PROBERB 16 - Khasi CL Bible (BSI)

¹ Ngi lah ban don ki jingthmu, hynrei khatduh ka rai ka dei jong U Blei.

² Phi lah ban pyrkhat ba baroh kaba phi leh ka long kaba dei, hynrei dei U Trai uba bishar ïa ki jingthmu jong phi.

³ Kyrpad na U Trai ban kyrkhu ïa ki jingthmu jong phi, bad phin ïoh jingjop ha kaba pyntreikam ïa ki.

⁴ Baroh kiei kiei kiba U Trai u la thaw ki don la ki jingkut; bad ka jingkut jong u bymman ka long ka jingjot.

⁵ U Trai u isih ïa baroh kiba leh meng; da lei lei un ym shah ba kin lait na ka jingpynshitom.

⁶ Long kiba kohnguh bad kiba ïaineh, bad U Blei un map ïa ka pop jong phi. To kohnguh ïa U Trai bad kaba sniew kan ym jia ha phi.

⁷ Haba phi pynsngewbha ïa U Trai, phi lah ban pynkylla paralok ïa ki nongshun jong phi.

⁸ Ka kham bha ban don khyndiat, kaba la kamai da ka hok, ban ïa kaba ïoh shibun, ba la lum da ka jingbymhok.

⁹ Phi lah ban don la ki jingthmu, hynrei dei U Blei uba ïalam ïa ki jingpyntreikam jong phi.

¹⁰ U syiem u kren da ka iktiar blei; ki rai jong u borabor ki long kiba dei.

¹¹ U Trai u kwah ba ki tarajur bad ki mawthew ki dei ban long kiba beit bad baroh ka jingïadie ïathied kan long kaba hok.

¹² Ki syiem kim lah shah ïa ka jingsniew, namar ka jingbishar hok ka dei kaba pynlong ïa ka jingsynshar kaba khlaiñ.

¹³ U syiem u kwah ban ïohsngew ïa ka jingshisha bad u sngewbha ïa kito kiba kren ïa ka.

¹⁴ U briew uba stad un pyrshang ban ïai pynkmen ïa u syiem; lada u syiem u bitar, don uba lah ban ïap.

¹⁵ Ka jingshem sngewbha u syiem ka long kum ki lyoh kiba wanrah slap ha ka por pyrem — don ka jingim hangta.

¹⁶ Ka kham bha — nang kham bha — ban don ka jingstad bad ka jingtip ban ïa ka ksiar bad ka rupa.

¹⁷ Kito kiba bha ki ïaid na ka lynti kaba lait na kaba sniew; te khmih shano ba phi leit — ka lah ban pyllait ïa ka jingim jong phi.

¹⁸ Ka jingsarong ka ïalam sha ka jingjot, bad ka jingsngewmeng sha ka jingkyllon noh.

¹⁹ Ka kham bha ban long uba sngewrit bad sah duk ban ïa kaba long uba meng bad ïoh bynta na ka jinglute jong ki.

²⁰ Pynleit jingmut ïa kaei ba la hikai ïa phi, bad phin ïoh manbha; shaniah ha U Trai bad phin long uba kmen.

²¹ U briew uba stad, uba rangbah jingmut u long uba paw ha ka jingshemphang jong u. Katba nang sngewtynnat ki ktien ba u kren, katta u nang lah ban pynkohnguh.

²² Ka jingstad ka long ka umpohliew jong ka jingim ha kiba stad, hynrei kaba pyrshang ban ai jinghikai ïa kiba mutlop ka long tang ka jingpynlut kai ïa ka por.

²³ Ki briew kiba shemphang ki da pyrkhat ha shuwa ban kren; ki lah ban pynkohnguh da kaei kaba ki ong.

²⁴ Ki ktien sbun ki long kum ka ngap — kaba thiang ïa ka jingmad bad kaba bha ïa ka jingkoit jingkhiah.

²⁵ Kaei kaba phi pyrkhat ba ka long ka lynti kaba dei ka lah ban ïalam sha ka jingïap.

²⁶ Ka jingkwah bam jong u nongbylla sngi ka pynlong ïa u ban kham trei shitom, namar u kwah ban pynhun ïa la ka jingthngan.

²⁷ Ki briew kiba sniew ki wad ïa ki lynti ban pynmynsaw ïa kiwei; wat ki ktien jong ki, ki long kiba thang da ka jingsniew.

²⁸ Ki riewbymman ki pynphriang ïa ki ktien lorni; ki pynjynjar bad pynpra ïa ka jingïadei paralok.

²⁹ Ki briew kiba leh jubor ki shukor ïa la ki paralok bad ki ïalam ïa ki sha ka jingjot.

³⁰ Husiar na ki briew kiba shri bad khapbrip khmat ïa phi; ki don ka jingpyrkhat kaba sniew.

³¹ Ban im slem ka long ka bainong jong kiba hok; u ñiuhlieh u long ka pansngiat badonburom.

³² Ka long kaba kham bha ban ïaishah ban ïa kaba long uba donbor. Ka kham bha ban don ka bor halor lade ban halor ki nongbah baroh.

³³ Ki briew ki ïakynting sbai ban tip ïa ka mon U Blei, hynrei U Blei da lade hi u ai ïa ka jubab.