PROBERB 7 - Khasi CL Bible (BSI)

¹ Ko khun jong nga, to kynmaw ïa kaei kaba nga kren, bad wat ju klet ban leh ïa kaei kaba nga ong ïa phi ban leh.

² Leh ïa kaei kaba nga ong, bad phin ïoh im. Da sumar bha ban bud ïa ki jinghikai jong nga kumba phi sumar ïa la ki khmat;

³ sumar ïa ki jinghikai jong nga ha ki por baroh; thoh ïa ka ha ka dohnud jong phi.

⁴ Ñiew ïa ka jingstad kum ka para jong phi, bad ïa ka jingshemphang kum ka paralok ba-ieit thep mynsiem jong phi.

⁵ Kin pyllait ïa phi na ki tnga jong kiwei pat ki briew, na ki kynthei kiba nang ban kren ïa ki ktien kiba pynshohbieit.

Ka kynthei awria

⁶ Shisien katba nga dang peit shabar ka jingkhangïit ka ïing jong nga,

⁷ bad nga la ïohi shibun ki samla shynrang kiba shida jingmut, hynrei nga la ïohi kyrpang ïa uwei u samla uba duna ka jingsngewthuh.

⁸ U dang ïaid ha lynti najan ka dong ha kaba shong kawei ka kynthei. U dang ïaid lyngba najan ïing jong ka

⁹ ha ka por janmiet ynda ka la dum.

¹⁰ Bad hangta ka la ïakynduh ïa u, ka da riam kum ka nuti bad ka da pyrkhat sniew.

¹¹ Ka dei ka briew kaba shlur bad ka bym don jinglehrain, kaba ju ïaid borabor ha ki lynti bah;

¹² lane ka ïeng apthap ha kyndong, teng teng ha ki surok bah, bad teng teng ha ka jaka ïew.

¹³ Ka kynrup trait ïa uta u samla, ka doh ïa u, ka peit shlip ha ki khmat jong u, bad ka ong,

¹⁴ “Nga la ai ki jingainguh mynta, bad nga don ki doh kñia.

¹⁵ Kumta mynta nga la wan ban ïakynduh ïa phi. Nga la kwah eh ban wan wad ïa phi, bad nga la lap ïa phi!

¹⁶ Nga la siang pynitynnat ïa ka jingthiah jong nga da ka jaiñ linen bun rong na Ijipt.

¹⁷ Nga la synreit ha ka ïa ka jingiwbih kaba da ka mirr, ka alos, bad ka siasia.

¹⁸ Ale keiñ, ngin ïaleh ieit baroh shi miet. Ngin ïalehkmen katba ngi dang ïakdup.

¹⁹ U tnga jong nga um don ha ïing; u la leit jingleit sha jngai.

²⁰ U la rah shi pla ka tyngka bad u bad un ym wan phai kumba ar taïew ei ei.”

²¹ Kumta ka la pynshoi ïa u da ki jinglehieit jong ka, bad u la ngat ha ki ktien jali ja-um jong ka.

²² Mar kumta hi u bud ïa ka kum u masi dab sha ka jaka shohdoh, lane kum u 'keirang uba ngat sbak ha ka jingriam

²³ ha kaba u 'namsop u dung ha u klongsnam jong u. U long kum ka sim kaba tur ruma sha ka jar — um shym tip ba ka jingim jong u ka don ha ka jingma.

²⁴ Te mynta, ko ki khun jong nga, sngap ïa nga. Pynleit jingmut ïa kaei kaba nga ong.

²⁵ Wat ai ba kum kata ka briew kan ïoh jop ïa ka dohnud jong phi; wat leit shang kylleng shaba ïaid ma ka.

²⁶ Naba ka la pynjot shibun ki rangbah bad ka la long ka daw jong ka jingïap kiba bun kiba ym lah ñiew shuh.

²⁷ Lada me leit sha ka ïing jong ka, me don ha ka lynti sha ka ri kiba ïap. Ka dei ka lynti kaba jan tam sha ka jingïap.