PROBERB 1 - Khasi CL Bible (BSI)

Ka dor jong ki Proberb

¹ Ki proberb u Solomon, u khun jong u Dabid bad u syiem ki Israel.

² Kine ki long ki proberb ki ban ïarap ïa phi ban tip ïa ka jingstad bad ka jinghikai kaba bha, bad ban shemphang ïa ki jingong kiba jylliew jingmut.

³ Ki lah ban hikai ïa phi kumno ban im kum kiba stad bad kumno ban long uba hok, uba lehhok, bad uba ïaid beit.

⁴ Ki lah ban pynlong ïa u briew uba shida ban long sian bad hikai ïa ki samla kumno ban dap ban biang ka jingim.

⁵ Kine ki proberb ki lah ban nang pynkhraw ïa ka jingtip jong ki riewstad bad kdew lynti ïa kiba la nang la tip,

⁶ kumta ba kin shemphang ïa ki jingmut kiba rieh kiba don ha ki proberb bad ki jingeh ba ki riewstad ki kylli.

Ka jingai jingmut ïa ki Samla

⁷ Ban ïoh ïa ka jingtip, nyngkong phi dei ban don ka jingtiengburom ïa U Trai. Ki briew kiba mutlop kim don ka jingñiewkor ïa ka jingstad bad ki kyntait ban shah hikai.

⁸ Ko khun jong nga, to pynleit jingmut ïa kaei kaba u kpa bad ka kmie jong phi ki ong ïa phi.

⁹ Ki jinghikai jong ki kin pynbha ïa ka jinglong jong phi kum ka jaiñspong kaba ishongkhia ha ka khlieh jong phi, lane kum u jingdeng uba pyniphuh ïa ka dur jong phi.

¹⁰ Haba ki nongkamsniew ki pynshoi ïa phi, ko khun jong nga, wat kohnguh.

¹¹ Tharai lada ki ong, “Ale ngin leit apthap ïano ïano ban ïoh pynïap! Ïa ngin leit tur ïaleh ïa ki briew kiba lui lui tang ban shu ïoh leh dusmon!

¹² Ki lah ban shait ban khlaiñ haba ngi lap ïa ki, hynrei kin ïap haba ngi ïoh leh dusmon ïa ki!

¹³ Ngin ïoh kurup ïa ki markordor kiba har rukom bad pyndap ïa la ki ïing da ki mar lute!

¹⁴ Ale bad ïoh bynta lang bad ngi, bad ngin ïasam ïa kaba ngi ïoh lute.”

¹⁵ Ko khun jong nga, wat ïashang bad ki briew kiba kum kita. Kiar na ki.

¹⁶ Kim lah ap ban leh ïa kaei kaei kaba sniew. Ki long borabor kiba kloi ban pynïap.

¹⁷ Kam myntoi ban pynap jar haba ka sim ba me riam ka nang peit shin;

¹⁸ hynrei ki briew kiba kum kita ki riam ïa lade hi, ka jingriam ka ban pynïap ïa ki hi.

¹⁹ Ka jinglute borabor ka shim noh ïa ka jingim jong u nonglute — kane ka dei kaba ju jia ha uno uno uba im da ka jingleh jubor.

Ka jingstad ka khot

²⁰ Ha sngap! Ka Jingstad ka pyrta ha ki lynti shnong bad ha ki jaka ïew,

²¹ ka da pyrta jam ha ki khyrdop nongbah bad kat haba ki briew ki ïalumlang:

²² “A, phi ki briew kiba bieit! Slem katno keiñ phi dang kwah ban sah bieit? Sa katno keiñ phin dang kmen ha kaba krenbeiñ ïa ka jingtip? Hato phim kwah ban ïoh jinghikai?

²³ Shahshkor haba nga mai tyngeh ïa phi; ngan ai ïa phi ïa ki jinghikai kiba bha bad ngan ïathuh lang ïa ka jingtip jong nga bad phi.

²⁴ Nga ïai pyrta ïa phi, nga da khot sngewbha ba phin wan, hynrei phim sngap. Phim shahshkor satia ïa nga.

²⁵ Phi la ñiewbeiñ ïa ka jingai jingmut jong nga baroh, bad phim mon ba ngan pynbeit ïa phi.

²⁶ Kumta ynda phi shah jynjar, ngan sa ïoh rkhie ïa phi. Ngan sa rkhiebeiñ ïa phi ynda phi hap ha ka jingsheptieng —

²⁷ haba ka wan ha phi kum ka 'erïong, bad ka pynjynjar ïa phi kum ka 'erlangthari, bad haba phi don ha ka jingpang bad ka jinglanot.

²⁸ Hangta kin sa khot kyrpad ïa ka jingstad, hynrei ngan ym jubab; phin sa wan wad ïa nga kylleng sawdong, hynrei phin ym shem ïa nga.

²⁹ Phim ju sngew donkam ïa ka jingtip bad borabor phi kyntait ban kohnguh ïa U Trai.

³⁰ Phim ju kwah ïa ka jingai jingmut lem jong nga lane shahshkor haba nga pynbeit ïa phi.

³¹ Namar kata, phin ïoh ïa kaba phi pan kwah, bad ki kam jong phi hi kin pynshitom ïa phi.

³² Ki briew ki bym don jingtip ki ïap namar ba ki kyntait ïa ka jingstad. Ki briew kiba mutlop ki shah pynjot namar ba ki leh bymsuidñiew.

³³ Hynrei jar uba shahshkor ïa nga un shongsuk kynjai. Un lait na ki jingma khlem sheptieng ïa kaba sniew.”