PROBERB 4 - Khasi CL Bible (BSI)

Ki jingmyntoi ka jingstad

¹ Ko ki khun jong nga, to shahshkor ïa kaei ba u kpa jong phi u hikai ïa phi. Shahshkor bha, bad phin ïoh ka jingshemphang.

² Kaei kaba nga hikai ïa phi ka long kaba bha, kumta wat klet ïa ka.

³ Mynba nga dang long tang u khynnah rit, u khun marwei ki kmie ki kpa jong nga, i pa i ju hikai ïa nga.

⁴ I ju ong, “Kynmaw bha ïa kaba nga ong bad wat klet ïa ka lano lano ruh. Leh kumba nga ong ïa phi, bad phin im.

⁵ A to ïoh ïa ka jingstad bad ka jingshemphang! Wat klet lane leh bymsuidñiew ïa ki ktien jong nga.

⁶ Wat iehnoh ïa ka jingstad, bad kan ïada ïa phi; ieit ïa ka, te kan sumar bha ïa phi.

⁷ Kaba ïoh ïa ka jingstad ka long kaei kaei kaba donkam tam ba phi dei ban leh. Nalor kaei kaei baroh kaba phi ïoh, to ïoh ruh ïa ka jingshemphang.

⁸ Ieit ïa ka jingstad, te kan pynkhraw ïa phi; pdiang ïa ka, te kan ai burom ïa phi.

⁹ Kan long ka pansngiat ka burom ha phi.”

¹⁰ Ko khun jong nga, shahshkor ïa nga, shim khia ïa kaei kaba nga hikai ïa phi, bad phin im slem.

¹¹ Nga la hikai ha phi ïa ka jingstad bad ka rukom im kaba dei.

¹² Yn ym don u ban pynwit ïa ka lynti jong phi lada phi ïaid kum uba stad, bad phin ym jynthut haba phi mareh.

¹³ Kynmaw borabor ïa kaei kaba phi la nang. Ka jingnang jingtip jong phi ka dei ka jingim jong phi — ri kyndong ïa ka.

¹⁴ Wat leit sha kaba ki riewsniew ki leit. Wat pyrthuh bud ïa ka jingleh jong ki riewbymman.

¹⁵ A wat leh ïa kata! Kiar na ka kam bymman! Kyntait ïa ka bad ïaid ha la ka lynti.

¹⁶ Ki riewsniew kim nang ïohthiah lymda ki ïoh ban leh ïa ka kam sniew; ki peitmat sah lymda ki la ïoh pynmynsaw ïano ïano.

¹⁷ Ka jingleh bymman bad ka jingleh jubor ki long kum ka bam ka dih ïa ki.

¹⁸ Ka lynti kaba kiba hok ki ïaid ka long kum ka jingmih ka sngi; ka nang phyrnai nang phyrnai haduh ba kan da shai bha kum mynsngi.

¹⁹ Ka lynti ki riewsniew ka long kaba dum tliw tliw kum ka miet. Ki kyllon, hynrei kim ïohi ha-ei ki jynthut.

²⁰ Ko khun jong nga, shahshkor ïa kaei kaba nga ong; sngap ïa ki ktien jong nga.

²¹ Wat shah ba kin phet noh na phi; kynmaw bad ri kyndong ïa ki ha ka dohnud jong phi.

²² Ki long ka jingim bad ka jingkoit jingkhiah ïa uno uno uba sngewthuh ïa ki.

²³ Da phikir kumno phi pyrkhat; naba ki jingpyrkhat jong phi ki saiñdur ïa ka jingim jong phi.

²⁴ Wat ju kren ïa kano kano ka bymshisha. Kiar na kaba kren lamler bad na ki ktien kiba ïalam bakla.

²⁵ Peit beit sha khmat da ka jingsngewskhem kaba hok; wat pyndem ïa la ka khlieh ha ka jinglehrain.

²⁶ Da pyrkhat bha aïu phi leh, bad kat kaba phi leh kan long bha.

²⁷ Kiar na kaba sniew bad ïaid beit sha khmat. Wat jam palat na ka lynti kaba dei.