PROBERB 10 - Khasi CL Bible (BSI)

Ki Proberb u Solomon

¹ Kine ki long ki proberb u Solomon: U khun uba stad u pynsngew sarong ïa la u jong u kpa; uba bieit u wallam ka jingsngewsih ïa la ka kmie.

² Ka spah kaba phi ïoh da ka bymhok kam pynmyntoi ei ei, hynrei ka jinglonghok ka pyllait ïa ka jingim jong phi.

³ U Trai um shah ïa ki briew kiba bha ban shahthngan, hynrei u khang ïa ki bymman ban ïoh ïa kaei kaba ki kwah.

⁴ Ka jinglong jaipdeh kan pynlong ïa phi ban kyrduh, hynrei ka jingtrei shitom kan pynriewspah ïa phi.

⁵ U briew uba sngewthuh u lum ïa ki soh ha ka aïom kaba biang; ka long kaba jahburom ban thiah thai ha ka por ka aïom ot.

⁶ U briew uba bha un ïoh jingkyrkhu. Ki ktien u riewbymman ki buhrieh ïa ka jinglong ba leh jubor.

⁷ Ïa ki briew kiba bha yn ïai kynmaw kum ka jingkyrkhu; hynrei ïa ki riewbymman yn klet noh.

⁸ Ki briew kiba sngewthuh ki pdiang ïa ki jingpyn-i kiba dei, ki briew kiba kren bieit ki tur ruma sha ka jingjot.

⁹ Ki briew kiba ïaid hok ki shongshngain bad sngewskhem, hynrei uta u bym lehhok un shah kem.

¹⁰ Uno uno uba len ïa ka jingshisha u thaw jingkulmar, hynrei uta uba pyn-i markhmat u trei na ka bynta ka jingsuk.

¹¹ Ki ktien u briew uba bha ki long ka umpohliew ka jingim, hynrei ki ktien u briew uba bymman ki buhrieh ïa ka jinglong ba leh jubor.

¹² Ka jingshun ka pynmih ïa ki jingïakajia, hynrei ka jingieit ka klet noh ïa ki kam palat baroh.

¹³ Ki briew kiba stad ki kren da ka jingshemphang, hynrei ïa ki briew kiba mutlop donkam ban pynshitom.

¹⁴ Kiba stad ki ïoh ïa ka jingtip baroh kaba ki lah; hynrei haba kiba bieit ki kren, ka jingkulmar ka mih.

¹⁵ Ka spah ka ïada ïa uba riewspah, ka jingduk ka pynjot ïa uba duk.

¹⁶ Ka bainong ban lehbha ka lam sha ka jingim; hynrei ka pop ka ïalam ban leh pop shuh shuh.

¹⁷ Ki briew kiba shahshkor haba ki shah pynbeit kin ïoh im, hynrei kito ki bym pdiang ba ki bakla ki don ha ka jingma.

¹⁸ U briew uba buhrieh ïa la ka jingshun u dei uba lamler. Uno uno uba pynphriang ïa ka jinglorni u dei uba bieit.

¹⁹ Katba phi nang bunktien, katta phi nang leh pop. Lada phi long uba stad phin sngap jar.

²⁰ Ki ktien u briew uba bha ki long kum ka rupa kaba kynsai; ka jingai jingmut jong u riewbymman kim dondor ei ei.

²¹ Ki ktien u briew uba bha ki pynmyntoi ïa kiba bun ki briew, hynrei phin pynïap ïa lade da ka jingmutlop.

²² Ka dei ka jingkyrkhu U Trai kaba pynriewspah ïa phi. Ka jingtrei shitom kan ym lah ban kham pynriewspah ïa phi.

²³ Ka long kaba bieit ban sngewtynnat haba leh bymdei. Ki briew kiba stad ki sngewbha ha ka jingstad.

²⁴ Kiba hok ki ïoh ïa kaei kaba ki thrang, hynrei ki riewbymman ki ïoh ïa kata kaba ki sheptieng eh.

²⁵ Ki 'erïong ki wan, bad ki bymman ki shah rong noh; hynrei ki briew kiba hok ki shngain borabor.

²⁶ Wat ju ailad ïa u briew uba jaipdeh ban leh ei ei na ka bynta jong phi; un long kum ka sirka kaba pynshyrkhei ïa ki bniat, lane kumba pynsat ka tdem ïa ki khmat.

²⁷ Kohnguh ïa U Trai, bad phin im kham slem. Ki bymman ki ïap shuwa ka por jong ki.

²⁸ Ki jingkyrmen jong ki briew kiba bha ki lam sha ka jingkmen, hynrei ka jingkhmih lynti ki riewbymman kam lam shano shano.

²⁹ U Trai u ïada ïa ki briew kiba ïaid hok; hynrei u pynjot ïa kito kiba leh bymdei.

³⁰ Ki briew kiba hok ki ïoh ka jingsngewskhem borabor, hynrei ki bymman kin ym lah ban im ha ka ri.

³¹ Ki briew kiba hok ki kren ïa ka jingstad, hynrei ïa u thylliej uba kren sniew yn pynsangeh.

³² Ki briew kiba hok ki tip ïa kaei kaba ki dei ban kren, hynrei kiba bymman borabor ki kren ïa kiei kiei kiba pynmong.