PROBERB 30 - Khasi CL Bible (BSI)

Ki ktien u Agur

¹ Kine ki long ki ktien bashongkhia jong u Agur u khun jong u Jakeh: “U Blei um long bad nga, U Blei um long bad nga, bad nga long khlem jingïarap.

² Nga kham long kum u mrad ban kum u briew; ngam don ka jingshemphang kumba u briew u dei ban don.

³ Ngam pat ju nang ïa kano kano ka jingstad, bad ngam tip ei ei shaphang U Blei.

⁴ Uei uba la ju long kynrad ïa ka jingtip ba kynja bneng? Uei uba la ju kham ïa ka lyer ha la ka kti? Lane uba la tehsong ïa ka um ha ka jaiñ lyngkhot? Lane uba la pynskhem ïa ki pud jong ka pyrthei? U dei uei lada phi tip? Uei u khun jong u?

⁵ “U Blei u bat man la ka kular ba u pynlong. U long kum ka stieh ïa baroh kiba wad ïa ka jingïada jong u.

⁶ Lada phi kam ba u ong ei ei ïa kaba um shym la ong, un sneng tyngeh ïa phi, bad yn pynpaw ba phi dei uba lamler.”

Kiwei kiwei Ki Proberb

⁷ Nga pan na me, A Blei, ban shah ïa nga ban don ar tylli kiei kiei shuwa ba ngan ïap:

⁸ Pyllait ïa nga na ka jingshukor bad shah ïa nga ban ym riewspah lane duk. Kumta ai ïa nga ka jingbam kat ban biang ïa nga.

⁹ Lada nga ïoh palat, nga lah ban ong ba ngam donkam ïa me. Hynrei lada nga kyrduh pat, nga lah ban tuh bad pynjahburom ïa U Blei jong nga.

¹⁰ Wat ju kren pyrshah ïa u shakri ha u kynrad jong u. Phin long uba la tim bad jynjar na ka bynta kata.

¹¹ Don ki briew kiba tim ïa la ki kpa bad ki bym ju pyn-i ïa la ka jingïaroh ïa la ki kmie.

¹² Don ki briew kiba tharai ba ki long kiba khuid hynrei kiba dap da ka tngit suda.

¹³ Don ki briew kiba pyrkhat ba ki long kiba bha palat — oh, katno ka jingbha ki pyrkhat ba ki long!

¹⁴ Don ki briew kiba shim kabu-runar ïa kiba duk bad kiba kyrduh; kata ka long ka rukom ba ki kyrshan ïa la ka jingim.

¹⁵ U thliem u don ar ngut ki khun kynthei, bad baroh ar ki kyrteng “Ai ïa nga!” Don saw tylli kiei kiei ki bym ju kdang:

¹⁶ Ka pyrthei kiba ïap, ka kynthei kaba khlem khun, ka khyndew rkhiang kaba donkam slap, bad ka ding kaba meh bym lah ban tem.

¹⁷ Uno uno uba leh biria ïa la u kpa lane uba ñiewbeiñ ïa la ka kmie ha ka jinglong tymmen jong ka u dei ban shah bam ha ki pukni ne shah khlaw ki khmat ha ki tyngab khlaw.

¹⁸ Don saw tylli kiei kiei kiba phylla eh ïa nga ba ngan shemphang:

¹⁹ u pukni u her ha suiñ, u bseiñ u par halor u mawsiang, ka liengbah kaba wad ïa la ka lynti ha ka duriaw, bad u briew bad ka briew kiba ïashoh jingieit.

²⁰ Ka tnga ka bymïaineh ka leh kumne: ka klim, ka sum, bad ka ong, “Hynrei ngam shym leh ei ei ka bymdei!”

²¹ Don saw tylli kiei kiei ba ka pyrthei da lade kam lah shah:

²² u mraw uba kylla long syiem, u bieit uba u ïoh ban bam ïa baroh kat kaba u kwah,

²³ ka kynthei kaba ijli kaba ïoh ban shongkurim, bad ka shakri haba ka ïoh ban shim ïa ka jaka ka kynrad jong ka.

²⁴ Don saw jait ki mrad kiba rit ha ka pyrthei, hynrei kiba sian shikatdei eh:

²⁵ ki dkhiew: ki dei kiba tlot, hynrei ki kynshew ïa la ka jingbam mynlyiur;

²⁶ ki phyllad: kim long kiba khlaiñ, hynrei ki shna la ki skum ha ki synrang mawsiang.

²⁷ Ki puit: kim don syiem, hynrei ki mih ryntih kynhun kynhun.

²⁸ Ki 'ñiangapïing: phi lah ban bat kawei ha la ka kti, hynrei phi lah ruh ban shem ïa ki ha ki ïingsyiem.

²⁹ Don saw tylli kiei kiei kiba ktah jur ïa ka jingmut haba peit ba ki ïaid:

³⁰ Ki sing, kiba khlaiñ tam na ki mrad baroh bad ki bym tieng ïano ïano;

³¹ ki 'langsohmoh, ki 'iar-ryngkuh kiba ïaid pyn-at shadem, bad u syiem ha khmat ki briew jong u.

³² Lada phi la long kiba bieit shisha ban sngewmeng bad ban thmu sniew, sangeh bad pyrkhat!

³³ Lada phi king kynruh ïa ka dud, ka pynmih makhon. Lada phi tied ïa ka khmut jongno jongno, ka pynmih snam. Lada phi pynkhih ïa ka jingbitar, phi ngat ha ka jingjynjar.