PROBERB 18 - Khasi CL Bible (BSI)

¹ Ki briew ki bym ïadei bad kiwei ki pyrkhat tang ïa lade; kin ym ïahap bad kaei kaba baroh ki tip ba ka long kaba dei.

² Uba bieit um suidñiew la u sngewthuh ne em ïa kano kano; baroh kaba u kwah ban leh ka long ban pynpaw katno u long uba sian.

³ Ka pop bad ka jinglehrain ki ïaid lang. Pynjah noh ïa ka burom jong phi, bad phin ïoh ïa ka jingshah krenbeiñ ha ka jaka jong ka.

⁴ Ki ktien jong u briew ki lah ban long ka umpohliew ka jingstad, kaba jylliew kat ki duriaw-bah, kaba sngur kum ki wahduid batuid.

⁵ Kam long kaba dei ban pynksan ïa uba la rem bad ban khang ïa uba lui lui na kaba ïohpdiang ïa ka jingbishar hok.

⁶ Haba uno uno uba bieit u sdang ïa ka jingïania, u pan kwah ïa ka jingshah sympat.

⁷ Haba uba bieit u kren, u pynjot ïa lade; u ngat ha ka jingriam jong ki ktien jong u hi.

⁸ Ka jinglorni ka bang palat — katno ngi sngewieit ban nguid tylli ïa ka!

⁹ U briew uba jaipdeh u long uba sniew kum uno uno uba pynjot.

¹⁰ U Trai u long kum ka kut baskhem, sha kaba kiba hok ki lah ban leit bad sngewshngain.

¹¹ Ki briew kiba riewspah, pynban, ki mutdur ba ka spah jong ki ka ïada ïa ki kum ki kynroh bajrong bakhlaiñ sawdong ïa ka nongbah.

¹² Ym don uno uno uba ïoh burom lymda u long uba sngewrit; ki briew kiba meng ki don ha ka lynti sha ka jingjot.

¹³ Da sngap ha shuwa ba phin jubab. Lada phim leh kumta, phi long uba bieit bad shah rkhiebeiñ.

¹⁴ Ka mon jong phi ban im kan kyrshan ïa phi haba phi pang, hynrei lada phi duh ïa ka, ka jingkyrmen jong phi kaba sah ka la jah noh.

¹⁵ Ki briew kiba shemphang ki long borabor kiba thrang bad ba kloi ban shah hikai.

¹⁶ Hato phi kwah ban ïakynduh ïa u briew uba khraw? Rah sha u ka jingai sngewbha bad kan pynsuk ïa phi.

¹⁷ U briew uba nyngkong ban kren ha ka ïingbishar borabor u sngewdei tad haduh ba uba ïaleh pyrshah u sdang ban buh jingkylli ïa u.

¹⁸ Lada ar ngut ki briew kiba donbor ki ïa-pyrshah uwei ïa uwei ha ka ïingbishar, kaba kynting sbai kan lah ban ai ïa ka rai.

¹⁹ Ïarap ïa la u para bad un ïada ïa phi kum ka kynroh kaba khlaiñ jong ka nongbah, hynrei lada phi ïakajia bad u, un khang khyrdep ki jingkhang jong u ïa phi.

²⁰ Phin hap ban im lem bad ki soh kiba mih na baroh kaba phi kren.

²¹ Kaei kaba phi ong ka lah ban ri ïa ka jingim lane pynjot ïa ka; te phi dei ban pdiang ïa ki soh kiba mih na ki ktien jong hi.

²² Haba shem ïa ka tnga, phi shem ïa kaei kaba bha; ka pynpaw ba U Trai u lehbha ïa phi.

²³ Haba u briew uba duk u kren, u hap kyrpad donakor, hynrei haba u briew uba riewspah u jubab, u kren khor.

²⁴ Ki don ki jingïadei paralok ki bymneh, hynrei ki don ki paralok kiba lah ban shaniah palat ban ïa ki hynmen ki para.