PROBERB 28 - Khasi CL Bible (BSI)

¹ Ki bymman ki phet ha bym don ba beh ïa ki, hynrei u briew uba hok u shlur kum u sing.

² Haba ka jaitbynriew ka leh pop, kan ïoh u nongsynshar uwei hadien uwei pat. Hynrei ka jaitbynriew kan long kaba khlaiñ bad kaba ïaineh haba ka don ki nongsynshar kiba stad bad bashemphang.

³ U briew uba don ha ka bor uba banbeiñ ïa kiba duk u long kum u 'lapbah 'lapsan uba pynjot thiaw ïa ki jingthung.

⁴ Kito kiba lyndet ïa ka hukum ki ïaroh ïa ki bymman; hynrei kito kiba bat ïa ka ki ïaleh pyrshah ïa ki.

⁵ Ki briew kiba sniew kim sngewthuh kaei ka jinglehhok, hynrei kito kiba mane ïa U Trai ki sngewthuh bha ïa ka.

⁶ Ka kham bha ba duk bad ba long hok ban ïa kaba riewspah bad ïaid kynriang.

⁷ U samla uba kohnguh ïa ka aiñ u dei uba stad. Uta uba ïalong paralok bad ki bymlarkam ei ei u pynjahburom ïa la u kpa.

⁸ Lada phi ïoh spah da kaba kheiñ sut bad shim kabu ïa ki briew, ka spah jong phi kan leit sha uwei pat uba lehsbun ïa kiba duk.

⁹ Lada phim kohnguh ïa ka hukum, U Blei un shem ïa ki jingduwai jong phi kiba ijli eh ban sngap.

¹⁰ Lada phi leh buit bymman ïa u briew uba hok ban leh ïa kaba sniew, phin hap ha la ka jong ka liewlep. Uba lui lui un ïohnong shibun.

¹¹ Ki briew kiba riewspah ki ju pyrkhat borabor ba ki long kiba stad, hynrei u briew uba duk, uba don ka jingsngewthuh shaphang ka jinglongbriew u tip kham bha.

¹² Haba ki briew kiba bha ki wan ha ka bor, baroh ki lehkmen, hynrei haba ki briew kiba sniew ki synshar, ki briew ki buhrieh ïa lade.

¹³ Phin ym long uba jop ha ka jingim lada phi pyrshang ban buhrieh ïa la ki pop. Phla ïa ki bad iehnoh ïa ki; te U Blei un pyn-i ka jingisynei ïa phi.

¹⁴ Kohnguh borabor ïa U Trai bad phin long kiba suk. Lada phi long kiba eh dohnud, phin hap ha ka jingjot.

¹⁵ Ki briew kiba duk ki long khlem jingïarap ha khmat u nongsynshar uba sniew; u long uba shyrkhei kum u sing uba kyrhuh ne ka dngiem kaba tur.

¹⁶ U nongsynshar uba khlem ka jingshemphang un long u nonglehbeiñ uba runar. Uta uba isih ïa ka jingbymhok un synshar slem.

¹⁷ U briew uba shah pynrem ba u pynïap briew u tih ïa la ka jong ka jingtep kloi katba lah. Wat pyrshang ban pynsangeh ïa u.

¹⁸ Long uba hok bad phin long shngain. Lada phi long bymhok phin kyllon kynsan.

¹⁹ U nongrep uba trei shitom u don kyrhai ban bam. Ki briew kiba pynsyrwa ïa la ka por kin duk lynter.

²⁰ Ki briew kiba lehhok kin ïoh ka jingim kaba kyrhai bad kaba suk. Hynrei lada phi long kyrkieh ban riewspah, phin ym lait na kaba shah pynshitom.

²¹ Kaba ñiewshiliang ka long kaba bakla. Hynrei don katto katne ki nongbishar ki ban leh bymdei ban ïoh wat tang kaba rit tam ka jingbamsap.

²² Ki briew kiba pyrkhat tang ïa lade ki kyrkieh ban ïoh spah ha kaba kim tip lano ka jingduk kan lap.

²³ Sneng pynbeit ïa uno uno, bad hadien un ïaroh ïa ka kham bun ban ïa kaba pynroh.

²⁴ Uno uno uba pyrkhat ba kam long kaba bakla ban tuh na la ki kmie ki kpa um long kham bha ban ïa u nongtuh uba la ju mlien.

²⁵ Ka jingkhapnap ka pynmih tang ka jingjynjar. Phi long kham bha ban shaniah ha U Trai.

²⁶ Ka long ka jingbieit ban bud ïa la ki jong ki jingsngewthuh. To long shngain, bad bud ïa ki jinghikai jong ki briew kiba kham stad.

²⁷ Ai ha kiba duk bad phin ym don ha ka jingkyrduh lano lano ruh. Lada phi khapbrip la ki khmat sha kiba duk, ki briew kiba bun kin tim ïa phi.

²⁸ Ki briew kin buhrieh ïa lade haba ki briew kiba sniew ki wan ha ka bor. Hynrei ynda ki hap na ka bor, kiba hok kin synshar biang.