PROBERB 24 - Khasi CL Bible (BSI)

-19-

¹ Wat bishni ïa ki riewsniew, bad wat pyrshang ban ïalang paralok bad ki.

² Ka jingthaw kulmar ka long baroh ba ki ju pyrkhat; man la ka por ba ki ang la ki shyntur don mano re mano ban shah pynmong.

-20-

³ Ïa ki ïing la tei halor ka nongrim jong ka jingstad bad ka jingshemphang.

⁴ Hangno ba ka don ka jingtip, ïa ki kamra la pyndap pynbiang da ki jingbuh jingsat kiba kordor bad kiba itynnat.

-21-

⁵ Ban long stad ka kham bha ban ïa kaba long khlaiñ; ho-oid, ka jingtip ka kham donkam ban ïa ka jingkhlaiñ.

⁶ Nalor baroh, phi dei ban thaw ki buit kiba biang shuwa ba phin ïaleh ïa ka thma, bad katba nang bun ki jingkyntu babha ba phi ïoh, katta phin nang long kiba jop.

-22-

⁷ Ki jingkren kiba stad ki long kiba jylliew katta katta ïa u briew uba bieit ban sngewthuh. Um don ei ei ban kren haba ïa ki kam badonkam la ïatainia.

-23-

⁸ Lada phi thmu sniew borabor, phin sa ïoh nam kum u nongthaw kulmar.

⁹ Kano kano ka jingthmu ba u bieit u pyrkhat ka long pop. Ki briew ki isih ïa u briew u bym don ei ei hynrei uba rkhiebeiñ ïa kiwei.

-24-

¹⁰ Lada phi long uba tlot ha ka por shipa, phi dei uba tlot shisha.

-25-

¹¹ Wat pynslem ban pyllait ïa uno uno uba la jan shah rai pynrem bymhok.

¹² Phi lah ban ong ba kam dei ka kam jong phi, hynrei U Blei u tip bad u bishar ïa ki jingthmu jong phi. U ïai ap khmih ïa phi; u tip. Un ainong ïa phi kat kum kaei kaba phi leh.

-26-

¹³ Ko khun, bam ïa ka ngap, ka long kaba bha. Bad kumba ka ngap na ka rewngap ka long kaba thiang ha u thylliej jong phi,

¹⁴ phi lah ban sngewskhem ba ka jingstad ka long kaba bha ïa ka mynsiem. To ïoh ïa ka jingstad bad ka lawei jong phi kan long kaba phyrnai.

-27-

¹⁵ Wat long kum ki riewsniew kiba thmu ban lute ïa u briew uba hok ne ban knieh noh ïa ka ïing jong u.

¹⁶ Kam pher katno sien uba hok u kyllon, borabor un khie pat; hynrei ka jingjot ka pynjot ïa ki bymman.

-28-

¹⁷ Wat sngewkmen haba u nongshun jong phi u ïakynduh ïa ka jingjot, bad wat lehkmen haba u jynthut.

¹⁸ U Trai u tip lada phi long uba rkhiebeiñ. Bad um sngewbha ïa kata; bad nangta u lah ban ym pynshitom ïa u.

-29-

¹⁹ Wat ai ba ki briew basniew kin pynkhuslai ïa phi; wat bishni ïa ki.

²⁰ U riewsniew um don ïa ka lawei — ym don ei ei ba un peit sha khmat.

-30-

²¹ Ko khun, tiengburom ïa U Trai bad burom ïa u syiem. Wat leh ei ei bad ki briew kiba ïeng ïaleh pyrshah ïa ki;

²² kum kita ki briew kin shah pynjot ha ka shikhyllipmat. Hato phi sngewthuh ba ka jingjot kaba kumno kan lah ban jia na U Blei ne na u syiem?

Shuh shuh ki jingkren jong kiba stad

²³ Ki briew kiba stad ki don ruh ban ong ïa kine kiei kiei: Ka long ka bymdei ïa u nongbishar ban leh shiliang khmat.

²⁴ Lada u rai pynrem ïa u briew uba lui lui, un long uba la tim bad isih da baroh.

²⁵ Ki nongbishar kiba pynshitom ïa uba shah pynrem, kin manbha bad kin ïoh ka nam babha.

²⁶ Ka jubab kaba hok ka long ka dak ïa ka jingïalong paralok kaba shisha.

²⁷ Wat tei ïa ka ïing jong phi bad pynskhem ïa ka longïing tad haduh ban pynbiang ïa ki lyngkha jong phi, bad phin thikna ba phi lah ban kamai ha ka jingim.

²⁸ Wat ïeng sakhi pyrshah ïano ïano khlem ka daw kaba dei, ne wat ong ïa kaei kaei ka ban ïalam bakla shaphang jong u.

²⁹ Wat ong, “Ngan leh ïa u kumba u la leh ïa nga! Ngan leh kylliang kumba u la leh!”

³⁰ Nga ïaid lyngba ki lyngkha bad ki bri sohwaiñ jong u briew uba alhia, uba mutlop.

³¹ Ki long kiba dap da ki bniap shiah bad mih da ki ñiut suda. Ka kynroh maw baroh sawdong ka la twa.

³² Nga peit ïa kane, nga la pyrkhat shaphang jong ka, bad nga ïoh ka jinghikai na ka:

³³ Dem kai shipor bad thiah lada phi sngewkwah. Kli ïa la ki kti ban jahthait shiphang;

³⁴ hynrei katba phi dang ïohthiah, ka jingduk kan tur ïaleh ïa phi kum u nongtuh uba la kieng atiar.