NONGBISHAR 6 - Khasi CL Bible (BSI)

U Gideon

¹ Sa shisien pat ki Israel ki la leh pop pyrshah ïa U Trai, kumta u shah ïa ki Midian ban synshar ïa ki haduh hynñiew snem.

² Ki Midian ki long kiba kham khlaiñ ban ïa ki Israel, bad ki paid Israel ki rieh ïa lade na ki ha ki krem bad ha kiwei pat ki jaka bashngain ha ki lumrit.

³ Man ka por ba ki Israel ki thung jingthung, ki Midian, ki wan bad ki Amalek, bad ki jaitbynriew ka ri shyiap ban tur ïaleh ïa ki.

⁴ Ki sher dara ha ka ri bad ki pynjot ïa ki jingthung baroh shaduh ka jaka bashaphang shathie sawdong ïa ka Gasa. Ki shim ïa baroh ki langbrot, ki jingri, bad ki kada, bad kim shym pynsah ei ei shuh ïa ki Israel ban bam.

⁵ Ki wan lem bad la ki jingri bad ki dara kumba rben ki kynhun puit. Ma ki lem bad ki ut jong ki, ki bun haduh katta katta ba ym lah ñiew shuh ïa ki. Ki wan bad pynjot thiaw ïa ka ri,

⁶ bad ki Israel kim lah leh ei ei pyrshah ïa ki.

⁷ Nangta ki paid Israel ki la kyang jam sha U Trai ban ïoh jingïarap pyrshah ïa ki Midian,

⁸ bad u la phah ha ki ïa u nongïathuhlypa uba wallam ha ki ïa kane ka khubor na U Trai, U Blei ki Israel: “Nga la wallam ïa phi na ka jinglongmraw ha Ijipt.

⁹ Nga la pyllait ïa phi na ki Ijipt bad na ki briew kiba ïaleh pyrshah ïa phi hangne ha kane ka ri. Nga la beh noh ïa ki katba phi nang tur sha khmat, bad nga la ai ha phi ïa ka ri jong ki.

¹⁰ Nga la ong ha phi ba nga long U Trai U Blei jong phi bad ba phim dei ban mane ïa ki blei jong ki Amor, ha ka ri jong ki ba phi ïashong mynta. Hynrei phim shym la shahshkor ïa nga.”

¹¹ Nangta u angel jong U Trai u la wan sha ka nongrit Ophrah bad u shong ha trai u dieng Sning jong u Joash, u briew na ka kur u Abieser. U Gideon u khun jong u, u dang shoh kew jar jar ha ka thliew khem um sohwaiñ, khnang ba ki Midian kin ym ïohi ïa u.

¹² U angel jong U Trai u la wanpaw ha u hangta, bad u ong, “U Trai u don ryngkat bad me, me u briew bashlur bad bakhlaiñ!”

¹³ U Gideon u ong ha u, “Kynrad, lada long ban kylli, balei kane ka wan jia ha ngi lada U Trai u don ryngkat bad ngi? Jia aïu ïa kiei kiei baroh kiba phylla kiba ki kpa jong ngi ki ïathuh ïa ngi ba U Trai u ju leh — kumno u la ïalam noh ïa ki na Ijipt? U Trai u la iehnoh ïa ngi bad u la ieh ïa ngi ha ka jingisynei jong ki Midian.”

¹⁴ Nangta U Trai u la hukum ïa u, “Khie leit da la ka bor bakhraw bad pyllait ïa ki Israel na ki Midian. Nga hi nga phah ïa me.”

¹⁵ U Gideon u jubab, “Hynrei Trai, kumno ngan lah ban pyllait ïa ki Israel? Ka kur jong nga ka long kaba tlot tam hapoh ka jait Manasseh, bad nga long uba rit tam na ki dkhot ka longïing jong nga.”

¹⁶ U Trai u jubab, “Me lah ban leh ïa ka namar ngan ïarap ïa me. Men pynlwet ïa ki Midian da kaba suk i kumba ki long tang uwei u briew.”

¹⁷ U Gideon u jubab, “Lada me sngewbha ïa nga, ai ha nga katto katne ka jingpynshisha ba me dei da shisha U Trai.

¹⁸ Wat pat leit tat ynda nga wanrah ha me ka jingainguh bam.” U jubab, “Ngan ap haduh ba men da wan phai pat.”

¹⁹ Kumta u Gideon u la leit sha la ïing bad u shet uwei u khunblang bad u la pyndonkam shiphew kilo u 'purew ban shet ïa u kpu khlem thiat. U buh ïa ka doh ha ka shang bad ïa ka syrwa hapoh u khiew, u la wallam ïa ki sha u angel jong U Trai ha trai u dieng Sning, bad u ai ïa ki ha u.

²⁰ U angel u hukum ïa u, “Buh ïa ka doh bad u kpu halor une u mawsiang, bad theh ïa ka syrwa halor jong ki.” U Gideon u leh kumta.

²¹ Nangta u angel jong U Trai u kner bad u pyndei ha ka doh bad u kpu da ka tduh jong u diengduh ba u bat. Ka ding ka la mih na u mawsiang bad ka la thang ïa kata ka doh bad ïa u kpu. Nangta u angel u jah noh jar.

²² Nangta u Gideon u la sngewthuh ba dei u angel jong U Trai ba u la ïohi, bad u ong ha ka jingsheptieng, “A Trai Bakhrawbor! Nga la ïohi ïa u angel jong me markhmat!”

²³ Hynrei U Trai u ong ha u, “Long ka jingsuk. Wat sheptieng. Men ym ïap.”

²⁴ U Gideon u tei hangta ka duwan ïa U Trai bad u khot kyrteng ïa ka, “U Trai u long ka Jingsuk.” (Ka dang ïeng ha Ophrah, kaba dei jong ki kur jong u Abieser.)

²⁵ Ha kata ka miet, U Trai u ong ha u Gideon “Shim ïa u masi kyrtong jong u kpa jong me bad uwei pat u masi kyrtong uba hynñiew snem ka rta, pynpra noh ïa ka duwan ba u kpa jong me u la tei ha u Baal, bad pynkhyllem ïa ka dak jong ka blei Asherah kaba don ha syndah jong ka.

²⁶ Tei ka duwan kaba la shna bha ïa U Trai U Blei jong me ha kliar kane ka kynton. Nangta shim ïa u masi kyrtong uba ar bad thang tylli ïa u kum ka jingainguh, da kaba pyndonkam diengthang da ki dak jong ka Asherah ïa kaba me la pynkhyllem.”

²⁷ Kumta u Gideon u shim shiphew ngut na ki shakri jong u bad u leh kumba U Trai u la bthah ïa u. U la sheptieng shikatdei eh ïa ka longïing bad ïa ki briew ha ka nongrit ban leh ïa ka ha ka por mynsngi, kumta u leh ïa ka ha ka por mynmiet.

²⁸ Haba ki briew ha ka nongrit ki khie dang step phyrngab ha ka step kaba bud, ki shem ba ka duwan ïa u Baal bad ka dak jong ka Asherah la pynkhyllem, bad ba la thang ïa u masi kyrtong uba ar halor ka duwan ïa kaba la tei hangta.

²⁹ Ki ïakylli para ma ki, “Uei uba la leh ïa kane?” Ki la tohkit bad shem ba u Gideon u khun jong u Joash u la leh ïa ka.

³⁰ Nangta ki ong ha u Joash, “Wallam shabar ïa u khun jong me hangne, ba ngin pynïap ïa u! U la pynkhyllem ïa ka duwan ïa u Baal bad pynngat ïa ka dak jong ka Asherah kaba ha syndah jong ka.”

³¹ Hynrei u Joash u ong ha kito baroh kiba ïeng pyrshah ïa u, “Hato phi ïeng na ka bynta u Baal? Hato phi ïasaid da ïa u? Uno uno uba ïasaid na ka bynta jong u un shah pynïap ha shuwa ka step. Lada u Baal u dei u blei, ieh un ïada hi ïa lade. Ka dei ka duwan jong u ïa kaba la pynkhyllem.”

³² Naduh kata ïa u Gideon la tip kum u Jerubbaal, namar u Joash u ong, “Ieh u Baal un ïasaid da hi ïa lade; ka dei ka duwan jong u ïa kaba la pynkhyllem.”

³³ Nangta ki Midian, ki Amalek, bad ki jaitbynriew ka ri shyiap ki ïalumlang baroh, ki jam sha shiliang ka wah Jordan, bad ki sher dara ha ka Them Jesreel.

³⁴ U mynsiem jong U Trai u bat synshar ïa u Gideon; bad u put ïa ka turoi ban khot ïa ki rangbah na ka kur Abieser ban bud ïa u.

³⁵ U phah ïa ki nonglamktien sha kylleng ki bynta jong ka jaka ki Manasseh ban khot ïa ki ban bud ïa u. U phah ïa ki nonglamktien sha ki jait Asher, Sebulun, bad ki Naphtali, bad ki ruh ki la wan ban ïasoh bad u.

³⁶ Nangta u Gideon u ong ha U Blei, “Me ong ba me la kut jingmut ban pyndonkam ïa nga ban pyllait ïa ki Israel.

³⁷ Te nga buh katto katne u shñiuh langbrot halor ka khyndew ha kaba ngi shoh kew. Lada ha ka por mynstep don umjer tang ha u shñiuh langbrot hynrei ym ha ka khyndew, te ngan tip ba men pyndonkam ïa nga ban pyllait ïa ki Israel.”

³⁸ Ka la long thik kumta. Haba u Gideon u la khie dang step phyrngab ha ka step kaba bud, u la khem ïa u shñiuh langbrot bad u la khyrwait ïa ka umjer na u ban pyndap ïa ka pliang da ka um.

³⁹ Nangta u Gideon u ong ha U Blei, “Wat bitar ïa nga; shah ngan tynjuh sa tang shisien. Sngewbha shah ïa nga ban pyrshang sa shisien da une u shñiuh langbrot. Ha kane ka sien, ai ba u shñiuh langbrot un rkhiang, bad ba ka khyndew pat kan jhieh.”

⁴⁰ Ha kata ka miet U Blei u leh ïa kata. Ha ka step kaba bud u shñiuh langbrot u rkhiang, hynrei ka khyndew ka la jhieh da ka umjer.