PROBERB 3 - Khasi CL Bible (BSI)

Ka jingai jingmut ïa ki samla

¹ Ko khun jong nga, wat klet ïa kaei kaba nga hikai ïa phi, kynmaw borabor ïa kaei kaba nga ïathuh ïa phi ban leh.

² Ka jinghikai jong nga kan ai ïa phi ka jingim kaba jlan bad kaba manbha.

³ Wat ai ba ka jinglong bashaniah bad baïaineh kin iehnoh ïa phi. Teh ïa ki sawdong ka ryndang jong phi; thoh ïa ki ha ka dohnud jong phi.

⁴ Lada phi leh ïa kane, phin pynsngewbha ïa U Blei bad ïa u briew.

⁵ Shaniah ha U Trai da ka dohnud jong phi baroh. Wat shaniah ha kaei ba phi pyrkhat ba phi tip.

⁶ Kynmaw ïa U Trai ha kaei kaei kaba phi leh, bad un pyn-i ha phi ïa ki lynti kaba dei.

⁷ Wat buh ka jingpyrkhat ha lade ba phi kham stad ban ïa kaba phi long; shu kohnguh beit ïa U Trai, bad kiar ban leh ïa kaba sniew.

⁸ Lada phi leh kumta, kan long kum ka dawai kaba bha, kaba pynkoit ïa ki jingmong jong phi bad pynjem ïa ki jingpang jong phi.

⁹ To burom ïa U Trai da kaba ai ha u ka jingainguh da kiei kiei kiba bha tam ba ka lyngkha jong phi ka pynmih.

¹⁰ Lada phi leh kumta, ïa ki thiar jong phi yn pyndap da u kew, bad phin ïoh ruh shibun bha ka waiñ haduh ba phim lah shuh ban pynlang ïa ka.

¹¹ Ko khun jong nga, haba U Trai u pynbeit ïa phi, da shahshkor bha, bad shim ïa ka kum ka jingmaham.

¹² U Trai u pynbeit ïa kito kiba u ieit, kumba u kpa u pynbeit ïa u khun ïa uba u sngewsarong.

¹³ Suk uta u briew uba long stad — uba ïoh ka jingshemphang.

¹⁴ Ka don shibun ka jingmyntoi ha ka, ban ïa kaba don ha ka rupa; ka kham shongdor shibun ha phi ban ïa ka ksiar.

¹⁵ Ka jingstad ka kham kordor shibun ban ïa ki mawlynnai; ym don kano kano ruh na ka jingkwah jong phi ba lah ban ïanujor bad ka.

¹⁶ Ka jingstad ka pynjlan ïa ka rta jong phi kumjuh ruh ka pynïoh ïa ka spah bad ka burom.

¹⁷ Ka jingstad kan pynsngewtynnat ïa ka jingim jong phi bad ka ai jingsuk lynter ïa phi.

¹⁸ Kito kiba stad ki suk mynsiem; ka jingstad kan ai ha ki ïa ka jingim.

¹⁹ U Trai u la thaw ïa ka pyrthei da ka jingstad jong u; da ka jingshemphang jong u, u la buh beit ïa ka sahit bneng ha la ka jaka.

²⁰ Ka jingstad jong u, ka pynlah ïa ki wah ban tuid bad ïa ki lyoh ba kin pynhap slap ha ka khyndew.

²¹ Ko khun jong nga, batskhem ïa la ka jingstad bad ka jingsngewthuh. Wat shah lano lano ba kin lait noh na phi.

²² Kin ai ha phi ïa ka jingim — ka jingim kaba sngewtynnat bad kaba kmen.

²³ Phi lah ban ïaid da kaba suk ha ki lynti jong phi bad phin ym jynthut.

²⁴ Phin ym sheptieng haba phi thiah, bad phin ïohthiah suk baroh shi miet.

²⁵ Phin ym donkam ban khuslai ïa ka jingpynjot kaba wan kynsan, kum kaba wan ha ki riewbymman kum ka 'erïong.

²⁶ U Trai un ri sumar ïa phi. Un ym shah ba phin hap ha ka jingriam.

²⁷ Ha kano kano ka por ba phi ïoh ka kabu, leh ïa kaba bha ïa kito kiba donkam ïa ka.

²⁸ Wat ong ha la u paramarjan ap haduh lashai lada phi lah ban ïarap ïa u mynta.

²⁹ Wat thmu sniew ei ei ban pynmong ïa la u paramarjan, uba sah hajan jong phi, uba shaniah ïa phi.

³⁰ Wat ïakynroi badno badno khlem daw haba um ju leh kano kano ka ban pynmynsaw ïa phi.

³¹ Wat ju kwah ban long kum ki briew ba leh jubor lane pyrshang ban leh ïa kaba ki leh,

³² namar U Trai u isih ïa ki briew kiba leh bymman, hynrei ïa ki briew kiba hok u ïarap ïa ki.

³³ U Trai u buh ka jingtim ha ki longïing jong ki riewbymman, hynrei u kyrkhu ïa ki longïing jong kiba hok.

³⁴ Um donkam ïa kiba sarong, hynrei u lehsbun ïa kito kiba sngewrit.

³⁵ Ki briew kiba stad kin nang ïoh ka nam ka burom, hynrei ki briew kiba mutlop kin nang mad ka jingjahburom.