PROBERB 29 - Khasi CL Bible (BSI)

¹ Lada phi ïai mutlop man la ka por ba phi shah pynbeit, ha kawei ka sngi phin sa shah pynlwet bad phin ym lah khie shuh.

² To pyn-i ha nga ïa u nongsynshar uba hok bad ngan pyn-i ha phi ïa ki briew kiba suk. To pyn-i ha nga ïa u nongsynshar basniew bad ngan pyn-i ha phi ïa ki briew kiba shah lanot.

³ Lada phi ïaroh ïa ka jingstad, u kpa jong phi un sngewsarong ïa phi. Ka long ka jingpynlehnoh-ei ba-bieit ban pynlut pisa ha ki nuti.

⁴ Haba u syiem u pyrkhat khia ïa ka jingbishar hok, ka ri kan long kaba khlaiñ, hynrei haba u pyrkhat khia tang ïa ka pisa, un pynjot ïa ka ri jong u.

⁵ Lada phi pynroh ïa ki paralok jong phi, phi buh jingriam ïa lade.

⁶ Ki briew basniew ki ngat ha la ki jong ki pop, katba ki briew bahok ki kmen bad ki laitluid.

⁷ U briew uba bha u tip ïa ki hok jong kiba duk, hynrei ki briew basniew kim lah sngewthuh kum ïa kita kiei kiei.

⁸ Ki briew ki bym ñiewkor ïa kiwei pat, ki lah ban pynkhih kulmar ïa ki nongbah baroh. Kito kiba stad ki pynjai jai ïa kiei kiei.

⁹ Haba u briew uba proh jingmut u wanrah ïa ka mokotduma pyrshah ïa uba bieit, uba bieit u shu rkhie bad u hylla bad u tim.

¹⁰ Ki briew kiba thrang snam ki isih ïa uno uno uba lehhok, hynrei ki briew bahok kin ïada ïa ka jingim jong kum uta u briew.

¹¹ Ki briew kiba bieit ki pynpaw ïa la ka jingbitar ha kaba paw, hynrei ki briew kiba shemphang ki ïaishah bad ki set khop ïa ka.

¹² Lada u nongsynshar u shahshkor ïa ka jingai jingtip balamler, baroh ki rangbah synshar kin kylla long ki riewlamler.

¹³ U briew baduk bad u nongbanbeiñ jong u ki ïadon ïa kane kumjuh — U Trai u ai ïa ki khmat ha baroh ar ngut.

¹⁴ Lada u syiem u ïada ïa ki hok jong kiba duk, un synshar slem.

¹⁵ Ka jingsneng bad ka jingpynbeit ki long kiba bha ïa ki khynnah. Lada u khynnah u ïoh leh katba u mon, u pynlehrain ïa la ka kmie.

¹⁶ Haba ki briew basniew ki don ha ka bor synshar, ka kam sniew ka nang roi. Hynrei kiba hok kin im ban ïohi ïa ka jingkyllon jong kiba kum kita ki briew.

¹⁷ Sneng pynbeit ïa la u khun bad phi lah ban sngewsarong borabor ïa u. Un ym long daw ïa phi ban shah lehrain.

¹⁸ Ka jaitbynriew kaba khlem ka jingïalam U Blei ka long ka jaitbynriew ka bym ïaid beit. A suk uta u briew uba sumar ïa ka hukum U Blei!

¹⁹ Phim lah ban pynbeit ïa u shakri tang da kaba kren ïa u. U lah ban sngewthuh ïa phi, hynrei un ym pynleit jingmut.

²⁰ Don katto katne ka jingkyrmen ïa u bieit uba mutlop ban ïa uno uno uba kren khlem pyrkhat.

²¹ Lada phi ai ïa la u shakri ïa baroh kat kaba u kwah naduh ba u dang khynnah ter ter, ha kawei ka sngi un sa shimti ïa baroh kaba phi don.

²² Ki briew kiba kloi ban bitar ki pynlong shibun ki jingïakajia bad ki jingkulmar.

²³ Ka jingsngewmeng kan wanrah ïa ka jinghap jong phi, hynrei lada phi long kiba sngewrit, yn burom ïa phi.

²⁴ U para nongtuh u long u nongshun uba sniew tam jong u hi. Un shah pynshitom lada u ïathuh ïa ka jingshisha ha ka ïingbishar, U Blei un tim ïa u lada um leh kumta.

²⁵ Ka long kaba ma ban sngewkhia ïa kaei kaba kiwei ki pyrkhat shaphang jong phi, hynrei lada phi shaniah ha U Trai, phi long shngain.

²⁶ Uwei pa uwei u kwah ïa ka jingsngewtynnat na u nongsynshar; hynrei tang na U Trai phi lah ban ïoh ïa ka jingbishar hok.

²⁷ Uba hok u isih ïa u bymman, bad u bymman u isih ïa uba hok.