PROBERB 27 - Khasi CL Bible (BSI)

¹ Wat sarong shaphang kaba lashai. Phim tip aïu kan jia hapdeng mynta bad hadien.

² Ai ba kiwei pat ki briew kin ïaroh ïa phi — wat ki nongwei; ym dei ban leh ïa ka na lade.

³ Ka jingkhia u maw bad u shyiap kam long ei ei ban haba ïanujor bad ka jingjynjar kaba uba mutlop u lah ban pynjia.

⁴ Ka jingbitar ka long kaba shyrkhei bad kaba pynjot, hynrei kam long ei ei haba ïanujor bad ka jingpihuiñ.

⁵ Ka kham bha ban pynbeit ïano ïano ha kaba paw ban ïa kaba pynlong ïa u ban pyrkhat ba phim suidñiew satia ïa u.

⁶ U paralok u thmu ïa kaba bha, wat haba u pynmong ïa phi. Hynrei haba u nongshun u buh ïa ka ksang'ti jong u halor ka tyrpeng jong phi — da husiar!

⁷ Haba phi la kdang, phin hap kyntait wat ïa ka ngap ruh; hynrei haba phi thngan, wat ka jingbam kaba kthang ruh ka thiang.

⁸ U briew sha jngai na la ïing u long kum ka sim kaba jngai na la ka skum.

⁹ Ki umphniang sleh bad ba-iwbih ki pynlong ïa phi ban sngewkmen, hynrei ka jingjynjar ka pynkulmar ïa ka jingsuk jingmut jong phi.

¹⁰ Wat nym klet ïa la ki paralok lane ïa ki paralok u kpa jong phi. Lada phi don ha ka jingjynjar, wat ong ïa u hynmen ne para jong phi ban ïarap; u paramarjan uba hajan u lah ban ïarap ïa phi kham bha ban ïa u hynmen ne para uba sha jngai.

¹¹ Ko khun jong nga, to long uba stad, bad ngan long uba kmen; ngan don ka jubab ïa uno uno uba kem daw ïa nga.

¹² Ki briew kiba shemphang kin ïohi ïa ka jingma ba ka wan bad kin kiar na ka, hynrei ki briew ki bym pyrkhat kin ïaid beit ha ka bad kin babe kylla hadien.

¹³ Uta uba da mutlop u kular ban kitkhlieh ïa ka ram u nongwei u dei hok ban buh ïa la ka jong ka jingdon jingem ban pynshisha ïa ka jingsiew.

¹⁴ Phi lah lehse ban tim ïa u paralok jong phi kat haduh ban da pynkhie ïa u dang step phyrngab da ka jingkhublei kaba jam.

¹⁵ Ka tnga kaba bunktien ka long syriem kum ka um kaba jaw jrop shi jrop ha ka sngi ba slap.

¹⁶ Kumno phi lah ban pynsngap jar ïa ka? Hato phi la ju pyrshang ban khang ïa ka lyer lane phi la ju pyrshang ban kham ha ka kti ïa ka umphniang?

¹⁷ Ki briew ki ïoh jinghikai uwei na uwei pat, kumba u nar u pynnep ïa u nar.

¹⁸ Sumar bha ïa u dieng Dumbur bad phin ïoh ïa ki soh ban bam. U shakri uba sumar bha ïa la u kynrad un ïoh burom.

¹⁹ Ka dei ka durkhmat jong phi hi kaba phalang ha ka um bad ka dei ka malade jong phi hi kaba phi ïohi ha ka dohnud jong phi.

²⁰ Ki jingkwah u briew ki long kum ka pyrthei kiba ïap — Ka don borabor ka jingkwah shuh shuh.

²¹ Ka ding ka phrang ïa ka ksiar bad ka rupa; ïa ka nam u briew lah ruh ban phrang.

²² Wat lada phi shoh ïa u bieit haduh ba u la jan ïap, pynban phin ym lah satia ban weng ïa ka jingbieit na u.

²³ To khmih bha ïa ki langbrot bad ïa ki masi jong phi katba phi lah,

²⁴ namar ka spah kam neh junom. Ym don wat ki hima ruh ki ban neh junom.

²⁵ Phi ot ïa u jyntang bad nangta ot ïa u phlang ha ki sharing lum katba u jyntang ba dang lung u dang san.

²⁶ Phi lah ban thain jaiñ na u 'saiwul jong ki langbrot jong phi bad thied jaka da ka pisa kaba phi ïoh na kaba die na ki katto katne ki blang jong phi.

²⁷ Kiba sah na ki blang kin ai ka dud na ka bynta jong phi bad ki ba-ha-ïing jong phi, bad ïa ki shakri kynthei jong phi kumjuh.