PROBERB 5 - Khasi CL Bible (BSI)

Ka jingmaham pyrshah ïa jingklim

¹ Ko khun jong nga, to sngap bad shahshkor ïa ka jingstad bad ka jingshemphang jong nga.

² Te phin sa nang kumno ban leh donakor, bad ki ktien jong phi kin pynpaw ba phi don ka jingtip.

³ Ki rmiang shyntur ka tnga jong uwei pat u briew ki lah ban thiang kum ka ngap, bad ki jingdoh jong ka ki long jlih kum ka umphniang Olib;

⁴ hynrei haba la dep baroh, ka khlem ieh ei ei ïa phi hynrei tang ka jingkthang bad ka jingpang.

⁵ Kan ïalam ïa phi sha ka pyrthei kiba ïap; ka lynti ba ka ïaid ka dei ka lynti sha ka jingïap.

⁶ Kam neh ban ïaid ha ka lynti kaba lam sha ka jingim; hynrei ka ïaid sakma, bad kam sngewthuh ka jia aïu.

⁷ Te mynta, ko ki khun jong nga, shahshkor ïa nga bad wat klet ïa ki ktien jong nga.

⁸ Pynjngai ïa lade na kum kata ka briew, wat ju leit tur sha jan ka jingkhang ka ïing jong ka.

⁹ Lada phi leh kumta, kiwei pat kin ïoh ïa ka burom kaba phi la ïoh shisien, bad phin ïap samla ha ki kti ki briew ki bym don jingisynei.

¹⁰ Ho-oid, ki nongwei kin ïohknieh ïa ka spah jong phi baroh, bad kaei kaba phi la trei shitom kan long ka jong kiwei pat.

¹¹ Phin thiah ryngkat bad ka jingud shuwa ba phin ïap, ka doh bad ki dohksah jong phi kin ringswai, bad phin ong,

¹² “Balei keiñ ba ngam peiphang? Balei keiñ ba ngam shah ba kiwei kin pynbeit ïa nga?

¹³ Ngam shym sngap ïa ki nonghikai jong nga, ngam shym la shahshkor ïa ki.

¹⁴ Kynsan kynsan nga shem ïa lade ha ka jingjahburom ha khmat u paidbah.”

¹⁵ To ïaineh bad ka tnga jong phi bad ai ka jingieit tang ïa ka hi.

¹⁶ Ki khun kiba phi la ïoh na kiwei pat ki kynthei kin ym wanrah jingbha ei ei ïa phi.

¹⁷ Ki khun jong phi kin san ban ïarap ïa phi, ym ki nongwei.

¹⁸ Kumta shongsuk bad ka tnga jong phi bad shem ïa ka jingkmen bad ka kynthei kaba phi shongkurim —

¹⁹ kaba itynnat bad shongkhia kum ka skei. Ai ba ki jingitynnat jong ka kin pynkmen ïa phi; ai ba kan ker sawdong ïa phi da ka jingieit jong ka.

²⁰ Ko khun jong nga, balei phin shu ai ïa la ka jingieit sha kawei pat ka briew? Balei phin kham jied ïa ka jingpynshohbieit ka tnga jong uwei pat u briew?

²¹ U Trai u ïohi ïa baroh kaba phi leh, kat shaba phi leit, u peit ïa phi.

²² Ki pop u riewbymman ki long ka jingriam. U ngat ha ka jingriam jong ki pop jong u hi.

²³ U ïap namar ba um lah synshar ïa lade; ka jingïailong mutlop jong u kan ïalam ïa u sha ka jingtep jong u hi.