PHILIPPI 3 - Khasi CL Bible (BSI)

Ka hok kaba shisha

¹ Ha kaba wai noh, ko parabangeit jong nga, to phin kmen ha U Trai. Ngam sngew ei ei ban ïai ban biang ïa kaei kaba nga la thoh mynshuwa, bad kan kham pynskhem ïa phi lada nga leh kumta.

² To kiar noh na kito kiba leh ïa kiei kiei kiba sniew, na kita ki ksew, kita ki briew kiba pynbor ïa ka ban ot ïa ka met.

³ Dei ma ngi, ym ma ki, kiba la ïohpdiang ïa ka jingotsher kaba shisha, naba ngi mane ïa U Blei da U Mynsiem jong u bad ngi lehkmen ha ka jingim jong ngi ha U Khrist Jisu. Ngim buh ïa kano kano ka jingshaniah ha ki jinglehniam kiba shabar.

⁴ Nga lah eh, da shisha, ban shaniah ha kum kito kiei kiei. Lada uno uno u pyrkhat ba u lah ban shaniah ha ki jinglehniam kiba shabar, nga don ka daw kaba kham khraw ban sngew kumta.

⁵ La otsher ïa nga haba nga la don shi taïew ka rta. Nga long u Israel naduh ba la kha ïa nga, na ka jait Benjamin, u Hebru uba nylla. Ha ka liang kaba sumar ïa ka hukum ki Jiw, nga la long u Pharisi, bad nga la long uba shitrhem katta katta haduh ba nga la pynshitom ïa ka balang.

⁶ Lada u briew u lah ban long uba hok da kaba kohnguh ïa ki jingong ka hukum, nga long uba khlem jingrem.

⁷ Hynrei kita kiei kiei baroh kiba nga lah ban ñiew kum ka jingmyntoi; ïa kine, nga la ñiew mynta ka jingduh na ka bynta U Khrist.

⁸ Ym tang ïa kita kiei kiei; nga ñiew ïa kiei kiei baroh kum ka jingduh ba-pura na ka bynta kata kaba kham kor palat, ka jingtip ïa U Jisu Khrist uba U Trai jong nga.

⁹ Na ka bynta jong u, nga la bret noh ïa kiei kiei baroh; nga ñiew ïa ka baroh tang kum ka synrum, khnang ba ngan ïoh ïa U Khrist, bad ba yn pynïasoh pura bad u. Ngam long shuh uba don ka hok ka jong nga hi, ka bynta kaba nga ïoh da kaba kohnguh ïa ka hukum. Nga mynta, nga ïoh ïa ka hok kaba la ai da ka jingngeit ha U Khrist, ka hok kaba wan na U Blei bad kaba pynshong nongrim ha ka jingngeit.

¹⁰ Baroh kaba nga kwah ka long ba ngan ithuh ïa U Khrist bad ban mad ïa ka bor ka jingmihpat jong u, ban ïoh bynta ha ki jingshahshitom jong u, bad ban long kum ma u ha ka jingïap jong u,

¹¹ ha ka jingkyrmen ba ïa nga hi yn sa pynmihpat na kiba ïap.

Kaba beh sha pyrshah ka dak

¹² Ngam shym la kam ba nga la ïoh jop lypa lane ba la pynlong janai lypa. Nga ïai ïaleh shitom ban ïoh ïa ka prais ïa kaba U Khrist Jisu u la ïoh ïa nga sha lade hi.

¹³ Da shisha, ko parabangeit jong nga, nga shisha ngam pyrkhat ba nga la jop lypa ïa ka; ïa kane kawei nga leh, la kumno kumno, da kaba klet noh ïa kaei kaei kaba shadien jong nga bad nga ïaleh shitom ban poi sha kaei kaba sha khmat.

¹⁴ Kumta nga mareh beit sha pyrshah ka thong khnang ban ïoh ïa ka prais, kaba long ka jingkhot U Blei da U Khrist Jisu sha ka jingim kaba shaneng.

¹⁵ Ma ngi baroh kiba la ih bha ka jinglong mynsiem, ngi dei ban ïoh ïa kane kajuh ka jingmut. Hynrei lada don napdeng jong phi kiba don da ka jingmut baïapher, U Blei un pynshai ïa kane ha phi.

¹⁶ La kumno kumno, lada kata ka lah ban long, to ngin ïa-ïaid sha khmat kat kum kijuh ki kyndon kiba ngi la bud haduh mynta.

¹⁷ To ïai pyrthuh bud ïa nga, ko ki parabangeit jong nga. To pynleit jingmut ïa kito kiba bud ïa ka nuksa kaba dei kaba ngi la buh na ka bynta jong phi.

¹⁸ Nga la ïathuh ha phi ïa kane bunsien mynshuwa, bad mynta nga ïathuh biang ïa ka da ki jingjaw ummat; don shibun kiba ka jingim jong ki, ka pynlong ïa ki, ki nongshun jong ka jingïap U Khrist ha ka diengphna.

¹⁹ Ka jingkut jong ki kan long ha dujok, namar u blei jong ki u long ki jingkwah brai ka doh jong ki. Ki sngewsarong ïa kaei kaba ki dei ban sngewlehrain, bad ki pyrkhat tang ïa kiei kiei kiba long ki jong kane ka pyrthei.

²⁰ Ma ngi pynban, ngi long ki traishnong jong ka bneng, bad ngi ïa-ap hir hir ïa U Nongpynim, U Jisu Khrist uba U Trai ban wan na bneng.

²¹ U ban pynkylla ïa ki met batlot jong ngi bad pynlong ïa ki kum ka met ba-dap da ka burom jong u hi, da kata ka bor da kaba u lah ban wallam ïa kiei kiei baroh hapoh ka jingsynshar jong u.