NONGBISHAR 9 - Khasi CL Bible (BSI)

U Abimelekh

¹ U Abimelekh u khun jong u Gideon u leit sha ka nongrit Shekhem ha kaba ki ba-ha-ïing baroh jong ka kmie jong u ki shong ki sah, bad u ong ha ki

² ban kylli ïa ki rangbah ka Shekhem, “Kano phi kham mon? Ba baroh ki hynñiewphew ngut ki khun shynrang jong u Gideon kin synshar ïa phi ne tang da uwei u briew? Kynmaw ba u Abimelekh u dei u para doh para snam jong phi.”

³ Ki ba-ha-ïing jong ka kmie jong u ki ïakren ïa kane ha ki rangbah ka Shekhem na ka bynta jong u, bad ki rangbah ka Shekhem ki la kut jingmut ban bud ïa u Abimelekh namar u dei uba ha ïing jong ki.

⁴ Ki ai ïa u hynñiewphew tylli ki sbai rupa na ka templ jong u Baal-jong-ka-Jutang, bad da kata ka pisa u la wai shi kynhun ki riewdakaid ban ïasoh bad u.

⁵ U leit sha ïing u kpa jong u ha Ophrah, bad hangta ha khlieh jong uwei u maw u la pynïap ïa ki hynñiewphew ngut ki hynmen ki para shynrang jong u, ki khun shynrang jong u Gideon. Hynrei u Jotham, u khun khatduh jong u Gideon, u la rieh bad um shym la shah pynïap.

⁶ Nangta baroh ki rangbah ka Shekhem bad ka Bethmillo ki ïalumlang bad leit sha u dieng Sning bakyntang ha Shekhem, ha kaba ki la thung syiem ïa u Abimelekh.

⁷ Haba u Jotham u tip ïa kane, u leit bad u ïeng ha kliar u Lum Gerisim, bad u pyrta jam sha ki, “Shahshkor ïa nga, phi ki rangbah ka Shekhem, bad U Blei u lah ban sngap ïa phi!

⁸ Ha kawei ka por, ki dieng ki ïamih ban jied u syiem na ka bynta jong ki. Ki ong ha u dieng Olib, ‘To long u syiem jong ngi.’

⁹ U dieng Olib u jubab, ‘Na ka bynta ban synshar ïa phi, ngan hap sangeh ban pynmih umphniang, ïa kaba la pyndonkam ban pyndonburom ïa ki blei jong ngi bad ïa ki khunbynriew.’

¹⁰ Nangta ki dieng ki ong ïa u dieng Dumbur, ‘Ale wan bad long u syiem jong ngi.’

¹¹ Hynrei u dieng Dumbur u ong, ‘Na ka bynta ban synshar ïa phi, ngan hap ban sangeh ban pynmih ki soh thiang babha.’

¹² Kumta te ki dieng ki ong ha u dieng sohwaiñ, ‘Ale wan bad long u syiem jong ngi.’

¹³ Hynrei u dieng sohwaiñ u jubab, ‘Na ka bynta ban synshar ïa phi, ngan hap sangeh ban pynmih ïa ka waiñ jong nga, kaba pynkmen ïa ki blei bad ïa ki khunbynriew.’

¹⁴ Kumta te ki dieng baroh ki ong ha u dieng shiah, ‘Ale wan bad long u syiem jong ngi.’

¹⁵ U dieng shiah u jubab, ‘Lada phi kwah shisha ban pynlong ïa nga u syiem jong phi, te ale wan bad riehtngen hapoh ka syrngiew jong nga. Lada phim kwah, ka ding kan klang na ki tnat shiah jong nga bad bam duh ïa ki dieng Kedar ka Lebanon.’

¹⁶ “Mynta te,” u Jotham u bteng, “Hato phi lehhok bad da kaba khuid mynsiem shisha haba phi thung syiem ïa u Abimelekh? Hato phi kynmaw burom ïa u Gideon bad lehbha ïa ka longïing jong u, kumba ki kam jong u ki dei ban ïoh?

¹⁷ Kynmaw ba i pa jong nga i la ïaleh na ka bynta jong phi. I la kheiñduh ïa la ka jingim ban pyllait im ïa phi na ki Midian.

¹⁸ Hynrei mynta phi phai pyrshah ïa ka longïing jong i pa jong nga. Phi la pynïap ïa ki khun shynrang jong i — hynñiewphew ngut ki rangbah halor uwei u maw — bad namar ba u Abimelekh, u khun ba i ïoh na ka shakri jong i, u dei uba ha ïing jong phi, phi la pynlong ïa u, u syiem ka Shekhem.

¹⁹ Mynta te, lada kaei kaba phi leh mynta ka sngi ïa u Gideon bad ïa ka longïing jong u ka long da kaba khuid mynsiem bad kaba hok, te to kmen bad u Abimelekh bad ai ba un kmen bad phi.

²⁰ Hynrei lada kam long kumta, ai ba ka ding kan mihnoh na u Abimelekh bad kan bam duh ïa ki rangbah ka Shekhem bad ka Bethmillo. Ai ba ka ding kan mih na ki rangbah ka Shekhem bad ka Bethmillo bad kan thang duh ïa u Abimelekh.”

²¹ Te namar ba u sheptieng ïa u Abimelekh, u hynmen jong u, u Jotham u la phet ïap bad u leit shong ha Beer.

²² U Abimelekh u synshar ïa ki Israel haduh lai snem.

²³ Nangta U Blei u la pynlong ïa u Abimelekh bad ïa ki rangbah ka Shekhem ban ïashun iwei ïa iwei pat, bad ki la ïaleh pyrshah ïa u.

²⁴ Kane ka la jia kumta khnang ba u Abimelekh bad ki rangbah ka Shekhem, kiba la pynshlur ïa u ban pynïap ïa ki hynñiewphew ngut ki khun shynrang jong u Gideon, kin siew na ka bynta ka kam sniew jong ki.

²⁵ Ki rangbah ka Shekhem ki buh briew ban apthap ïa u Abimelekh ha ki kliar lum, bad ki la lute ïa uwei pa uwei uba ïaid lynti nangta. La ïathuh ïa kane ha u Abimelekh.

²⁶ Nangta u Gaal u khun jong u Ebed u wan sha Shekhem lem bad la ki hynmen ki para shynrang, bad ki rangbah ka Shekhem ki buh ïa ka jingshaniah ha u.

²⁷ Baroh ki ïaleit sha la ki bri sohwaiñ bad kheit ïa ki sohwaiñ, ki shna waiñ na ki, bad ki pynlong ka jingïaleh kmen. Ki leit sha ka templ jong u blei jong ki, ha kaba ki la ïabam bad ïadih bad ki krenbeiñ ïa u Abimelekh.

²⁸ U Gaal u ong, “Ki rangbah kiba kumno ngi long ha Shekhem? Balei ba ngi shakri ïa u Abimelekh? U dei uei uta? U khun jong u Gideon! Bad u Sebul u la ïoh hukum na u, hynrei balei ngi dei ban shakri ïa u? To ïaineh ha u Hamor, u kpa tymmen jong phi, uba la seng ïa ka kur jong phi!

²⁹ Nga pyrkhat ba ngan ïoh ïalam ïa kine ki briew! ngan jin da la pynher krad ïa u Abimelekh! Ngan ong ïa u, ‘Pynbun shuh shuh ïa ka kynhun shipai jong me, ale to mih ban ïaleh!’ ”

³⁰ U Sebul, u nongsynshar jong ka nongbah, u bitar lep haba u ïohsngew aïu u Gaal u ong.

³¹ U phah ki nonglamktien sha u Abimelekh ha Arumah ban ong, “U Gaal u khun jong u Ebed bad ki hynmen ki para shynrang jong u ki la wan sha Shekhem, bad kin ym shah ïa phi ban wan rung shapoh ka nongbah.

³² Mynta te, ma phi lem bad ki rangbah jong phi phin ïaid da miet bad rieh ha ki lyngkha.

³³ Khie joit lashai mynstep ha ka por ba mih ka sngi bad pynlong ka jingtur ïaleh kaba kynsan halor ka nongbah. Nangta haba u Gaal bad la ki rangbah ki mih shabar pyrshah ïa phi, tied tyngeh ïa ki kat kaba phi lah!”

³⁴ Kumta u Abimelekh lem bad ki rangbah jong u baroh ki la mih mynmiet bad ki rieh shabar ka Shekhem ha ki saw kynhun.

³⁵ Haba u Abimelekh bad ki rangbah jong u ki ïohi ïa u Gaal ba u mih shabar bad ïeng ha khyrdop shnong, ki ïeng joit na la ki jakarieh.

³⁶ U Gaal u ïohi ïa ki, bad u ong ha u Sebul, “Ha khmih! La don ki briew kiba wan hiar na kliar ki lum! “Kito kim dei ki briew,” jubab u Sebul. “Ki shu long tang ki syrngiew halor ki lum.”

³⁷ U Gaal u ong biang, “Ha khmih! La don ki briew ki wan hiar napdeng u lum, bad kawei ka kynhun ka wan na ka lynti na u dieng Sning jong ki nongkhan!”

³⁸ Nangta u Sebul u ong ha u, “Shano kato ka jingkren kob jong me? Dei ma me uba ong balei ngin shakri ïa une u Abimelekh. Kine ki dei ki briew kiba me la krenbeiñ. Khie mih mynta bad ïaleh ïa ki.”

³⁹ U Gaal u ïalam ïa ki rangbah ka Shekhem bad u ïaleh ïa u Abimelekh.

⁴⁰ U Gaal u la phet ïap bad u Abimelekh u la beh kthong ïa u. Bun ngut ki la mynsaw, wat haduh khyrdop shnong.

⁴¹ U Abimelekh u shong ha Arumah, bad u Sebul u beh krad ïa u Gaal bad ïa ki hynmen ki para shynrang jong u na Shekhem, ba kumta kim lah shuh ban shong ban sah hangta.

⁴² Ha ka sngi kaba bud u Abimelekh u lap ba ki paid Shekhem ki la pynkhreh ban leit sha lyngkha;

⁴³ kumta u ïalam ïa la ki briew, u pynkhlad ïa ki ha ki lai kynhun, bad ki rieh apthap ha ki lyngkha. Haba u ïohi ïa ki briew ba ki mih shabar na ka nongbah, u la mih na la ka jakarieh ban pynïap ïa ki.

⁴⁴ Katba u Abimelekh bad ka kynhun jong u ki tur pynkloi sha khmat ban ïada ïa ka khyrdop shnong, kiwei pat ki ar kynhun ki tur ïaleh ïa ki briew hapoh lyngkha bad ki pynïap ïa ki baroh.

⁴⁵ Ka jingïaleh ka la neh baroh shi sngi. U Abimelekh u kurup ïa ka nongbah, u pynïap ïa ki briew jong ka, u pynkhyllem ïa ka, bad u tap ïa ka madan da ka mluh.

⁴⁶ Haba ki rangbah ba ha khmat eh ha ka kut ha Shekhem ki ïohsngew ïa kane, ki wad jingïada hapoh ka kut baskhem jong ka templ jong u Baal-jong-ka-Jutang.

⁴⁷ La ïathuh ha u Abimelekh ba ki la ïalum hangta,

⁴⁸ kumta u la leit kiew sha u Lum Salmon bad la ki rangbah. Hangta u shim uwei u sdie, u pom kawei ka tnat na u dieng, bad u bah ïa ka ha la ka tyrpeng. U ong ïa la ki rangbah ban pynkloi bad ban leh kumjuh.

⁴⁹ Kumta uwei pa uwei na ki u pom mar kawei ka tnat dieng, nangta ki la bud ïa u Abimelekh bad ki kynton shajrong ïa ki dieng pyrshah ïa ka kut baskhem. Ki wiang ding ïa ka, lem bad ïa ki briew hapoh jong ka, bad baroh ki briew jong kata ka kut ki la ïap — kumba shihajar ngut ki shynrang bad kynthei.

⁵⁰ Nangta u Abimelekh u leit sha Thebes, u kerkut ïa kata ka nongbah, bad u kurup ïa ka.

⁵¹ La don uwei u mot baskhem hangta, bad uwei pa uwei u shynrang bad ka kynthei ha ka nongbah, kynthup ïa ki nongïalam, ki mareh sha u. Ki khang ïa lade shapoh bad ki kiew shalor ka tnum.

⁵² Haba u Abimelekh u wan ban tur ïaleh ïa uta u mot, u la leit sha ka jingkhang bad thang ïa uta u mot.

⁵³ Hynrei kawei ka kynthei ka pynhap najrong da u mawtylliat halor ka khlieh jong u, bad ka shynrong khlieh jong u ka la pait.

⁵⁴ Mar kumta, u khot kyrkieh ïa u samla uba bah ïa ki atiar ïaleh jong u, bad u hukum ïa u, “Sei ïa la ka waitlam bad pynïap ïa nga. Ngam kwah ba yn ong ba ka kynthei ka la pynïap ïa nga.” Kumta u samla u dung lyngba ïa u, bad u la ïap.

⁵⁵ Haba ki Israel ki ïohi ba u Abimelekh u la ïap, baroh ki leit phai noh sha ïing.

⁵⁶ Bad kumta ka long ba U Blei u siew kylliang ïa u Abimelekh namar ka kam sniew kaba u la leh pyrshah ïa la u kpa ha kaba pynïap ïa ki hynñiewphew ngut ki hynmen ki para shynrang jong u.

⁵⁷ U Blei u la pynlong ruh ïa ki rangbah ka Shekhem ban shitom namar ka jingbymman jong ki, kumba u Jotham, u khun jong u Gideon, u ong ïa ki ba kin long kumta haba u la tim ïa ki.