PROBERB 20 - Khasi CL Bible (BSI)

¹ Kaba dih kyiad palat ka pynlong ïa phi uba bunktien bad uba bieit. Ka long ka jingijli ban buaid.

² To sheptieng ïa u syiem uba bitar kumba phi leh ïa u sing bakyrhuh; kaba pynbitar ïa u ka long kaba pynïap ïa lade.

³ Uno uno uba bieit u lah ban sdang ïa ki jingïania; kaba donburom ka long ban kiar na kine.

⁴ U nongrep uba jaipdeh palat ban lur ïa ki lyngkha jong u ha ka por kaba biang un ym ïoh ei ei ïa ka ban ot.

⁵ Ki jingpyrkhat jong u briew ki long kum ka um ha ka pukri kaba jylliew, hynrei uba don ka jingïohi jngai u lah ban tong noh ïa ki shabar.

⁶ Baroh ki kren shaphang katno u long uba kohnguh bad baïaineh, hynrei shu pyrshang ban wad ïa uno uno uba long kumta!

⁷ Ki khun ki long kiba bha kupar lada ki don u kpa uba beit bad uba leh ïa kaei kaba dei.

⁸ U syiem u shong ban bishar bad u tip ïa kaba sniew haba u ïohi ïa ka.

⁹ Hato don uba lah ban ong da shisha ba ka jingïatiplem jong u ka khuid, ba u la lah ban iehnoh ïa ka pop jong u?

¹⁰ U Trai u isih ïa ki briew kiba pyndonkam da ki tarajur bad mawthew bymhok.

¹¹ Wat u khynnah u pynpaw ïa kaei kaba u long da kaei kaba u leh; phi lah ban ong lada u long uba hok bad uba bha.

¹² U Trai u la ai ïa ngi ki khmat ban peit da ki bad ïa ki shkor ban sngap da ki.

¹³ Lada phi pynlut ïa ka por ha kaba thiah, phin long uba duk. Ïai trei shitom bad phin ïoh kyrhai ka bam.

¹⁴ U nongthied borabor u khñium ba ka dor ka rem eh, hynrei nangta u leit noh bad u kren sarong ba u la ïoh da kaba ïadait dor.

¹⁵ Lada phi tip shaphang kaei kaba phi kren, phi don ei ei kaba kham kordor ban ïa ka ksiar ne ki mawkordor.

¹⁶ Uno uno uba mutlop palat kat ban kular ban bahkhlieh ïa ki ram jong u nongwei u dei ban don la ki jingdon jingem ban buh bynda.

¹⁷ Kaei kaba phi ïoh da jingbymhok phi lah ban lehkmen kum ka jingbam babha tam, hynrei shen kan long kum u shyiap ba-dap ha ka shyntur.

¹⁸ Pynïoh ïa ka jingai jingmut kaba bha bad phin ïoh jingjop; wat leit tur thma khlem da don ka dur pynkhreh.

¹⁹ Ka jinglorni kam lah ban set ïa kaba buhrieh. Kiar na ki briew kiba bunktien palat.

²⁰ Lada phi tim ïa la ki kmie ki kpa, ka jingim jong phi kan kut kum ka sharak kaba lip noh ha kaba dum.

²¹ Kaba ïoh ïa ka spah da kaba suk eh, tang khyndiat eh kan pynbha ïa phi.

²² Wat shim ha lade ban siew kylliang ïa kaba sniew. Shaniah ha U Trai bad un pynlong ïa ka kaba dei.

²³ U Trai u isih ïa ki briew kiba pyndonkam da ki tarajur bad jingthew bymhok.

²⁴ U Trai u la thmu ïa ka lynti jong ngi; kumno te uno uno u lah ban sngewthuh ïa ka phang ba ka jingim jong u ka thew?

²⁵ Pyrkhat sani bha ha shuwa ba phin kular ïa ka jingainguh sha U Blei. Phi lah ban babe ïa ka hadien.

²⁶ U syiem uba stad un shem uno uba leh ïa ka bymdei, bad un pynshitom ïa u khlem isynei.

²⁷ U Trai u la ai ha ngi ïa ka jingpyrkhat bad ka jingïatiplem; ngim lah ban rieh na lade.

²⁸ U syiem un ïai don ha ka bor katba ka jingsynshar jong u ka dang long kaba khuid, kaba hok, bad kaba biang.

²⁹ Ngi itynnat ïa ka jingkhlaiñ ka jinglong samla bad ngi burom ïa u ñiuhlieh ka jinglong tymmen.

³⁰ Teng teng ka donkam ban mad ïa ka jingshem kaba kthang ha ka jingim ban pynlong ïa ngi ban kylla ïa ki lynti jong ngi.