PROBERB 9 - Khasi CL Bible (BSI)

Ka jingstad bad ka jingmutlop

¹ Ka jingstad ka la tei ïa la ka ïing, bad ka la pynïeng hynñiew tylli ki rishot ïa ka.

² Ka la shah ba kin pynïap ïa ki jingri jong ka na ka bynta ka jingkhawai, ka la khleh jingiwbih ha ka waiñ, bad ka la pynkhreh ïa ka miej.

³ Ka la phah ïa la ki shakri kynthei ban pyrta na ka jaka kaba jrong tam ha kata ka nongbah:

⁴ “Ale wan rung, phi ki briew kiba duna ka bor sngewthuh!” Bad ha u briew uba bieit ka ong,

⁵ “Ale, bam na ka jingbam jong nga, bad dih na ka waiñ ba nga la khleh.

⁶ Iehnoh ïa ka kynhun ki briew kiba bieit, bad men ïoh im. Ïaid ruh ha ka lynti ka jingtip.”

⁷ Lada phi pynbeit ïa u briew uba hangamei, phin shu shah krenbeiñ. Lada phi mai ïa u riewbymman, phin shah pynmynsaw.

⁸ Wat ju pynbeit ïa u briew uba hangamei; un isih ïa phi na ka bynta kata. Hynrei lada phi pynbeit ïa u briew uba stad, un burom ïa phi.

⁹ Kano kano kaba phi kren ïa u briew uba stad, kan pynlong ïa u ban nang kham stad. Kano kano kaba phi kren ha u briew uba hok kan nang pynroi ïa ka jingtip jong u.

¹⁰ Ban long kiba stad, nyngkong phi dei ban tiengburom ïa U Trai. Lada phi tip ïa uta Uba Khuid, phi don ka jingshemphang.

¹¹ Ka jingstad kan nang pynjrong ïa ki snem ka jingim jong phi.

¹² Dei ma phi ban ïoh ïa ka jingmyntoi, lada phi don ka jingstad, bad lada phi kyntait ïa ka, phi hi phin shem jynjar.

¹³ Ka jingmutlop ka long kum ka kynthei kaba kaw kaw, kaba bieit bad kaba khlemrain.

¹⁴ Ka shong ha ka jingkhang jong ka ïing jong ka lane ha ki jaka shong kiba jrong tam ha ka shnong,

¹⁵ bad ka khot ïa ki briew kiba ïaid nangta, kiba dang leit sha la ka kam:

¹⁶ “Ale wan shane, phi ki briew kiba duna ka jingsngewthuh!” Ha u briew uba bieit ka ong,

¹⁷ “Ka um ba shu tuh ka kham shngiam, ka jingbam ba shu tuh ka kham bang.”

¹⁸ Kito kiba ngat ha ka jingriam jong ka kim tip ba ki briew kiba leit ha ïing jong ka ki ïap, bad kito kiba la rung mynshuwa ki don mynta ha kaba jylliew bha ka pyrthei kiba ïap.