PROBERB 8 - Khasi CL Bible (BSI)

Kaba rwai ïaroh ïa ka jingstad

¹ To shahshkor! Ka jingstad ka pyrta jam. Ka jingshemphang ka kren jam.

² Hajrong ki lum harud lynti bad ha ka jaka ïashem ki lad, ka ïeng.

³ Ha ka jaka rung sha ka nongbah, harud ki khyrdop, ka pyrta:

⁴ “Nga kyntu ïa phi, u khunbynriew; nga khot ïa uwei pa uwei ha ka pyrthei.

⁵ Hato phi dang long kiba lung jingmut? Hikai ban long kiba rangbah jingmut. Hato phi long kiba dang bieit? Hikai ban long kiba shemphang.

⁶ Shahshkor ïa ki ktien donburom tam jong nga, baroh kaba nga kren ka long kaba dei.

⁷ Kat kaba nga kren ka dei ka jingshisha, ha nga ki ktien lamler ki long kiba ijli.

⁸ Kiei kiei baroh kiba nga kren ki long kiba shisha; ym don ei ei ha ki kaba lamler lane ïalam bakla.

⁹ Ha u briew uba shemphang, ki long kiba shai; ha uta uba tip bha, ki long kiba beit.

¹⁰ Jied ïa ka jingbthah jong nga, ban ïa ka rupa; jied ïa ka jingtip, ban ïa ka ksiar nylla.

¹¹ “Nga long ka Jingstad, nga kham kordor ban ïa ki mawlynnai; baroh kaba phi angnud kam lah ban ïanujor bad nga.

¹² Nga long ka Jingstad, bad nga don ka bor sngewthuh; nga don ka jingtip bad ka bor pyrkhat kaba khlaiñ.

¹³ Ban pyndonburom ïa U Blei ka long ban isih ïa kaba sniew; nga isih ïa ka jingsarong bad ka jingsngewmeng, ïa ki lynti bymman bad ki ktien lamler.

¹⁴ Nga don ki jingthmu bad nga pyntreikam ïa ki; nga don ka jingshemphang, bad nga don ka bor.

¹⁵ Nga ïarap ïa ki syiem ban synshar, bad ki nongsynshar ban thaw ki aiñ kiba bha.

¹⁶ Man la u nongsynshar ha pyrthei u synshar da ka jingïarap jong nga, ki nongsaiñ hima bad ki riewdonburom kumjuh.

¹⁷ Nga ieit ïa kito kiba ieit ïa nga; kita kiba wad ïa nga kin shem ïa nga.

¹⁸ Nga don ka spah bad ka burom ban ai, ka jingdap kyrhai bad ka jingjop.

¹⁹ Kaei kaba me ïoh na nga ka kham bha ban ïa ka ksiar banylla, ka kham bha ban ïa ka rupa kaba kynsai.

²⁰ Nga ïaid ha ka lynti ka hok, nga bud ïa ki lynti ka jinglehhok,

²¹ nga pynriewspah ïa kito kiba ieit ïa nga, da kaba pyndap ïa ki ïing jong ki da ki jingkynshew.

²² “U Trai u la thaw nyngkong eh ïa nga, kaba nyngkong eh na ki kam jong u, la slem bah.

²³ Ïa nga la thaw ha kaba sdang eh, ha kaba nyngkong, shuwa ba ka pyrthei kan sdang.

²⁴ La kha ïa nga shuwa ki duriaw-bah, mynba ki umpohliew kim pat don.

²⁵ La kha ïa nga shuwa ki lumbah, ha shuwa ban pynïeng ïa ki lumrit,

²⁶ shuwa ba U Blei un thaw ïa ka khyndew bad ïa ki pyntha jong ka, ne wat shi kham ka khyndew kaba nyngkong.

²⁷ Nga la lah don hangta mynba u thaw ïa ka sahit bneng, mynba u pynïar ïa ka jylli halor ka duriaw,

²⁸ mynba u buh ïa ki lyoh ha sahit bneng, mynba u seng ïa ki umpohliew ka duriaw-bah,

²⁹ bad pynbeit ïa ki um ka duriaw ba kin ym kiew palat ban ïa kaba u la ong. Nga la don hangta mynba u buh ïa ki nongrim ka pyrthei.

³⁰ Nga don hajan jong u kum u nongring dur, man ka sngi nga la ai jingkmen ïa u, nga da shadkmen borabor ha khmat jong u —

³¹ nga lehkmen ha ka pyrthei, bad leh sngewbha bad ki jaitbynriew.

³² “Te mynta, ko samla, shahshkor ïa nga. Leh kumba nga ong, bad phin long suk.

³³ Shahshkor ïa kaei ba la hikai ïa phi, long uba stad; wat kyntait ïa ka.

³⁴ U briew uba shahshkor ïa nga un suk — u briew uba ap man ka sngi ha jingkhang jong nga, uba ap ha jaka rung ka ïing jong nga.

³⁵ U briew uba shem ïa nga u shem ïa ka jingim, bad U Trai un sngewbha ïa u.

³⁶ U briew u bym shem ïa nga u pynmong ïa lade; kat uba isih ïa nga u ieit ïa ka jingïap.”