PROBERB 2 - Khasi CL Bible (BSI)

Ki bainong jong ka jingstad

¹ Ko khun, to sngewthuh ïa kaei ba nga hikai ïa phi, bad wat klet ïa kaei kaba nga ïathuh ïa phi ban leh.

² To shahshkor ïa ka jingstad bad pyrshang ban shemphang ïa ka;

³ ho-oid, kyrpad ban ïoh ïa ka jingtip, bad kyrpad jur ban ïoh ïa ka jingshemphang.

⁴ Wad ïa ka kumba phi wad ïa ka rupa lane ïa kano kano ka spah ba la buhrieh.

⁵ Lada phi leh kumta, phin sa tip ka mut aïu ban sheptieng ïa U Trai bad phin sa lah ban sngewthuh shaphang U Blei.

⁶ Dei U Trai uba ai ïa ka jingstad; na u ka wan ka jingtip bad ka jingshemphang.

⁷ U ai jingïarap bad jingïada ïa kiba hok, ki briew kiba im hok.

⁸ U ïada ïa kito kiba lehhok ïa kiwei pat, bad u ïada ïa kito kiba aiti ha u.

⁹ Lada phi shahshkor ïa nga, phin sa tip kaei kaba dei, kaba hok, bad kaba ïaid beit. Phin sa tip ïa kaei kaba phi dei ban leh.

¹⁰ Phin sa long uba stad, bad ka jingtip jong phi kan ai jingkmen ïa phi.

¹¹ Ka jingsian bad ka jingshemphang jong phi kin ïada ïa phi

¹² bad khang ïa phi na kaba leh ïa ka bymdei. Kin sumar ïa phi na ki briew kiba pynkhih jingkulmar da kaei kaba ki kren —

¹³ ki briew kiba iehnoh ïa ka jingim hok ban im ha ka jingdum ka pop,

¹⁴ ki briew kiba sngewtynnat ha kaba leh kam sniew bad kiba lehkmen ha ki kam bymman ki bym don jingmut,

¹⁵ ki briew kiba kynriang ki bym lah ban shaniah.

¹⁶ Phi lah ban pyllait ïa lade na kano kano ka kynthei awria kaba pyrshang ban pynngop ïa phi da ki ktien jali ja-um jong ka,

¹⁷ kaba iehnoh ïa la u jong u tnga bad klet ïa la ka jutang kaba kyntang.

¹⁸ Lada phi leit sha ka ïing jong ka, phi ïaid ha ka lynti sha ka jingïap. Ban leit shata ka long ban tur sha ka pyrthei kiba ïap.

¹⁹ Ym don uwei ruh uba leit sha ka uba lah ban wan phai. Un ym lah shuh ban wan phai pat sha ka lynti ka jingim.

²⁰ Kumta phi dei ban bud nuksa ïa ki briew kiba bha bad im ka jingim kaba hok.

²¹ Ki briew kiba hok — ki briew kiba ïaid beit — kin ïoh shongsah ha kane ka ri jong ngi.

²² Hynrei U Blei un beh noh ïa ki riewbymman na ka ri, bad rat dyngkhong ïa ki nongpop na ka kum ïa ki jingthung na ka khyndew.