga la shem da kito ki bym shym la wad ïa nga; nga la paw ha kito ki bym shym la kylli ïa nga.”

²¹ Hynrei shaphang ki Israel u ong, “Baroh shi sngi nga la rah ïa la ki kti ban pdiang sngewbha ïa ki briew ki bymkohnguh bad kiba ïaleh pyrshah.”