PROBERB 21 - Khasi CL Bible (BSI)

¹ U Trai u pynïaid ïa ka jingmut jong u syiem kham suk kumba u pynïaid ïa ka lynti ka wahduid.

² Phi lah ban tharai ba baroh kat kaba phi leh ka long kaba dei, hynrei kynmaw ba U Trai u bishar ïa ki jingthmu jong phi.

³ Leh ïa kaei kaba dei bad kaba beit; kaba kham pynsngewbha ïa U Trai ban ïa kaba wallam sha u ïa ki jingkñia.

⁴ Ki briew kiba sniew ki shah synshar ha la ka hangamei bad ka jingsngewmeng, bad kane ka long pop.

⁵ Da thmu bha bad phin ïoh kyrhai; lada phi leh kyrkieh palat phin nym dap biang.

⁶ Ka spah ba phi ïoh da ka jingbymhok shen kan jah noh; hynrei ym ha shuwa ba kan ïalam ïa phi sha ki tyngam jong ka jingïap.

⁷ Ïa ki bymman la pynrem da ka jingleh jubor jong ki hi; ki kyntait ban leh ïa kaei kaba dei.

⁸ Ki briew kiba pop ki ïaid ka lynti kyllaiñ; hynrei kiba lui lui ki ïaid ha kaba beit.

⁹ Ka kham bha kaba sah ha tnum ïing ban ïa kaba sah lang bad ka tnga kaba bunktien.

¹⁰ Ki briew ba-bymman ki kwah borabor ïa kaba sniew; kim don jingisynei ïano ïano ruh.

¹¹ Haba uno uno u sngewsarong u ïoh ïa la ka jingpynshitom, wat u briew u bym don ka bor pyrkhat u ïoh jinghikai. Uta uba stad un nang na kata kaba la hikai ïa u.

¹² U Blei, uta uba hok, u tip ïa kaei kaba jia ha ki longïing ki riewbymman, bad un wallam ïa ki bymman sha ka jingjot jingpra.

¹³ Lada phi kyntait ban shahshkor ïa ka jingud kiba duk, ïa ka jingkyang jingïarap jong phi hi yn ym don ba ïohsngew.

¹⁴ Lada uno uno u bitar ïa phi, ka jingai sngewbha kaba ai ha kaba rieh ka pynjem jai ïa u.

¹⁵ Haba la pyndep ïa ka jingbishar hok, ki briew kiba bha ki kmen, hynrei ki briew kiba sniew ki sngewsih.

¹⁶ Ka jingïap ka ap ïa uta uba ïaid sakma na ka lynti ka jingshemphang.

¹⁷ Kaba byrngia ha ki jingim pahuh, ka waiñ bad ka jingbam lutphut kin ym pynlong ïa phi uba riewspah.

¹⁸ Ki bymman ki wallam ha lade ka jingjynjar ïa kaba ki pyrshang ban pynjia ha ki briew kiba bha.

¹⁹ Ka kham bha bashong ha ka ri shyiap ban ïa kaba bad ka tnga kaba bunktien bad ïai thnum.

²⁰ Ki briew kiba stad ki shong ha ka spah bad ka jingim pahuh hynrei ki briew kiba bieit ki pynlut noh ïa ka pisa tang shu ïoh ïa ka.

²¹ Lehsbun bad lehhok bad phin im slem; kiwei kin burom ïa phi bad kin lehbha ïa phi.

²² U rangbah shipai uba stad u lah ban jop ïa ka nongbah kaba la ïada da ki briew kiba khlaiñ, bad pynkhyllem ïa ki kynroh ha kiba ki shaniah.

²³ Lada phi kwah ban lait na ka jingjynjar to sumar ïa kaei kaba phi ong.

²⁴ Pyni ha nga ïa u briew uba sarong bad ngan pyn-i ha phi ïa u briew uba hangamei, uba sarong bad u bym ju kheiñ briew.

²⁵ U briew uba jaipdeh uba kyntait ban trei u shu pynïap ei ïa lade; baroh kaba u leh ka long ban pyrkhat shaphang kaei ba u kwah ban don.

²⁶ U briew uba hok, pat, u lah ban ai, bad ban ai kylluid.

²⁷ U Trai u ijli ïa kata, haba ki briew ba-bymman ki ai ki jingkñia ha u, khamtam lada ki leh ïa kata na ki jingthmu bymman.

²⁸ Ym lah ban ngeit ïa ka jingphla shem mynsiem jong uba lamler, hynrei ka ktien jong uno uno uba da pyrkhat bha yn pdiang.

²⁹ Ki briew kiba hok ki skhem ha lade; ki bymman ki shu leh mynleh katba ki lah.

³⁰ Ka jingstad briew, ka jingproh jabieng, ka jingsngewthuh — kim lah ïarap ei ei lada U Trai u long pyrshah ïa phi.

³¹ Phi lah ban pynkhreh ïa ki kulai na ka bynta ka thma, hynrei dei U Trai uba ai ka jingjop.