PHILEMON 1 - Khasi CL Bible (BSI)

¹ Na u Paul, u nongsah byndi na ka bynta U Khrist Jisu, bad na u Timothi u para jong ngi — Ha u Philemon, u paralok jong ngi bad u para ba-ïatrei lang,

² bad ha ka balang kaba ïakynduh ha ka ïing jong me, bad ka Apphia ka para jong ngi, bad u Arkhippos u para shipai jong ngi:

³ To ai ba U Blei uba U Kpa jong ngi bad U Jisu Khrist uba U Trai un ai ha phi ïa ka jingaiei bad ka jingsuk.

Ka jingieit bad ka jingngeit u Philemon

⁴ Ko Philemon u para jong nga, man ka por ba nga duwai, nga kynmaw ïa me bad ainguh ïa U Blei jong nga.

⁵ Naba nga ïohsngew shaphang ka jingieit jong me ïa ki briew U Blei baroh bad ïa ka jingngeit kaba me don ha U Trai Jisu.

⁶ Ka jingduwai jong nga ka long ba ka jingïasyllok jong ngi bad me kum ki bangeit kan wallam ïa ka jingsngewthuh ba kham jylliew ïa ki jingkyrkhu baroh ïa kiba ngi ïoh ha ka jingim jong ngi ha U Khrist.

⁷ Ka jingieit jong me, ko para ba-ieit, ka la wallam ïa ka jingkmen bakhraw bad jingaimynsiem bajur! Me la pynkmen ïa ki dohnud jong ki briew U Blei baroh.

Ka jingkyrpad na ka bynta u Onesimos

⁸ Kum u hynmen jong me ha U Khrist na ka bynta kane ka daw ba nga lah ban sngew shlur katne, ban hukum ïa me ban leh ïa kaei kaba dei ban leh.

⁹ Hynrei namar ba nga ieit ïa me, nga pynlong ïa kane ka jingkyrpad. Nga leh ïa kane wat la nga long u Paul, u nonglamktien jong U Khrist Jisu, bad mynta ruh u nongsah byndi na ka bynta jong u.

¹⁰ Kumta nga pynlong ïa kane ka jingkyrpad na ka bynta u Onesimos, uba long u khun jong nga hi ha U Khrist; ba mynba ngi la don ha ka byndi nga la long u kpa jong u ha ka mynsiem.

¹¹ Ha kawei ka por u la long bymmyntoi shuh ïa me, hynrei mynta u long uba myntoi ïa me bad ïa nga.

¹² Nga phah pat sha me ïa u mynta, lem bad u ka long lem ka dohnud jong nga.

¹³ Ngan jin da la kwah ban bat ïa u hangne bad nga, katba nga dang don ha ka byndi na ka bynta ka gospel, khnang ba un ïoh ïarap ïa nga ha ka jaka jong me.

¹⁴ Wat la katta, ngam kwah ban pynbor ïa me ban ïarap ïa nga; pynban, ngan jin da la kwah ba men leh ïa ka da ka mon sngewbha jong me hi. Te ngan ym leh ïa kano kano lymda me mynjur.

¹⁵ Ka lah ban long ba u Onesimos u la don jngai na me katto katne por khnang ba men ïoh pat ïa u ha ki por baroh.

¹⁶ Bad mynta um long shuh tang kum u mraw, hynrei kham palat ban ïa u mraw: u long u para ba-ieit ha U Khrist. Katno u long uba kordor ïa nga! Bad katno khraw un long uba kordor ïa me, kum u mraw bad kum u para ha u Trai!

¹⁷ Namarkata, lada me pyrkhat ïa nga kum u para ba-ïatrei lem jong me, to pdiang sngewbha pat ïa u kumba men pdiang sngewbha ïa nga.

¹⁸ Lada u la leh kano kano kaba bakla ïa me lane u dang don ka ram ban siew ïa me, shim ïa kata na nga.

¹⁹ Hangne, ngan thoh ïa kane da ka kti jong nga hi: Ma nga, u Paul, ngan siew pat ïa me (Ha ka jingshisha, ngam dei ban pynkynmaw ïa me, ba me shahram ïa lade hi ha nga.)

²⁰ Kumta, ko para jong nga, sngewbha ban leh ïa kane na ka bynta U Trai; kum u para ha U Khrist, to pynkmen ïa nga!

²¹ Nga sngewthikna, katba nga dang thoh ïa kane, ba men leh ïa kaei kaba nga kyrpad — ha ka jingshisha nga tip ba men leh wat kham palat ïa kane.

²² Ha kajuh ka por, to pynkhreh ïa ka kamra na ka bynta jong nga, namar nga kyrmen ba U Blei un jubab ïa ki jingduwai jong phi baroh bad ban ai pat ïa nga ha me.

Ki jingai khublei bakhatduh

²³ U Epaphras, uba don lang bad nga ha ka byndi na ka bynta U Khrist Jisu, u phah ïa ki jingai khublei jong u ïa me,

²⁴ bad kumjuh ruh ki para ba-ïatrei lem bad nga u Markos, u Aristarkhos, u Demas, bad u Loukas.

²⁵ To ai ba ka jingaiei U Trai Jisu Khrist kan long lem bad phi baroh.