PROBERB 25 - Khasi CL Bible (BSI)

Kiwei Ki Proberb u Solomon

¹ Hangne ki don shuh ki proberb u Solomon, ba la thoh da ki briew ha ka ïingbishar u Hesekaïah u syiem Judah.

² Ngi burom ïa U Blei namar kaei kaba u la buhrieh; ngi burom ïa ki syiem ïa kaei kaba ki batai.

³ Phim ju tip kaei u syiem u pyrkhat; ki jingmut jong u ki long sha lyndet ka jingtip jong ngi, kumba jrong ka sahit bneng ne kumba jylliew ka duriaw-bah.

⁴ Weng noh ïa ki jingbymkhuid na ka rupa, bad u nong-ohdur un pynmih ïa kaei kaei kaba itynnat.

⁵ Weng noh ïa ki nongai jingmut bymman na khmat u syiem, bad ïa ka jingsynshar jong u yn tip na ka bynta ka ïingbishar hok jong ka.

⁶ Haba phi ïeng ha khmat u syiem, wat pyrshang ban shon jur ïa u bad leh mynleh kum uba pawkhmat.

⁷ Ka kham bha ban shah khot sha ka jaka kaba kham shajrong ban ïa kaba shah ong ban ai noh ïa ka jaka jong phi ha uwei uba kham pawkhmat.

⁸ Wat kyrkieh eh ban leit sha ïingbishar halor kaei kaei kaba phi ïohi. Lada uwei pat u nongsakhi hadien u pynshisha ba phi la bakla, kaei nangta phin leh?

⁹ Lada ma phi bad la u paramarjan phi don ka jingïapher jingmut, ïakren pynbeit para ma phi bad wat pynpaw ïa kino kino ki kam barieh.

¹⁰ Lym kumta baroh kin tip ba phi long u bym lah ban set ïa kiei kiei kiba rieh bad phin ym lah ban lait na kane ka jinglehrain.

¹¹ Ka jingmut kaba la pynshai bha ka long kum ka dur oh-shrong ksiar ba la pyndait ha ka rupa.

¹² Ka jingmaham ba ai da u briew uba shemphang bha ha uno uno uba mon ban sngap ka long kaba kham kordor ban ïa ki sati ksiar ne ki jingdeng mawlynnai ba la saiñ na ka ksiar banylla.

¹³ U nonglamktien uba lah ban shaniah u ai jinghun mynsiem ïa uta uba phah ïa u, kum ka umkhriat ha ka jingshit tyrha ha ka aïom ot.

¹⁴ Ki briew kiba kular ïa kiei kiei kiba kim ju lah ban ai satia ki long kum ki lyoh bad ka lyer ki bym ai slap.

¹⁵ Ka jingïaishah ba pynkohnguh ka lah ban pynpra ïa ka jingïaleh pyrshah bakhlaiñ tam bad ka lah ban pynngeit wat ïa ki nongsynshar.

¹⁶ Wat ju bam ïa ka ngap palat ban ïa kaba phi donkam; kaba bam palat ka lah ban pynlong ïa phi ban prie.

¹⁷ Wat leit jngoh bunsien eh ïa u paramarjan jong phi, u lah ban sngewngiah ïa phi bad isih pynban ïa phi.

¹⁸ Ka jingsakhi lamler ka long kaba ma kum ka waitlam, u dieng tangon ne u khnam banep.

¹⁹ Kaba shaniah ha u briew u bym lah ban shaniah ha ka por ka jingjynjar ka long kumba pyrshang ban ktha jingbam da ka bniat kaba la khih ne ïaid da ka kjat kaba dkoh.

²⁰ Kaba rwai jingrwai ha u briew uba khuslai mynsiem ka long kumba loit noh ïa ki jaiñ jong u ha ka por khriat lane kum kaba kyllan mluh ha ka jingmong.

²¹ Lada u nongshun jong phi u thngan, bsa ïa u; lada u sliang, ai um ba un dih.

²² Phin pynlong ïa u ba la thang da ka jinglehrain bad U Trai un ainong ïa phi.

²³ Ka jinglorni ka wanrah ïa ka jingbitar kumba da shisha ka lyer na shatei ka wanrah slap.

²⁴ Kan kham bha kaba shong ha tnum ïing ban ïa kaba sah lang ha kajuh ka ïing bad ka tnga kaba wad daw.

²⁵ Khatduh eh kaba ïohsngew ïa ka khubor babha na ka ri ba sha jngai ka long kum ka jingdih ïa ka umkhriat haba phi tyrkhong bad phi sliang.

²⁶ U briew babha uba ai ha uwei pat uba sniew ka pynkynmaw ïa phi ïa ka umpohliew kaba la pynjngut ne ka pukri kaba la ai bih.

²⁷ Kaba bam than ïa ka ngap kam bha ïa phi; bad kumta ruh ka long kaba pyrshang ban ïoh palat ka jingïaroh.

²⁸ Lada phim lah ban synshar ïa ka jingbitar jong phi, phin long khlem ka jingïarap kum ka nongbah bym don kynroh, kaba lait rynghang ban shah tur ïaleh.