PROBERB 26 - Khasi CL Bible (BSI)

¹ Ka jingïaroh ïa uba bieit kam long kaba dei, kum ka ïor ha ka por lyiur lane u slap ha ka aïom ot.

² Ki jingtim kim lah ban pynmynsaw ïa phi lait tang haba phi dei hok ban ïoh ïa ki. Ki long kum ki sim kiba her bad ki bym ju shongneh.

³ Phi donkam ban sympat ïa u kulai, phi dei ban teh lakam ïa u kada, bad phi dei ban sympat ïa uba bieit.

⁴ Lada phi jubab ïa ka jingkylli bieit, phin long kum u briew uba bieit uba kylli ïa ka.

⁵ Ai ka jubab bieit ïa ka jingkylli bieit, bad uta uba kylli ïa ka un sngewthuh ba um long uba stad kumba u pyrkhat.

⁶ Lada phi shah ba uba bieit un sam ïa ka khubor, ka long kumba ot ïa la ki jong ki kjat; phi pan ïa ka jingjynjar.

⁷ U bieit u lah ban pyndonkam ïa ka proberb tang kumba u briew uba dkoh u lah ban pyndonkam ïa ki kjat jong u.

⁸ Kaba ïaroh ïa uno uno uba long mutlop ka long kumba teh ïa u maw ha ka jri siat sim.

⁹ U bieit uba pyndonkam ïa ka jingong kaba stad u pynkynmaw ïa phi shaphang u nongbuaid uba pyrshang ban phut ïa u shiah ha ka kti jong u.

¹⁰ U nongaikam uba khot bylla ïa uno uno uba bieit uba u ïakynduh, u long tang ban pynmynsaw kat ïa kiba ïatreilang.

¹¹ U bieit uba leh ïa kaei kaei kaba mutlop ha kaba ar sien u long kum u ksew uba leit phai sha la ka prie.

¹² U briew uba bieit mutlop tam u kham bha ban ïa uno uno uba pyrkhat ba u long uba stad haba um long kumta.

¹³ Balei ba u briew uba jaipdeh um ju mih na la ïing? Ïa kaei u sheptieng? Ïa ki sing?

¹⁴ U briew uba jaipdeh u kylla thiah ha jingthiah, um leit jngai ban ïa ka jingkhang kaba padai ha la ki kopja.

¹⁵ Katto katne ki briew ki alhia palat wat ban buh jingbam ha la ki jong ki shyntur.

¹⁶ U briew uba alhia u pyrkhat ba u kham stad ban ïa hynñiew ngut ki briew kiba lah ban ai ki nia kiba bha na ka bynta ka jingmut jong ki.

¹⁷ Kaba leit tuklar ha ka jingïania ka bym dei ka kam jong phi ka long kumba leit sha lynti bah bad kem ïa u ksew na ki shkor.

^18-19 U briew uba ïalam bakla ïano ïano bad nangta u kam ba u shu biria u long kum u briew uba lamwir uba ïalehkai bad ka tiar kaba pynïap.

²⁰ Khlem ka diengïap, ka ding ka lip noh; khlem ka jinglorni, ka jingïakajia ka kut noh.

²¹ U rnga u pynrhem ïa ka ding, ka diengïap ka pynmeh ïa ka, u nongthaw jingkulmar u pynshit ïa ki jingïamai.

²² Ka jinglorni ka long kaba bang bha; a katno ngi ieit ban nguid ïa ka!

²³ Ka jingkren bymshisha kaba buhrieh ïa kaei ba phi pyrkhat shisha ka long kum ka jingsop ïit ha u khiew khyndew uba tat-dor.

²⁴ U riewarsap u buhrieh ïa la ka jingshun ha lyndet ki ktien pynkhyllew.

²⁵ Ki lah ban sawa sngewtynnat, hynrei wat ngeit ïa u, namar ka dohnud jong u ka dap haduh rymmiang da ka jingisih.

²⁶ U lah ban buhrieh arsap ïa la ka jingisih, hynrei baroh kin ïohi ïa kiei kiei kiba bymman ba u leh.

²⁷ Ki briew kiba thaw jingriam ïa kiwei pat kin ngat ïa lade. Ki briew kiba sdang pynhap khyndew ki shah ban ïa lade.

²⁸ Phi dei ban isih ïa uno uno uba kwah ban pynmynsaw ïa u da ka jinglamler. Ka jingkren bymshisha kam wanrah ei ei hynrei ka jingpynjot.