PROBERB 11 - Khasi CL Bible (BSI)

¹ U Trai u isih ïa ki briew kiba pyndonkam da ki tarajur thok. U sngewbha ha ki jingthew kiba hok.

² Ki briew kiba sarong kin shah pynjahburom. Ka long kaba kham stad ban long kiba sngewrit.

³ Lada phi long kiba beit, la ïalam ïa phi da ka jinglonghok. Ïa ki briew kiba ym lah ban shaniah la pynjot da ka jingbymhok jong ki hi.

⁴ Ka spah kan ym lah ban leh ïa kaei kaei kaba bha ha ka sngi ba phi ïashem ïa ka jingïap, hynrei ka jinglehhok kan pyllait ïa ka jingim jong phi.

⁵ Ka jingbeit ka pynsuk ïa ka jingim u briew uba bha, hynrei u bymman u kyllon da la ki jong ki kam bymman.

⁶ Ka hok ka pyllait ïa kito kiba lehhok, hynrei kito ïa kiba ym lah ban shaniah ki shah riam ha la ka jong ka jingkwah brai hi.

⁷ Haba ki bymman ki ïap, ka jingkyrmen jong ki ruh ka ïap bad ki. Ka jingsngewskhem halor ka spah kam ïalam shano shano ruh.

⁸ Uba hok u lait na ka jingjynjar; pynban u bymman u hap ha ka.

⁹ Phi lah ban jot noh da ka jingkren ki briew kiba khlem blei, hynrei ka jingstad jong kiba hok ka lah ban pyllait im ïa phi.

¹⁰ Ka nongbah ka kmen haba ki briew kiba hok ki manbha, bad ka don ki jingrisa sngewbha haba u bymman u ïap.

¹¹ Ka nongbah ka khraw haba kiba hok ki kyrkhu ïa ka; hynrei ka nongbah ka jot noh da ki ktien jong ki bymman.

¹² Ka long bieit ban krenbeiñ ïa kiwei. Lada phi long uba sngewthuh, phin shu sngap jar jar.

¹³ Uba lorni u thad ïa kaba la buhrieh, hynrei phi lah ban buh ïa ka jingshaniah ha uba lah ban buhrieh.

¹⁴ Ka jaitbynriew kan kyllon lada ym don ka jingïalam. Ha ka jingbun ki nongaibuit don ka jingshngain.

¹⁵ Lada phi kular ban siew ïa ka ram u nongwei, phin babe ïa kata. Kan kham bha lada phi kiar na kata.

¹⁶ Ka briew kaba sbun ka long kaba la ñiewkor, hynrei ka briew khlem ka jinglong babha ka long ka jingjahburom. Ki briew kiba jaipdeh kin ym don pisa satia, hynrei ki briew kiba minot thop kin riewspah.

¹⁷ Phi myntoi ïa lade haba phi bha sbun. Haba phi leh ki kam runar, phi pynmynsaw hi ïa lade.

¹⁸ Ki briew kiba bymman da shisha kim ïohnong ei ei, hynrei lada phi leh ïa kaei kaba dei, ka pynthikna ba phin ïoh ïa ka bainong.

¹⁹ Uno uno uba kut jingmut ban leh ïa kaba dei un im, hynrei uno uno uba ïai beh ban leh ïa kaba sniew un ïap.

²⁰ U Trai u isih ïa ki briew kiba don jingmut sniew, hynrei u ieit ïa kito kiba leh ïa kaba dei.

²¹ Phi lah ban tip skhem ba ki riewbymman kin shah pynshitom, hynrei kiba hok kin lait.

²² Ka jingbhabriew ha ka briew ka bym don ka jingshemphang ka long kum ka sati ksiar ha ka khmut u sniang.

²³ Kaei kaba ki briew kiba bha ki kwah ka mih ha ka jingbha; haba ki bymman ki ïoh ïa kaei kaba ki kwah, baroh ki bitar.

²⁴ Don ki briew kiba pynlut kai ïa la ka pisa bad ki nang ïai riewspah. Kiwei ki husiar, bad pynban ki nang ïai kyrduh.

²⁵ Long kiba sbun, bad phin manbha. Ïarap ïa kiwei, bad yn ïarap ïa phi.

²⁶ Ki briew ki tim ïa uno uno uba set ïa u kew, ban ap haba un kiew dor, hynrei ki ïaroh ïa uno uno uba sei ban die ïa u.

²⁷ Lada ki jingthmu jong phi ki long kiba bha, yn ñiewkor ïa phi, hynrei lada phi wad ïa ka jingjynjar, kata ka long kaei kaba phin ïoh.

²⁸ Kito kiba shaniah ha ka spah jong ki, kin hap kum ki sla jong ka synrai, hynrei kiba hok kin roi kyrhai kum ki sla jong ka lyiur.

²⁹ Kito kiba wanrah jingeh ha la ki longïing kin ym don ei ei ha kaba kut. Ki briew kiba bieit kin long borabor ki shakri jong kiba stad.

³⁰ Ka hok ka ai jingim, hynrei ka jinglehbor ka shim noh ïa ka.

³¹ Kito kiba bha ki ïoh bainong hangne ha pyrthei, te phi lah ban thikna ba ki bymman bad ki briew kiba pop kin shah pynshitom.