PROBERB 31 - Khasi CL Bible (BSI)

Ka jingkyntu ïa u syiem

¹ Kine ki long ki ktien shongkhia kiba ka kmie u syiem Lemuel ka kren ha u:

² “Phi long u khun ba-ieit jong nga, ka jubab ïa ki jingduwai jong nga. Kaei ngan ïathuh ïa phi?

³ Wat pynlut ïa la ka bor ha ka jingïathiah shongkha, bad ïa baroh ka pisa jong phi ha ki kynthei; ki la pynjot ïa ki syiem.

⁴ To shahshkor, ko Lemuel. Ki syiem kim dei ban dih waiñ, lane kim dei ban thrang kyiad;

⁵ haba ki dih, ki klet noh ïa ki aiñ bad ki lyndet noh ïa ki hok jong ki briew kiba kyrduh.

⁶ Ka kyiad ka long ïa ki briew kiba la jan ïap, ïa kito kiba shem jynjar sat.

⁷ Shah kin dih bad kin klet ïa la ka jingduk, bad ïa ka jingsngewsih.

⁸ “Kren na ka bynta ki briew ki bym lah ban kren na ka bynta ïa lade. Ïada ïa ki hok jong baroh ki bym don jingïarap.

⁹ Kren na ka bynta jong ki bad long u nongbishar uba hok. Ïada ïa ki hok jong kiba duk bad kiba kyrduh.”

Ka tnga kaba lah

¹⁰ A katno ka long kaba eh ban shem ïa ka tnga kaba lah! ka dor jong ka, ka kham kor shibun ban ïa ki mawkordor.

¹¹ U tnga jong ka u buh ka jingshaniah jong u ha ka, bad un ym kyrduh ei ei.

¹² Katba ka dang im, ka trei ban pynbha bad ym ban pynsniew ïa u.

¹³ Ka trei smat ïa lade ban thir 'saiwul bad thain jaiñ linen.

¹⁴ Ka wanrah jingbam sha la ïing na ki jaka bajngai, kumba ki lieng khaïi ki leh.

¹⁵ Ka khie dang step phyrngab bad ka pynkhreh jingbam ïa kiba ha ka ïing jong ka, bad ban ong ïa la ki shakri kynthei ïa kaei kaba ki dei ban leh.

¹⁶ Ka peit bniah ïa ka lyngkha bad ka thied ïa ka, bad da ka kamai ba ka ïoh ka thung ki dieng sohwaiñ ha ka brisoh.

¹⁷ Ka long kaba trei shitom, kaba khlaiñ bad kaba minot.

¹⁸ Ka tip ïa ka dor jong kiei kiei kiba ka thaw, bad ka trei haduh ynda miet bha.

¹⁹ Ka thir hi ïa la u ksai, bad ka thain hi ïa la ka jaiñ.

²⁰ Ka long kaba sbun ïa kiba duk, bad kiba kyrduh.

²¹ Haba hap ka ïor, kam khuslai namar kiba ha ka ïing jong ka ki biang ki jaiñ syaid.

²² Ka thain ïa ki jaiñ siang thiah bad ka phong da ki jaiñ linen bani bad basawbthuh.

²³ U tnga jong ka u long uba la ithuh bha, bad u long uwei na ki nongshong shnong uba pawkhmat.

²⁴ Ka thain ki jaiñkup bad ki jingpanpoh bad ka die ïa ki ha ki nongkhaïi.

²⁵ Ka long kaba khlaiñ bad ïoh burom, bad kam sheptieng ïa ka lawei.

²⁶ Ka kren da ka jingstad kaba jai jai.

²⁷ Ka long borabor kaba smat kaba sting bad ka khmih ïa ki jingdonkam ha ka longïing jong ka.

²⁸ Ki khun jong ka, ki pynpaw ïa ka jingsngew burom ïa ka, u tnga jong ka u ïaroh ïa ka.

²⁹ U da ong, “Shibun ki kynthei ki long ki tnga kiba bha, hynrei phi long kaba bha tam na ki baroh.”

³⁰ Ka jingbhabriew ka long ka jingshukor bad ka jingitynnat ka jah noh, hynrei ka kynthei kaba tiengburom ïa U Trai ka dei ban ïoh ïaroh.

³¹ Ai burom ïa ka ïa baroh kaba ka leh. Ka dei hok ban burom da baroh.