Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

NONGBISHAR 7 - Khasi CL Bible (BSI)


U Gideon u jop ïa ki Midian

1 Ha kawei ka sngi u Gideon bad ki rangbah jong u baroh ki la khie dang step phyrngab bad ki la sher dara harud ka Umpohliew Harod. Ki Midian pat ki sher dara shaphang shatei na ki, ha ka them kaba harud u Lum Moreh.

2 U Trai u ong ha u Gideon, “Ki rangbah kiba me don, ki la bun eh ïa nga ban ai ha ki ka jingjop halor ki Midian. Ki lah ban pyrkhat ba ki la jop da lade hi, bad kumta kim ai burom ïa nga.

3 Pynbna ha u paidbah, ‘Uno uno uba sheptieng u dei ban leit phai noh sha ïing, bad ngi ngin sah hangne ha u lum Gilead.’ ” Kumta arphew ar hajar ngut ki leit phai noh, bad shiphew hajar ngut ki sah.

4 Nangta U Trai u ong ha u Gideon, “Me dang don bun bah ki rangbah. Ïalam ïa ki sha um, bad hangta ngan pynkhlad ïa ki na ka bynta jong me. Lada nga ong ha me ba u briew un leit bad me, un leit. Lada nga ong ha me ba u briew un ym leit bad me, un ym leit.”

5 U Gideon u ïalam ïa kita ki briew sha um, bad U Trai u ong ha u, “Pynkhlad ïa uwei pa uwei uba jliah ïa ka um da la u thylliej kum u ksew, na uwei pa uwei uba dem khohsiew ban dih um.”

6 La don laispah ngut ki rangbah kiba tong um da ki kti jong ki bad jliah ïa ka; baroh kita kiwei pat ki dem khohsiew ban dih um.

7 U Trai u ong ha u Gideon, “Ngan pyllait im ïa me bad ngan ai ha me ka jingjop halor ki Midian da ki laispah ngut ki rangbah kiba shu jliah ïa ka um. Ong ïa kiwei pat kin leit noh sha ïing.”

8 Kumta u Gideon u phah noh ïa kita ki Israel baroh sha ïing, lait noh ki laispah ngut, kiba la sumar ïa baroh ki jingbam bad ki turoi. Ka jaka sher dara jong ki Midian ka don sharum jong ki ha ka them.

9 Ha kata ka miet U Trai u hukum ïa u Gideon, “Khie joit bad tur ïaleh ïa kata ka jaka sher dara; nga ai ha me ka jingjop halor jong ka.

10 Hynrei lada me sheptieng ban tur ïaleh, leit hiar sha ka jaka sher dara lem bad u Purah u shakri jong me.

11 Men sa ïohsngew aïu ki ïakren, bad nangta men ïoh ka jingshlur ban tur ïaleh.” Kumta u Gideon bad u Purah u shakri jong u ki leit hiar sha ka tduh jong ka jaka sher dara jong ki nongshun.

12 Ki Midian, ki Amalek, bad ki jaitbynriew ka ri shyiap ki la saphriang ha ka them kum ka kynhun ki puit, bad ki la don bun bah ki ut kat ki symboh shyiap ka rud duriaw.

13 Haba u Gideon u la poi, u la ïohsngew ïa uwei u briew uba ïathuh ha la u paralok shaphang ka jingphohsniew. U ong, “Nga phohsniew ba uwei u kpu barli u tyllun sha ka jaka sher dara jong ngi bad u tyngkhuh ïa ka dara. Ka dara ka la kyllon bad ka don lyngktar ha madan.”

14 U paralok jong u, u phai ktien, “Ka dei ka waitlam jong u nong Israel, u Gideon u khun jong u Joash! Kam mut da kumwei pat! U Blei u la ai ha u ka jingjop halor ki Midian bad ïa ka kynhun shipai jong ngi baroh.”

15 Haba u Gideon u ïohsngew shaphang ka jingphohsniew jong uta u briew bad ba ka mut kumno, u dem khohsiew khrup bad u mane ïa U Trai. Nangta u leit phai pat sha ka jaka sher dara ki Israel, bad u ong, “Khie joit! U Trai u ai ha phi ka jingjop halor ka kynhun shipai jong ki Midian!”

16 U pynbynta ïa ki laispah ngut ki rangbah ha ki lai kynhun, bad u ai ha uwei uwei u briew kawei ka turoi bad uwei u khra uba don ka dongmusa hapoh jong u.

17 U ong ha ki, “Haba nga poi ha ka tduh ka jaka sher dara, khmih sha nga bad leh ïa kaba nga leh.

18 Ynda ma nga bad ka kynhun jong nga ngi put ïa la ki turoi, phi ruh put ïa la ki turoi baroh sawdong ka jaka sher dara, bad pyrta jam, ‘Ïa U Trai bad ïa u Gideon!’ ”

19 U Gideon bad ki shispah ngut ki rangbah ki la poi ha tduh kata ka jaka sher dara shuwa ka por shiteng synñia, hamar ba dang dep ïa-bujli ïa ki nongap phira. Nangta ki put ïa ki turoi bad ki pynpait ïa ki khra ba ki bat, bad kita ki ar kynhun ruh ki leh kumjuh.

20 Baroh ki bat ïa ki dongmusa ha la ki kti kadiang, ïa ki turoi ha la ki kti kamon, bad ki pyrta, “Ka waitlam ïa U Trai bad ïa u Gideon!”

21 Uwei pa uwei u ïeng ha la ka jaka sawdong ka jaka sher dara, bad ka kynhun shipai jong ki nongshun baroh ki phet ïap da kaba lynñiar.

22 Katba ki rangbah jong u Gideon ki dang put ïa la ki turoi, U Trai u la pynlong ïa ki kynhun shipai jong ki nongshun ban tur ïaleh para ma ki da la ki waitlam. Ki la mareh sha Sarethan haduh Beth Shittah, haduh ka nongrit jong ka Abel Meholah hajan ka Tabbath.

23 Nangta la khot ïa ki rangbah na ki jait Naphtali, Asher, bad na ka jait Manasseh baroh ar bynta, ki beh kthong ïa ki Midian.

24 U Gideon u la phah ïa ki nonglamktien sha ka ri lum Ephraim baroh ban ong, “Ale wan hiar ban ïaleh ïa ki Midian. Ïeng skhem ha ka wah Jordan bad ha ki wahduid haduh Bethbarah, ban khang ïa ki Midian na kaba jam ïa ki sha shiliang.” Ki rangbah Ephraim ki la ïalumlang, bad ki la ïeng skhem ha ka wah Jordan bad ha kita ki wahduid haduh Bethbarah.

25 Ki la kem ïa ki ar ngut ki khlieh synshar jong ki Midian, u Oreb bad u Seeb; ki la pynïap ïa u Oreb ha u Mawsiang Oreb bad ïa u Seeb ha ka Thliew khem um sohwaiñ jong u Seeb. Ki bteng ban beh kthong ïa ki Midian bad ki wallam ïa ki khlieh jong u Oreb bad u Seeb sha u Gideon, uba don mynta sha mihngi jong ka Jordan.

Khasi CL Bible

Copyright © Bible Society of India, 2016.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ