PROBERB 23 - Khasi CL Bible (BSI)

-6-

¹ Haba phi shong bam bad u briew uba donburom, da buh jingmut ba u long uei.

² Lada phi dei uba khlaiñ bam, da synshar bha ïa lade.

³ Wat kwah lalot ïa ki jingbam bang ba u pynkhreh; u lah ban pyrshang ban riam ïa phi.

-7-

⁴ To long uba stad bha ym ban ym pyrshang ban pynpaw ïa lade ban ïoh spah.

⁵ Ka pisa jong phi kan jah noh tang ha ka shikhyllipmat, kum kaba don thapniang bad ka her noh kum ka pukni.

-8-

⁶ Wat ïabam ha ka miej u briew uba khapnap lane uba kwah lalot ïa ki jingbam bang ba u pynkhreh.

⁷ “To wan bad bam shuh sa khyndiat,” u ong, hynrei um mut kumta. Kaei kaba u pyrkhat ka long kaei kaba u long da shisha.

⁸ Phin hap prie noh ïa kaba phi la bam, bad baroh ki ktien pynroh jong phi kin sep-ei.

-9-

⁹ Wat pyrshang ban kren tipbriew ha uba bieit; um lah ban ïaroh ïa ka.

-10-

¹⁰ Wat pynkynriah ïa u mawpud uba rim lane knieh ïa ka khyndew ba long trai da ki khunswet.

¹¹ U Trai u long u nongkyrshan uba donbor jong ki, bad un ïasaid ïa ka kam jong ki pyrshah ïa phi.

-11-

¹² To shahshkor bha ïa u nonghikai jong phi bad pynleit jingmut ïa baroh katba phi lah.

-12-

¹³ Wat pyntud ban sneng pynbeit ïa u khynnah. Ka jingsympat kaba dei kan ym pynïap ïa u.

¹⁴ Ha ka jingshisha, ka lah ban pyllait ïa ka jingim jong u.

-13-

¹⁵ Ko khun, lada phi long uba stad, ngan sngewkmen shikatdei eh.

¹⁶ Ngan sngewsarong haba ngan ïohsngew ba phi kren ïa ki ktien ka jingstad.

-14-

¹⁷ Wat sngewbishni ïa ki briew kiba leh pop, ai ba ka jingtiengburom ïa U Trai kan long ha khmat ka jingim jong phi.

¹⁸ Lada ka long kumta, phi don ka lawei kaba phyrnai.

-15-

¹⁹ To shahshkor, ko khun jong nga, long uba stad bad pynleit jingmut bha ha ka lynti ka ba phi im.

²⁰ Wat ïalang lok bad ki briew kiba kyrni dih waiñ lane bad kiba lalot jingbam.

²¹ Kiba dih buaid bad kiba bam lalot kin kylla duk. Lada baroh kaba phi leh ka long tang ban bam bad thiah, shen phin sa phong da ki jaiñjot.

-16-

²² To shahshkor ïa la u kpa; khlem ma u phin ym ïoh jingim. Haba ka kmie ka la tymmen, pyn-i ha ka ïa ka jingïaroh jong phi.

²³ Ka jingshisha, ka jingstad, ka jingtip bad ka jingshemphang — kine ki long kiba kordor ba phin siew, hynrei kiba shongdor rem ïa phi ban die.

²⁴ U kpa jong u briew uba hok u don ka daw babiang ban kmen. Phi lah ban sngewsarong ha u khun uba stad.

²⁵ Pynlong ïa la u kpa bad ïa la ka kmie ban sarong na ka bynta jong phi; ai ïa ka kmie jong phi ïa kata ka jingkmen.

-17-

²⁶ Ko khun, to shahshkor bha, bad shah ba ka jingim jong nga kan long ka nuksa ïa phi.

²⁷ Ki nuti bad ki kynthei lyngkar ki long ka jingriam kaba shyrkhei.

²⁸ Ki ap ïa phi kum ki nonglute bad ki long ka daw ïa kiba bun ki rangbah ban ym long ïaineh.

-18-

²⁹ To pyn-i ha nga ïa uno uno uba dih kyrni, uba pyrshang katto katne ka jingdih bathymmai, bad nga pyn-i ïa phi ïa uwei uba kordit bad sngewsih na ka bynta ïa lade, uba pynmih jingeh borabor, bad uba khñium borabor.

³⁰ Ki khmat jong u kiba saw snam, bad u don ki jingmong khlem daw.

³¹ Wat ai ba ka waiñ kan pynshoi ïa phi, wat la ka long kaba saw hain hain, wat la ka phyrnai ha ka khuri, bad ka hiar jem jai.

³² Ha ka step kaba bud phin sngew kumba phi la shah puh da u 'seiñïong.

³³ Ki dur khyllah kin paw ha ki khmat jong phi, bad phin ym lah ban pyrkhat ne kren shai.

³⁴ Phin sngew kumba phi don halor ka duriaw-bah, phi ïohpang duriaw, shah pynshad kynting shajrong ha ka jingshah pynkhih ka liengbah.

³⁵ “Ka lah ban long ba nga la shah tied,” phin ong; “ka lah ban long ba nga la shah tangon, hynrei ngam kynmaw ïa ka. Balei ngam shym lah ban khie? Nga donkam ban ïoh jingdih biang.”