NONGBISHAR 8 - Khasi CL Bible (BSI)

Ka jingshahjop kaba khatduh jong ki Midian

¹ Nangta ki paid Ephraim ki ong ha u Gideon, “Balei phim shym khot ïa ngi haba phi la leit ban ïaleh ïa ki Midian? Balei phi leh kumne ïa ngi?” Ki la khñium tyngeh shaphang kane.

² Hynrei u ong ha ki, “Kaei kaba nga lah ban leh kam long ei ei haba nujor bad kaei kaba phi la leh. Wat kata kaba rit eh kaba ma phi ki paid Ephraim phi la leh ka long kaba kham kor shikatdei eh ban ïa kaei kaba ka kur jong nga baroh ka la leh.

³ Nalor kata, da ka bor ka jong U Blei phi la pynïap ïa ki ar ngut ki khlieh synshar jong ki Midian, u Oreb bad u Seeb. Nga la leh aïu ban ïanujor bad kata?” Haba u la kren ïa kane, kim shym la bitar shuh.

⁴ Ha kane ka por, u Gideon bad la ki laispah ngut ki rangbah ki la wan sha ka wah Jordan bad jam sha shiliang ïa ka. Ki la thait hi ïan, hynrei ki dang beh kthong ïa ki nongshun.

⁵ Haba ki poi ha Sukkoth, u ong ha ki rangbah jong kata ka nongrit, “Sngewbha ai ïa ki rangbah jong nga katto katne ki kpu. Ki la thait ïan, bad nga dang beh ïa u Sebah bad u Salmunna, ki syiem Midian.”

⁶ Hynrei ki rangbah jong ka Sukkoth ki ong, “Balei ngin ai jingbam ïa ka kynhun shipai jong phi? Phim pat shym la ïohkem ïa u Sebah bad ïa u Salmunna.”

⁷ Kumta u Gideon u ong, “To, kam lei lei! Haba U Trai u aiti ïa u Sebah bad ïa u Salmunna ha nga, ngan shoh ïa phi da ki shiah bad da ki shiah buid na ka ri shyiap!”

⁸ U Gideon u la leit sha Penuel bad u la kyrpad kumjuh ïa ki briew kiba hangta, hynrei ki briew jong ka Penuel ki la ai kajuh ka jubab kum ki rangbah jong ka Sukkoth.

⁹ Kumta u ong ha ki, “Ngan sa wan pat ha ka jingsuk jingsaiñ, bad haba nga wan, ngan pyntwa phum ïa une u mot!”

¹⁰ U Sebah bad u Salmunna ki don ha Karkor lem bad ka kynhun shipai jong ki. Na ka kynhun shipai baroh jong ki jaitbynriew ka ri shyiap, tang kumba khatsan hajar ngut ki dang sah; shi lakh arphew hajar ngut ki shipai ki la shah pynïap.

¹¹ U Gideon u ïaid na ka lynti na ki tduh jong ka ri shyiap, ha ka phang mihngi jong ka Nobah bad ka Jogbehah, bad u la tur ïaleh ïa ka kynhun shipai ha kaba kim shym poi pyrkhat.

¹² Ki ar ngut ki syiem Midian, u Sebah bad u Salmunna, ki her ïap, hynrei u beh kthong ïa ki bad u ïohkem ïa ki, bad u pynkulmar thlim ïa ka kynhun shipai jong ki baroh kawei.

¹³ Haba u Gideon u la wan phai na ka thma na ka lynti ka Khim Heres,

¹⁴ u la ïohkem ïa uwei u samla uba na Sukkoth bad u kylli ïa u. U samla u la thoh na ka bynta u Gideon ïa ki kyrteng jong ki hynñiewphew hynñiew ngut ki rangbah ba ha khmat eh jong ka Sukkoth.

¹⁵ Nangta u Gideon u leit sha ki rangbah jong ka Sukkoth bad u ong, “Kynmaw haba phi la kyntait ban ïarap ïa nga? Phi ong ba phim lah ban ai jingbam ei ei ïa ki shipai jong nga kiba la thait ïan namar ba ngam pat shym la ïohkem ïa u Sebah bad u Salmunna. Te, kine hangne!”

¹⁶ Nangta u shim ïa ki shiah bad ki dieng shiah na ka ri shyiap bad pyndonkam da ki ban pynshitom ïa ki nongïalam jong ka Sukkoth.

¹⁷ U la pyntwa ruh ïa u mot ha Penuel bad pynïap ïa ki rangbah jong kata ka nongbah.

¹⁸ Nangta u Gideon u kylli ïa u Sebah bad ïa u Salmunna, “Kumno shaphang ki briew kiba phi la pynïap ha Tabor?” Ki jubab, “Ki syriem ïa phi — uwei pa uwei na ki u syriem ïa u khun jong u syiem.”

¹⁹ U Gideon u ong, “Ki dei ki para jong nga, ki khun shynrang i mei jong nga. Nga smai da kaba kyntang ba lada phin shym la pynïap ïa ki, ngan ym pynïap ïa phi.”

²⁰ Nangta u ong ha u Jether, u khun nyngkong jong u, “Khie, pynïap ïa ki!” Hynrei uta u khynnah um shym sei ïa la ka waitlam. Um sngew nud, namar ba u dang long tang u khynnah.

²¹ Nangta u Sebah bad u Salmunna ki ong ha u Gideon, “Shim, pynïap hi ma phi ïa ngi. Ka dei ïa u rangbah ban leh ïa ka kam rangbah.” Kumta u Gideon u la pynïap ïa ki bad u shim ïa ki jingdeng kiba ha ki ryndang jong ki ut jong ki.

²² Hadien kata, ki Israel ki ong ha u Gideon, “To long u nongsynshar jong ngi — ma me bad ki khun ki ksiew hadien jong me. Me la pyllait im ïa ngi na ki Midian.”

²³ U Gideon u jubab, “Ngan ym long u nongsynshar jong phi, lymne u khun jong nga. U Trai un long u nongsynshar jong phi.”

²⁴ Hynrei u ong shuh shuh, “Shah ngan pan tang kawei na phi. Uwei pa uwei na phi un ai noh ha nga ïa ki sohshkor ba phi la shim.” (Ki Midian kum kiwei pat ki jaitbynriew ka ri shyiap, ki deng ki sohshkor ksiar.)

²⁵ Ki paidbah ki jubab, “Ngin ai ïa ki ha phi da kaba sngewbha.” Ki siang kawei ka jaiñ, bad uwei pa uwei u buh hangta ïa ki sohshkor ba u la shim.

²⁶ Ki sohshkor ksiar ba u Gideon u ïohpdiang ki khia la jan arphew kilo, bad kane kam shym kynthup ïa ki jingdeng, ki kpieng bad ki jaiñ sawbthuh ba ki syiem Midian ki kup, lymne ki jingdeng kiba don sawdong ki ryndang jong ki ut jong ki.

²⁷ U Gideon u shna ka bleithaw na ka ksiar bad u buh ïa ka ha la shnong, ha Ophrah. Baroh ki Israel ki la iehnoh ïa U Blei bad ki la leit shata ban mane ïa ka bleithaw. Ka la long ka jingriam ïa u Gideon bad ïa ka longïing jong u.

²⁸ Kumta ki Midian ki la shahjop ha ki Israel bad kim shym long shuh ka jingma ïa ki. Ka ri ka la don ha ka jingsuk haduh sawphew snem, haduh ba u Gideon u ïap.

Ka jingïap u Gideon

²⁹ U Gideon u leit phai pat sha la ïing bad u shongduh hangta.

³⁰ U la don hynñiewphew ngut ki khun shynrang, namar u don shibun ki tnga.

³¹ U don ruh kawei ka tnga kliar ha Shekhem; ka la kha uwei u khun na u bad u ai kyrteng ïa u, u Abimelekh.

³² U Gideon u khun jong u Joash u la ïap haba u la tymmen bha, bad la tep ïa u ha ka jingtep u Joash u kpa jong u, kaba ha Ophrah, ka nongrit jong ka kur Abieser.

³³ Hadien ka jingïap jong u Gideon, ki paid Israel kim shym ïaineh shuh bad U Blei bad ki la mane ïa ki Baal. Ki la pynlong ïa u Baal-jong-ka-Jutang ban long u blei jong ki,

³⁴ bad kim shym la shakri shuh ïa U Trai U Blei jong ki, uba la pynim ïa ki na ki nongshun baroh kiba sawdong jong ki.

³⁵ Kim shym sngewnguh ïa ka longïing jong u Gideon na ka bynta kaba bha baroh kaba u la leh ïa ki Israel.