PROBERB 12 - Khasi CL Bible (BSI)

¹ Kino kino kiba ieit ïa ka jingtip ki kwah ban don ba pynong haba ki bakla. Ka long ka jingbieit ban isih haba don ba pynbeit.

² U Trai u sngewbha ïa ki briew kiba bha, hynrei u pynrem ïa kito kiba thmu sniew.

³ Ka jingleh bymman kam wanrah ïa ka jingshngain, hynrei ki briew kiba hok ki ïeng skhem.

⁴ Ka tnga kaba bha ka long ka jingsarong bad jingkmen jong u tnga jong ka; hynrei ka tnga kaba pynlehrain ïa la u tnga ka long kum ka jingpang bampong ïa ki shyieng jong u.

⁵ Ki briew kiba beit kin lehbha ïa phi; ki bymman ki kwah tang ban shukor ïa phi.

⁶ Ki ktien jong ki bymman ki long kum ban pynïap, hynrei ki ktien jong kiba hok ki pyllait im ïa kito kiba shah byrngem.

⁷ Ki bymman ki ïakynduh ïa la ka jingkyllon noh bad ym don ba mih pateng na ki, hynrei ki longïing jong kiba hok ki ïai im pateng.

⁸ Lada phi long kiba shemphang, phin ïoh jingïaroh; lada phi long kiba mutlop, ki briew kin peitbeiñ ïa phi.

⁹ Ka long kaba kham bha ban long u riewmadan uba trei ban ïoh bam ban kaba leh mynleh kum uba khraw hynrei bad ka shahthngan.

¹⁰ Ki briew kiba bha ki sumar ïa ki jingri jong ki, hynrei ki riew ba-bymman ki lehbeiñ ïa la ki jong.

¹¹ U nongrep uba trei shitom u don pahuh ka bam, hynrei ka long ka jingleh bieit ban pynlehnoh-ei ïa ka por ha ki kam bymmyntoi.

¹² Baroh kaba ki briew ba-bymman ki kwah ka long ban wad ban leh ïa ki kam kiba sniew, hynrei kiba hok ki ïeng skhem.

¹³ Ki bymman ki shah riam ha ki ktien jong ki hi, hynrei ki briew kiba beit ki pyllait ïa lade na ka jynjar.

¹⁴ Ka bainong jong phi ka shong ha kaei kaba phi ong bad kaei kaba phi leh; phin ïoh ïa kaei kaba phi dei hok.

¹⁵ Ki briew kiba mutlop borabor ki pyrkhat ba ki leh ïa kaba dei. Ki briew kiba stad ki shahshkor ïa ki jingpyn-i lem.

¹⁶ Haba uba bieit u phoi, u pynpaw kumne kumne ba yn tip. Ki briew kiba sian kim patiaw ïa ka jingshah krenbeiñ.

¹⁷ Haba phi ïathuh ïa ka jingshisha, ka don ka jingbishar hok, hynrei ki jingshukor ki ïalam sha ka jingshah bishar bymhok.

¹⁸ Ki ktien ba khlem da pyrkhat ki lah ban pynmong jylliew kum kano kano ka waitlam, hynrei ki ktien ba kren ha ka jingstad ki lah ban pynkhiah.

¹⁹ Ka jinglamler ka neh tang shipor, hynrei ka jingshisha ka neh junom.

²⁰ Kito kiba thmu sniew kin don ha ka jingkyndit thret, hynrei kito kiba trei na ka bynta kaba bha kin shem ïa ka jingkmen.

²¹ Ym don kaba sniew kaba jia ha ki briew kiba hok, hynrei ki bymman kim don ei ei tang ka jynjar suda.

²² U Trai u isih ïa kiba lamler, hynrei u sngewbha ïa kito kiba bat ïa la ka ktien.

²³ Ki briew kiba sian ki sngap jar ïa kaei kaba ki tip, hynrei kiba mutlop ki thad ïa la ka jingbieit.

²⁴ Ka jingtrei shitom kan ai bor ïa phi; kaba leh jaipdeh kan pynlong mraw ïa phi.

²⁵ Ka jingkhuslai kan lute ïa ka jingkmen na phi, hynrei ki ktien sbun kin pynkmen ïa phi.

²⁶ U briew uba hok u long ka jingkdew lynti ïa la u paralok, hynrei ka lynti jong u bymman ka ïalam bakla ïa ki.

²⁷ Lada phi long uba jaipdeh, phin ym ïoh da lei lei ïa kaei kaba phi kwah ban long hadien, hynrei lada phi trei minot, phin ïoh spah.

²⁸ Ka hok ka long ka lynti sha ka jingim; ka jingbymman ka long ka lynti sha ka jingïap.