PROBERB 15 - Khasi CL Bible (BSI)

¹ Ka jubab kaba jem ka tem ïa ka jingbitar, hynrei kaba khor ka pynkhih bitar.

² Haba ki briew kiba stad ki kren, ki pynlong ïa ka jingtip kaba pdiang hun, hynrei ki briew kiba mutlop ki khlei ïa ka jingbieit.

³ U Trai u ïohi kaei kaba jia ha ki jaka baroh; u khmih halor jong ngi, la ngi leh ïa kaba bha ne kaba sniew.

⁴ Ki kyntien kiba sbun ki pynkhie im, hynrei ki kyntien kiba khor ki pynlwet ïa ka dohnud.

⁵ Ka long kaba ibieit ban ym suidñiew ïa kaei kaba ki kmie ki kpa jong phi ki hikai; ka long kaba stad ban pdiang ïa ka jingsneng jong ki.

⁶ Ki briew kiba hok ki sumar ïa ka spah jong ki, hynrei ki bymman ki duh ei ïa la ka jong haba ki por kiba eh ki wan poi.

⁷ Ïa ka jingtip la pynphriang da ki briew kiba stad, ym da kiba bieit.

⁸ U Trai u sngewbha haba ki briew kiba bha ki duwai, hynrei u isih ïa ki jingkñia kiba ki bymman ki wallam ha u.

⁹ U Trai u isih ïa ki lynti jong ki briew kiba sniew; hynrei u ieit ïa kito kiba leh ïa kaei kaba dei.

¹⁰ Lada phi leh ïa kaei ka bymdei, yn pynshitom sat ïa phi; phin ïap lada phim ailad ban pynbeit ïa phi.

¹¹ Wat ka pyrthei kiba ïap kam lah ban buhrieh na U Trai ba un ym tip kaei kaba don hangta; kumno te ngi lah ban buhrieh ïa ki jingmut jingpyrkhat jong ngi na U Blei?

¹² Ki briew kiba meng kim sngewtynnat ban shah sneng; kim ju pan ïa ki jingai jingmut na kito kiba kham stad.

¹³ Haba ki briew ki kmen, ki phuh samrkhie, hynrei haba ki sngewsih, ki pyn-i jingsngewdiaw.

¹⁴ Ki briew kiba shemphang ki kwah ban ïoh hikai, hynrei ki briew kiba mutlop ki sngewhun ha ka jingbieit.

¹⁵ Ka jingim jong kiba duk ka don ha ka jingïaleh borabor, hynrei ki briew kiba kmen ki suk mynsiem ha ka jingim borabor.

¹⁶ Ka kham bha ban long kiba duk bad ba sheptieng ïa U Trai ban ïa kaba long kiba riewspah bad shah jynjar.

¹⁷ Ka kham bha ban bam ïa ki jhur bad ki briew kiba ieit ïa phi ban ïa kaba bam ïa ka doh kaba bha tam ha kaba don ka jingpihuiñ.

¹⁸ Kaba shit khlieh ka thaw ki jingïania, hynrei ka jingïaishah ka wallam ïa ka jingsuk.

¹⁹ Lada phi jaipdeh, phin ïakynduh ïa ka jingeh kylleng, hynrei haba phi long uba trei minot, phin ym shem jingeh.

²⁰ Ki khun kiba stad ki pynlong ïa ki kpa jong ki ban kmen. Tang kiba bieit ki ñiewbeiñ ïa la ki kmie.

²¹ Ki briew kiba mutlop ki kmen ha la ka jingbieit, hynrei kiba stad kin leh ïa kaei kaba dei.

²² Lum ïa ki jingai jingmut baroh katba phi lah, bad phin jop; khlem kata phin shahjop.

²³ Katno ka pynkmen haba ïoh ïa ka kyntien kaba dei kaba ïahap bad ka por.

²⁴ Ki briew kiba stad ki ïaid ha ka lynti kaba ïalam artet sha ka jingim, ym ïa ka lynti kaba ïalam arsut sha ka jingïap.

²⁵ U Trai un pynjot ïa ki longïing jong ki briew kiba sarong, hynrei un ïada ïa ki jingdon jingem jong ka riewkynthei.

²⁶ U Trai u isih ïa ki jingpyrkhat kiba sniew, hynrei u sngewbha ha ki ktien kiba sngur jingmut.

²⁷ Kaba pyrshang ban ïohnong da ka bymhok, ka pynngat ïa la ka longïing ha ka jingjynjar. Wat bamsap bad phin ïoh im slem.

²⁸ Ki briew kiba bha ki pyrkhat ha shuwa ban jubab. Ki briew kiba sniew ki kloi ban jubab, hynrei ka wallam jingeh.

²⁹ Haba ki briew kiba bha ki duwai, U Trai u shahshkor, hynrei u long jngai ïa kito kiba leh sniew.

³⁰ Ki khmat kiba phuh samrkhie ki pynlong ïa phi ban kmen, bad ki khubor ki babha ki pynsngewtynnat shuh shuh.

³¹ Lada phi shahshkor haba phi shah pynbeit, phi long kiba stad.

³² Lada phi kyntait ban shah hikai, phi ñiewbeiñ ïa lade. Lada phi pdiang ïa ka jingpynbeit, phin long kiba kham stad.

³³ Ka jingtiengburom ïa U Trai ka long ka jinghikai na ka hi. Phi dei ban long kiba sngewrit ha shuwa ba phin ïoh ïa ki jingkyntiew burom.