Ka Shithi U Paul Sha Ki Nong Rom 1 - Khasi CL Bible (BSI)

¹ Na u Paul, u shakri jong U Khrist Jisu bad u apostol ba la jied bad ba la khot da U Blei ban ïalap ïa ka Khubor Babha jong u.

² Ïa ka Khubor Babha la kular la slem bah da U Blei lyngba ki nongïathuhlypa jong u, kumba la thoh ha ki Jingthoh Bakhuid.

³ Ka dei shaphang U Khun jong u, U Jisu Khrist uba U Trai jong ngi: Shaphang ka jinglongbriew jong u, ïa u la kha uba hiarpateng na u Dabid;

⁴ shaphang ka jinglong Blei bakhuid jong u, la pyn-i shynna da ka bor bakhraw ban long U Khun jong U Blei da kaba pynmihpat na ka jingïap.

⁵ Lyngba jong u, U Blei u la ai ïa nga ka kabu ban long u apostol na ka bynta U Khrist, khnang ban ïalam ïa ki briew na ki jaitbynriew baroh ban ngeit bad ban kohnguh.

⁶ Kane ruh ka kynthup ïa phi kiba ha Rom, ïa kiba U Blei u la khot ban long ki jong U Jisu Khrist.

⁷ Bad kumta nga thoh sha phi baroh kiba ha Rom kiba U Blei u ieit bad ba u la khot ban long ki briew jong u hi: To U Blei U Kpa jong ngi bad U Jisu Khrist uba U Trai un ai ha phi ïa ka jingaiei bad ka jingsuk.

Ka jingduwai ainguh

⁸ Nyngkong, nga ainguh ïa U Blei jong nga lyngba U Jisu Khrist na ka bynta jong phi baroh, namar ka pyrthei baroh kawei ka ïohsngew shaphang ka jingngeit jong phi.

⁹ U Blei u long u sakhi jong nga ba kaei kaba nga ong ka long kaba shisha — U Blei ïa uba nga shakri da ka dohnud jong nga baroh da kaba ïalap ïa ka Khubor Babha shaphang U Khun jong u. U Blei u tip ba nga kynmaw ïa phi man ba nga duwai.

¹⁰ Nga pan ba U Blei ha ka mon babha jong u ha kaba khatduh un pynlah ïa nga ban wan jngoh ïa phi mynta.

¹¹ Naba nga kwah haduh katta katta ban ïohi ïa phi, khnang ban ïasam ïa ka jingkyrkhu ba kynja mynsiem bad phi bad ban pynkhlaiñ ïa phi.

¹² Kaei kaba nga mut ka long ba ma phi bad ma nga ngin ïoh ka jingïarap ha kajuh ka por, ma phi da ka jingngeit jong nga bad ma nga da ka jong phi.

¹³ Phi dei ban kynmaw, ko ki parabangeit jong nga, ba bunsien nga la thmu ban wan jngoh ïa phi, hynrei don kaei kaei kaba la ju khang ïa nga borabor na kaba leh kumta. Nga kwah ban jop ïa ki mynsiem napdeng jong phi ruh, kumba nga la ju leh hapdeng kiwei ki Jentil.

¹⁴ Namar nga don ka kamram ba nga dei ban pyndep sha ki jaitbynriew baroh, ha ki briew baroh kiba la shai bad kiba dang sah dien, ha kiba don ka jingnang jingstad bad ki bym don ïa ka.

¹⁵ Kumta te, nga kwah hir hir ban ïalap ïa ka Khubor Babha ha phi ruh kiba shong ha Rom.

Ka bor jong ka Gospel

¹⁶ Nga don ka jingngeit baskhem ha ka Gospel; ka long ka bor U Blei ban pynim ïa baroh kiba ngeit, nyngkong ïa ki Jiw bad ïa ki Jentil ruh.

¹⁷ Naba ka Gospel ka pynpaw kumno U Blei u pynlong ïa ki briew ban don ka jingïadei kaba beit bad U hi: Ka long lyngba ka jingngeit naduh kaba sdang haduh kaba kut. Kumba ka Jingthoh Bakhuid ka ong, “U briew uba beit bad U Blei da ka jingngeit un im.”

Ka pop u bynriew

¹⁸ Ïa ka jingbitar U Blei la pynpaw na bneng pyrshah ïa baroh ka pop bad ka jingsniew jong ki briew kiba ki lynti basniew jong ki, ki la khang ïa ka jingtip ïa ka jingshisha.

¹⁹ U Blei u pynshitom ïa ki, namar ïa kaei kaba lah ban tip shaphang U Blei ka long kaba shai ha ki, naba U Blei da lade hi u la pynshai ïa kata.

²⁰ Naduh ba U Blei u la thaw ïa ka pyrthei, ki jinglong bym lah ban ïohi jong u, ka bor bymjukut bad ka jinglong ba kynja Blei jong u, la ïohi shai kdar; la ïohi ïa ki ha kiei kiei kiba U Blei u la thaw. Kumta kito ki briew kin ym lait satia!

²¹ Ki tip ïa U Blei, hynrei kim ai ïa u ka burom kaba dei ka jong u, lymne kim shym sngewnguh ïa u. Pynban, ki jingpyrkhat jong ki, ki la long ki bym don jingmut ei ei, bad ïa ki jingmut ba-thylli jong ki la pyndap da ka jingdum.

²² Ki ong ba ki long kiba stad, hynrei ki long kiba bieit;

²³ ha ka jaka ba kin mane ïa U Blei uba im, ki mane ïa ki dur ba la thaw ban i kum u briew ne ki sim ne ki mrad ne ki mrad bapar kiba ïap noh.

²⁴ Bad kumta U Blei u la ai noh ïa kita ki briew sha ka ban leh ïa kiei kiei kiba jakhlia kiba ki dohnud jong ki, ki kwah, bad ki leh ïa kiei kiei kiba khlemrain para ma ki.

²⁵ Ki bujli ïa ka jingshisha U Blei da ka jinglamler; ki mane bad shakri ïa kaei kaba U Blei u la thaw, ha ka jaka ban mane bad shakri ïa U Nongthaw hi, ïa uba dei ban ïaroh junom! Amen.

²⁶ Namar ba ki leh ïa kane, U Blei u la ai noh ïa ki sha ki jingkwah brai bakhlemrain. Wat ki kynthei ki la pynbakla noh ïa ka jingpyndonkam kaba dei kat kum ka rukom ha ka jingshongkurim da ki jingleh ki bym dei kat kum ka rukom.

²⁷ Ha kajuh ka rukom ki shynrang ki la iehnoh ïa ka jingshongkurim bad ki kynthei kat kum ba dei ka rukom bad ki la ïa ing da ka jingkwah brai para ma ki hi. Ki shynrang ki leh kiei kiei kiba khlemrain para ma ki, bad ka jingmih ka long ba ki wallam halor lade hi ïa ka jingpynshitom kaba ki don hok ban ïoh na ka bynta ka jingleh bym dei jong ki.

²⁸ Namar ba kita ki briew ki la kyntait ban bat ha ka jingmut ïa ka jingtip bashisha shaphang U Blei, u la ai noh ïa ki sha ki jingmut bajakhlia, ba kumta ki leh ïa kiei kiei kiba kim dei ban leh.

²⁹ La pyndap ïa ki da baroh ki jait jingbymman, ka jingsniew, ka jingkwah lalot bad ka jingthala; ki dap da ka jingbishni, ka jingpynïap briew, ka jingïaleh, ka jingshukor, ka jingshun.

³⁰ Ki ïa-lorni bad kren sniew uwei ïa uwei pat; ki long kiba shun ïa U Blei, kiba pynbitar, kiba sarong bad kiba sngewmeng; ki pyrkhat ïa kiba bun ki lynti ban leh ïa kaba sniew; kim kohnguh ïa la ki kmie ki kpa;

³¹ kim don ka jingïatiplem; kim bat ïa la ki kular, bad kim pyn-i jingsbun lane jingisynei ïa kiwei pat.

³² Ki tip ba ka Hukum U Blei ka ong ba ki briew kiba im ha kane ka rukom ki dei hok ban ïap. Pynban, ym tang ba ki ïai leh ïa kine hi kiei kiei, hynrei ki mynjur wat ïa kiwei kiba leh ïa ki.