PROBERB 13 - Khasi CL Bible (BSI)

¹ Ki khun kiba stad ki shahshkor haba ki kmie ki kpa ki pynbeit ïa ki, hynrei ki briew kiba sarong da lei lei kin ym phla ba ki la bakla.

² Ki briew kiba bha kin ïoh bainong na ka bynta kaei kaba ki ong, hynrei kito kiba shukor ki thrang tang ban leh jubor.

³ Husiar ïa kaei kaba phi ong bad ri ïa la ka jingim. Uba kren thurmur u pynjot ïa lade.

⁴ Kam pher katno u briew uba jaipdeh u thrang ban ïoh ïa kaei kaei, da lei lei un ym ïoh ïa ka. Uba trei shitom un ïoh ïa baroh kiei kiei kiba u kwah.

⁵ Ki briew kiba hok ki isih ïa kaba lamler, hynrei ki ktien jong ki briew kiba bymman ki long ka jinglehrain bad jingjahburom.

⁶ Kiba hok ki ïada ïa kiba lui lui; ka pop ka long ka jingkyllon noh ki bymman.

⁷ Don ki briew kiba leh riewspah, hynrei kim don ei ei. Kiwei ki leh duk, hynrei ki don ka spah bah.

⁸ Kiba riewspah ki hap ban pyndonkam ïa la ka pisa ban pyllait ïa la ka jingim, hynrei ym don ba byrngem ïa uba duk.

⁹ Kiba hok ki long kum ka jingshai kaba tyngshaiñ; ki bymman ki long kum ka sharak ka ban lip noh.

¹⁰ Kiba leh meng kim leh ei ei hynrei tang ban pynmih jingkulmar. Ka long kaba kham stad ban da pan ïa ka jingai jingmut.

¹¹ Ka jingïoh ïa ka spah da kaba suk eh, ka jinglut noh jong ka ruh ka long kaba kloi eh. Kaba kham eh ban ïoh ïa ka, kaba kham roi ruh ka jingïoh ïa ka.

¹² Haba shah khñiot ka jingkyrmen, ka dohnud ruh ka shah khñiot, hynrei ka jingurlong jong ka jingkhmih lynti ka pyndap ïa phi da ka jingkmen.

¹³ Lada phi kyntait ïa ka jingai jingmut kaba bha, phi pan ïa ka jingjynjar; bud ïa ka bad phin lait im.

¹⁴ Ki jinghikai jong kiba stad ki long ka umpohliew ka jingim; kin ïarap ïa phi ban lait im haba ka jingim jong phi ka don ha ka jingma.

¹⁵ Ka jingshemphang ka pynïoh ïa ka jingñiewburom, hynrei kito ki bym lah ban shaniah ki don ha ka lynti sha ka jingjot.

¹⁶ Ki briew kiba sian, borabor ki pyrkhat ha shuwa ban leh ïa kano kano, hynrei ki briew kiba mutlop ki thad ïa la ka jingbieit.

¹⁷ Ki nonglamktien ki bym lah ban shaniah ki thaw jingkulmar, hynrei kito kiba lah ban shaniah ki wallam ïa ka jingsuk.

¹⁸ Kino kino ki bym kwah ban shah hikai kin ïailong kiba kyrduh. Hynrei uno uno uba sngap ïa ka jingpynbeit u long ba la ñiewkor.

¹⁹ Katno ka long kaba sngewtynnat ban ïoh ïa kaei kaba phi kwah! Ki briew kiba mutlop ki kyntait ban phai noh na kaba sniew.

²⁰ Ïalang paralok bad uba stad bad phin kylla stad. Lada phi ïalang paralok bad ki briew kiba bieit, phin long kiba bieit.

²¹ Ka jingjynjar ka buddien ïa ki nongpop kylleng, hynrei ki briew kiba hok kin ïoh bainong da kiei kiei kiba bha.

²² Ki briew kiba bha kin don ka spah ban ieh pateng ha ki ksiew jong ki, hynrei ka spah jong ki nongpop kan leit sha kiba hok.

²³ Ki lyngkha ba sah shrah ki lah ban pynmih shibun ka jingbam ïa kiba duk, hynrei ki bymhok kin shu ieh ïa kine khlem rep.

²⁴ Lada phi pynshitom ïa la ki khun, phim ieit ïa ki. Lada phi ieit ïa ki, phin sneng pynbeit ïa ki.

²⁵ Kiba hok ki don kyrhai ban bam, hynrei ki bymman ki shahthngan borabor.