PROBERB 19 - Khasi CL Bible (BSI)

¹ Ka kham bha ban long uba duk hynrei uba beit ban ïa kaba long u bieit uba shukor.

² Ka jingshitrhem khlem ka jingtip kam long kaba bha; ka jingbymïaishah kan pynïoh ha phi ïa ka jingjynjar.

³ Don ki briew kiba pynjot ïa lade da ki kam ba-mutlop jong ki hi bad nangta ki kynnoh ïa U Trai.

⁴ Borabor kiba riewspah ki ïakynduh ïa ki paralok kiba thymmai, hynrei kiba duk kim lah ban bat ïa kiba khyndiat ngut kiba ki don.

⁵ Lada phi lamler ha ka ïingbishar, phin shah pynshitom — yn ym don jingpyllait.

⁶ Baroh ki pyrshang ban shem sngewbha bad ki briew kiba khraw; baroh ki kob ïa ka jingïadei paralok bad kito kiba lah ban pynsngewbha.

⁷ Wat ki hynmen ki para jong u briew uba duk kim long jingmyntoi ïa u; kam pher ba um don paralok. Kam pher katno u pyrshang tyngeh, um lah ban ïoh paralok.

⁸ Lehbha ïa lade bad wad jinghikai kat kaba phi lah; nangta kynmaw ïa kaei kaba phi ïoh jinghikai bad phin manbha.

⁹ Ym don uba kren lamler ha ka ïingbishar u ban ïohlait na ka jingpynshitom; u la shah pynrem.

¹⁰ Kiba bieit kim dei ban im ha ka pahuh pahai, bad ki mraw kim dei ban synshar halor ki briew badonburom.

¹¹ Lada phi long uba shemphang, phin lah ban kan ïa la ka jingbitar. Haba uno uno u leh bakla ïa phi, ka dei ka jinglong bakhraw ban leh klet ïa ka.

¹² Ka jingbitar u syiem ka long kum ka jingkyrhuh u sing, hynrei ka jingsngewbha jong u ka long kum u slap ba pdiang hun.

¹³ U khun uba mutlop u lah ban wallam ka jingpynjot ha la u kpa. Ka tnga kaba bunktien ka long kum ka um kaba jaw jrop shi jrop.

¹⁴ U briew u lah ban ïohpateng ïa ka ïing bad ka spah na la ki kmie ki kpa, hynrei tang U Trai uba lah ban ai ha u ïa ka tnga kaba shemphang.

¹⁵ Leh jaipdeh lada phi kwah; ïai thiah sah, hynrei phin shahthngan.

¹⁶ Sumar ïa ki hukum U Blei bad phin im slem; lada phi ñiewbeiñ ïa ki, phin ïap.

¹⁷ Haba phi ai ha kiba duk, ka long kumba phi ai kylliang sha U Trai, bad U Trai un sa siew pat ïa phi.

¹⁸ Pynbeit ïa la ki khun katba ki dang lung ban shah hikai. Lada phim leh kumta, phi ïarap ïa ki ban pynjot da ki hi.

¹⁹ Lada don uno uno uba bitar shen, to ai ba un shim ïa ki soh ba mih na kata. Lada phi pyllait ïa u na ka jingjynjar shisien, phin sa hap leh biang.

²⁰ Lada phi shahshkor ïa ka jingai jingmut bad phi kloi ban shah hikai, ha kawei ka sngi phin long uba stad.

²¹ Ki briew ki lah ban thmu shibun kiei kiei, hynrei ïa ka mon U Trai yn hap ban pyndep.

²² Ka long ka jingjahburom ban long uba khwan myntoi; ki briew kiba duk ki kham bha ban ïa ki nongshukor.

²³ Kohnguh ïa U Trai bad phin ïoh im slem, uba sngewhun bad uba shongshngain na ka jingma.

²⁴ Don ki briew kiba da jaipdeh wat ban tian jingbam ha la ki jong ki shyntur.

²⁵ Ïa ka jingsngewmeng dei ban pynshitom, khnang ba ki briew ki bym da sngewthuh bha kin ïoh jinghikai. Lada phi long uba stad, phin ïoh jinghikai haba pynbeit ïa phi.

²⁶ Tang u briew uba khlemrain bad bym donburom un lehbeiñ ïa la u kpa lane beh noh ïa la ka kmie na ka ïing jong u.

²⁷ Ko khun, haba phi sangeh ban shah hikai, shen phin iehnoh noh ïa kaei kaba phi la tip mynshuwa.

²⁸ Kam don jingbishar hok ha kaba u sakhi u thmu ban pynmong ïano ïano. Ki riewbymman ki ieit ïa ka jingmad kaba sniew.

²⁹ U bieit uba sngewmeng u thikna ban ïoh ïa ka jingshah sympat.