PROBERB 6 - Khasi CL Bible (BSI)

Ki jingmaham shuh shuh

¹ Ko khun jong nga, hato phi la kular ban bahkhlieh ïa ka ram jongno re?

² Hato phi la shah riam namar ki ktien jong phi hi, lane ngat namar la ki kular?

³ Ko khun jong nga, lada ka long kumta, phi don hapoh ka bor uta u briew, hynrei kane ka long kumno phin ïohlait na kata: leit bran bran sha u, bad kyrpad ba un pyllait noh ïa phi.

⁴ Wat ai thiah ai dem ïa lade lane wat shongthait.

⁵ Pyllait na kata ka jingriam kum ka sim ne ka skei kaba pyllait ïa lade na u nongbeh mrad.

⁶ Ki briew kiba jaipdeh, ki dei ban shim nuksa na ka rukom im ki dkhiew, ba phin dup stad.

⁷ Kim don u nongïalam, u syiem, lane u nongsynshar,

⁸ hynrei ki kynshew ïa la ki jingbam ha ka por lyiur, ban pynkhreh na ka bynta ka tlang.

⁹ Sa katno slem ïa uba jaipdeh ban dang thiah ha jingthiah? Slem lano un khie pat?

¹⁰ “Ngan da thiah shuwa shipor,” u ong; “ngan da kli ïa la ki kti bad shongthait shiphang.”

¹¹ Hynrei katba u dang ïohthiah, ka jingduk ka tur ïaleh ïa u kum u nonglute ba la kieng atiar.

¹² Ki briew ki bymlarkam, kiba sniew ki shang kylleng ban ïathuh lamler.

¹³ Ki khapbrip shiliang khmat bad ai dak ban shukor ïa phi.

¹⁴ Baroh shi katta ki ïai pyrkhat sniew ha la ka jingmut bakynriang, ki pynkhih jingkulmar kat shaba ki leit.

¹⁵ Namar kane, ka jingjynjar kan ngat kyndit ha ki khlem jingmaham, bad kin mynsaw jur khlem khie khlieh shuh.

^16-19 Don hynñiew tylli kiei kiei kiba U Trai u isih bad um lah shah: Ka khmat kaba i-meng, u thylliej uba lamler, ki kti kiba pynïap ïa ki briew kiba lui lui, ka jingmut kaba pyrkhat ïa ki jingthmu basniew, ki kjat kiba kloi ban leh sniew, u sakhi uba ïathuh lamler kawei hadien kawei pat, bad u briew uba pynmih jingïakajia hapdeng ki paralok.

Ka jingmaham pyrshah ïa ka jingklim

²⁰ Ko khun jong nga, leh ïa kaei ba u kpa jong phi u ong ïa phi, bad wat ju klet ïa kaei ba ka kmie ka hikai ïa phi.

²¹ Sumar borabor ïa ki ktien jong ki, da buh jingkynmaw ïa ki ha ka dohnud jong phi.

²² Ki jinghikai jong ki kin ïalam ïa phi haba phi leit jingleit, kin ïada ïa phi mynmiet, bad kin sneng ïa phi ha ka por mynsngi.

²³ Ki jingbthah jong ki, ki long kum ka jingshai ba-thaba; ki jingsneng jong ki, ki hikai ïa phi kumno ban im.

²⁴ Kane kan pyllait ïa phi na ki kynthei kiba sniew, na ki ktien bapynshohbieit jong ki tnga jong kiwei pat ki briew.

²⁵ Wat ai ba phin shah pynshoi ha ka jingbhabriew jong ki, wat shah ba ki khmat jong ki kin pynthame ïa phi.

²⁶ U briew u lah ban ïoh ïa ka nuti ha ka dor shi lyngkhot u kpu, hynrei ka jingklim kan shim syndon ïa baroh kaba u don.

²⁷ Hato phi lah ban rah ding ha la ka shadem khlem da pyn-ing ïa ki jaiñ jong phi?

²⁸ Phi lah ban ïaid halor ki rnga ding kiba rhem khlem da pyn-ing ïa la ki kjat?

²⁹ Ka long kaba mynsaw ban ïathiah lang bad ka tnga jong uwei pat u briew. Kat uba leh kumta un shem shitom.

³⁰ Ki briew kim da ibeiñ ïa u nongtuh lada u tuh jingbam haba u la thngan;

³¹ pynban lada u shah kem, u dei ban siew pat hynñiew shah — u dei ban ai lut kat ïa kaba u don.

³² Hynrei u briew uba klim um don ka bor sngewthuh. U shu pynjot ei ïa lade.

³³ Un shah pynlehrain bad shah shoh, un jahburom shi rta.

³⁴ U tnga u kham jur ka jingbitar ha ka por ba u bishni; ka jingpynhiarkput jong u kam don pud.

³⁵ Un ym pdiang ïa kano kano ka jingai kuna; ki jingai sngewbha kiba bun katno katno ruh kim lah ban pynjem ïa ka jingbitar jong u.