PROBERB 14 - Khasi CL Bible (BSI)

¹ Ïa ki rympei ïing la pynlong da ka jingstad jong ki kynthei, hynrei la pynjot da ka jingleh bieit.

² Long kiba beit bad phi pyn-i ba phi don ka jingtiengburom ïa U Trai; long kiba kynriang bad phi pyn-i ba phim don ïa kata.

³ Ha ka jingsarong, kiba bieit ki kren shaba palat; ki ktien jong kiba stad ki ïada ïa ki.

⁴ Khlem ki masi kyrtong ban tan ïa ka lyngkor, ka lyngkha jong phi kan ym don ei ei, hynrei da ki yn pyndap shoiñ ïa ki thiar da u kew.

⁵ U sakhi uba lah ban shaniah, borabor u ïathuh ïa ka jingshisha, hynrei u bym lah ban shaniah, u ïathuh tang ïa kaba lamler.

⁶ Ki briew kiba meng da lei lei kin ym long kiba stad, hynrei ki briew kiba shemphang ki ïoh hikai kloi.

⁷ Kiar na ki briew kiba bieit; kim don ei ei ban hikai ïa phi.

⁸ Balei ba u briew uba sian u stad? Namar u tip ïa kaei ban leh. Balei ba u briew ba-mutlop u bieit? Namar ba u shu pyrkhat ba u tip.

⁹ Ki briew kiba bieit kim suidñiew lada ki leh pop, hynrei ki briew kiba beit ki kwah ban ïohmap.

¹⁰ Ka jingkmen jong phi ka long ka jong phi hi; ka jingkthang jong phi ka long ka jong phi hi. Ym don uba lah ban ïasam ïa ki bad phi.

¹¹ Ka ïing jong u briew uba bha kan dang ïeng hi hadien ba la pynjot ïa ka ïing jong u nongleh ïa kaba sniew.

¹² Kaei kaba phi pyrkhat ba ka long ka lynti kaba dei ka lah ban ïalam sha ka jingïap.

¹³ Ka jingrkhie ka lah ban buhrieh ïa ka jingkhuslai. Haba ka jingkmen ka la jah, ka jingsngewsih ka dang ïai don hangta.

¹⁴ Ki briew kiba sniew kin ïoh ïa kaei kaba ki dei ban ïoh. Ki briew kiba bha kin ïoh bainong na ka bynta ki kam jong ki.

¹⁵ Uba bieit un ngeit ïa kaei kaei baroh; ki briew kiba sian ki da khmih ïa la ka jingjam.

¹⁶ Ki briew kiba sngewthuh ki husiar ban kiar na kaba sniew, hynrei ki briew kiba mutlop kim suidñiew bad ki tur ruma kat shaba lap.

¹⁷ Ki briew kiba shit khlieh ki leh ïa ki kam bieit; ki briew kiba stad ki long jai jai.

¹⁸ Ki briew kiba duna ka jingtip ki ïoh ïa kaei kaba ka jingbieit jong ki ka dei ban ïoh, hynrei ha kiba sian la ainong da ka jingtip.

¹⁹ Ki briew kiba sniew kin hap ban pyndem ha kiba hok bad kyrpad rit ïa ka jinglehisynei na ki.

²⁰ Ym don kiba sngewtynnat ïa kiba duk, wat ki paramarjan jong ki, hynrei kiba riewspah ki don shibun ki paralok.

²¹ Lada phi kwah ban long kiba kmen, to lehsbun ïa kiba duk; ka long ka pop ban ñiewbeiñ ïano ïano.

²² Phin ïoh ïa ka jingshaniah bad jingñiewkor na kiwei lada phi trei na ka bynta kaba bha; lada phi trei na ka bynta kaba sniew, phi leh ïa kaba bakla.

²³ To trei minot bad phin pahuh ha ka jingim; lada phi shu bunktien phin ïoh long kiba kyrduh.

²⁴ Ïa ki briew kiba stad la ainong da ka spah, hynrei ïa kiba bieit la tip da ki jingleh bieit jong ki.

²⁵ U sakhi u pyllait im ïa ki briew haba u ong ïa kaba shisha; haba u ong ïa kaba shukor, u shetkylla ïa ki briew.

²⁶ Ka jingtiengburom ïa U Trai ka wanrah ïa ka jingsngewskhem bad ka jingshngain ïa u briew bad ïa ka longïing jong u.

²⁷ Hato phi kwah ban lait na ka jingïap? Ka jingtiengburom ïa U Trai ka long ka umpohliew ka jingim.

²⁸ Ka jingkhraw jong u syiem ka shong ha ki katno ngut ki briew kiba u synshar; khlem kita um long ei ei.

²⁹ Lada phi long jai jai, phi long kiba stad, hynrei lada phi long kiba shit khlieh, phi shu pyn-i katno ka jinglong mutlop phi long.

³⁰ Ka jingmut jingpyrkhat kaba suk ka pynlong ïa ka met ka bakoit bakhiah, hynrei ka jingpihuiñ ka long kum ka jingpang bampong.

³¹ Lada phi banbeiñ ïa ki briew kiba duk, phi ñiewbeiñ ïa U Blei uba la thaw ïa ki; hynrei ka jingpyn-i ïa ka jinglehsbun ïa kiba duk ka long ka kam jong ka jingmane.

³² Ki briew kiba sniew ki wallam ïa la ka jong ka jingkyllon noh da ki kam basniew jong ki, hynrei ïa ki briew kiba bha la ïada da ka jinglonghok jong ki.

³³ Ka jingstad ka don ha ki jingmut jingpyrkhat jong ki briew kiba stad; kiba bieit kim tip ei ei shaphang ka jingstad.

³⁴ Ka hok ka kyntiew ïa ka jaitbynriew; ka pop ka long ka jingjahburom jong kano kano ka jaitbynriew.

³⁵ Ki syiem ki sngewtynnat ïa ki rangbah synshar kiba lah, hynrei ki pynshitom ïa kito kiba pynlehrain ïa ki.