PROBERB 22 - Khasi CL Bible (BSI)

¹ Lada phi dei ban jied hapdeng ka nam babha bad ka spah kaba khraw, jied ïa ka nam babha.

² Kiba riewspah bad kiba duk ki don ïa kane kajuh, U Trai u pynlong ïa ki baroh ar.

³ Ki briew kiba sngewthuh ki ïohi ïa ka jingma ba ka wan bad ki kynriah na ka, hynrei u briew u bym pyrkhat un ïaid beit ha ka bad un babe kylla hadien.

⁴ To kohnguh ïa U Trai, da kaba pynrit, bad phin ïoh ïa ka spah, ka burom, bad ka jingim kaba jlan.

⁵ Lada phi ieit ïa la ka jingim, phet krad na ki jingriam kaba pynngat ïa u bymman ha ka lynti ïaid.

⁶ Hikai ïa u khynnah kumno u dei ban im, bad un kynmaw ïa ka baroh shi rta ka jingim jong u.

⁷ Ki briew kiba duk ki long ki mraw jong u briew bariewspah, pan kylliang pisa bad phin long u mraw jong u nongai ram.

⁸ Lada phi bet ïa ki symbai ka jingbymhok, ka jingpynjot kan mih, bad ka jingbanbeiñ jong phi ïa kiwei kan kut noh.

⁹ To long sbun bad ïasam ïa ka jingbam jong phi bad kiba duk, phin long kiba la kyrkhu na ka bynta kata.

¹⁰ Phet noh na u briew uba shukor, bad nangta yn ym don shuh ki jingïakajia, ka jingïamai lane ka jingsin kyrteng.

¹¹ Lada phi ieit ïa ka jingkhuid ka dohnud bad ka jingkren badonburom, u syiem un long u paralok jong phi.

¹² U Trai u khmih ba ïa ka jingshisha la ri kyndong da kaba pynpulom ïa ki ktien jong ki nonglamler.

¹³ U briew uba alhia u shong hapoh ïing; u ong ba u sing u lah ban ïoh ïa u lada u mih shabar.

¹⁴ Ka jingklim ka long ka jingriam — ka pynngat ïa kito kiba U Trai u bitar.

¹⁵ Ki khynnah na la ka tynrai ki leh kiei kiei kiba ibieit, khlem sumar, hynrei ka jingsneng sympat kaba bha ka hikai ïa ki kumno ban long.

¹⁶ Lada phi ai sngewbha sha ki briew kiba riewspah lane banbeiñ ïa kiba duk ban ïoh riewspah, phin long uba duk ïa lade.

Laiphew tylli ki jingkren jong ki riewstad

¹⁷ To shahshkor, bad ngan hikai ïa phi ïa kaei ba ki riewstad ki la ong. Pule bniah ïa ki jinghikai jong ki,

¹⁸ bad phin long kiba kmen lada phin kynmaw ïa ki bad phi lah ban kren ïa ki baroh.

¹⁹ Nga kwah ïa phi ba phin buh ïa ka jingshaniah jong phi ha U Trai; kata ka long balei ba nga ïai ïathuh ïa ki ha phi mynta.

²⁰ Nga la thoh laiphew tylli ki jingkren na ka bynta jong phi. Ki kynthup ïa ka jingtip bad ka jingkyntu babha,

²¹ bad kin hikai ïa phi kaei ka jingshisha ka long. Nangta haba la phah ïa phi ban shem ïa ka, phin wanrah ïa ka jubab kaba dei.

-1-

²² Wat shim kabu ïa kiba duk tang namar ba phi lah; wat shim kabu ïa kito kiba ïeng khlem jingïarap ha ka ïingbishar.

²³ U Trai un ïasaid ïa ka kam jong ki na ka bynta jong ki, bad un byrngem ïa ka jingim jong uno uno uba byrngem ïa ki.

-2-

²⁴ Wat ïalong paralok bad ki briew kiba domriang, kiba khong khong.

²⁵ Phi lah ban bud ïa ki jingmlien jong ki bad phin ym lah shuh ban kylla.

-3-

²⁶ Wat kular ban kitkhlieh na ka bynta ki ram jong kiwei pat.

²⁷ Lada phim lah ban siew, kin knieh noh wat ïa ka jingthiah jong phi ruh.

-4-

²⁸ Wat ju pynkynriah ïa u mawpud ba ki kpa tymmen jong phi ki la thung naduh mynbarim.

-5-

²⁹ Pyni ha nga ïa u briew uba leh ïa ka kam babha, bad ngan pyn-i ha phi ïa u briew uba kham bha ban ïa ka kynhun babun bad babit tam jong ki syiem.