NONGBISHAR 5 - Khasi CL Bible (BSI)

Ka jingrwai jong ka Deborah bad u Barak

¹ Ha kata ka sngi ka Deborah bad u Barak u khun jong u Abinoam ki la rwai ïa kane ka jingrwai:

² Ïaroh ïa U Trai! Ki Israel ki la kut jingmut ban ïaleh; U paidbah da kaba kmen u tyrwa mon sngewbha.

³ To sngap, phi ki syiem! Pynshahshkor, phi ki nongsynshar! Ngan rwai bad tem jingtem ha U Trai, U Blei ki Israel.

⁴ Ko Trai, mynba me mihnoh na ki lum jong ka Seir, Haba me la mihnoh na ka thain Edom, Ka khyndew ka khynñiuh bad u slap u hap na sahit bneng. Ho-oid, la theh ïa ka um na ki lyoh.

⁵ Ki lumbah ki khynñiuh ha khmat U Trai jong u Lum Sinai, Ha khmat U Trai, U Blei ki Israel.

⁶ Ha ki sngi u Shamgar u khun jong u Anath, Ha ki sngi jong ka Jael, Ki kynhun nongkhaïi kim shym leit shuh lyngba ka ri, Bad ki nongleit jingleit ki pyndonkam ïa ki lynti na shadien.

⁷ Deborah, ki nongrit jong ka Israel ki sah kynjah, Ki ïeng thylli tad ynda pha wan, Pha wan kum ka kmie ïa ki Israel.

⁸ Nangta la don ka thma ha ka ri, Haba ki Israel ki jied ki blei thymmai. Na ki sawphew hajar ngut ki rangbah ha Israel Don mano mano ba rah ïa ka stieh ne u sum?

⁹ Ka dohnud jong nga ka long bad ki nongai hukum jong ki Israel, Lem bad u paidbah uba tyrwa mon sngewbha da kaba kmen. Ïaroh ïa U Trai!

¹⁰ Ïathuh ïa kata, phi kiba shong halor ki kada balieh, Kiba shong ha ki jin, Bad phi kiba hap ïaid kjat kat shaba phi leit.

¹¹ Sngap! Ki paid ba sawa sawdong ki pukri um Ki pynbna ïa ki jingjop jong U Trai, Ki jingjop jong ki paid Israel! Nangta ki briew jong U Trai ki ïaid arsut na ki nongbah jong ki

¹² Ïalam, Deborah, ïalam! Ïalam! Rwai ka jingrwai! Ïalam! Tur sha khmat, ko Barak, u khun jong u Abinoam, Ïalam noh ïa ki mraw jong me!

¹³ Nangta kita kiba lah ban shaniah ki la wan hiar sha la ki nongïalam; Ki briew jong U Trai ki la wan sha u da ka jinglakloi ban ïaleh.

¹⁴ Ki la wan na Ephraim sha ka them, Hadien ka jait Benjamin bad ki briew jong ka. Ki nongai hukum ki la wan hiar na Makhir, Ki rangbah pynïaidkam na Sebulun.

¹⁵ Ki nongïalam ka jait Issakhar ki wan bad ka Deborah; Ho-oid, ki Issakhar ki wan bad u Barak ruh, Bad ki la bud ïa u sha ka them. Hynrei ki jait Reuben kim ïabeit jingmut, Kim shym lah rai ban ïawan.

¹⁶ Balei ki sah shadien lem bad ki langbrot? Hato ban sngap ki nongap langbrot kiba khot ïa ki jingri? Ho-oid, ki jait Reuben kim ïabeit jingmut, Kim shym lah rai ban ïawan.

¹⁷ Ki jait Gad ki shongduh sha mihngi jong ka Jordan, Bad ki jait Dan ki ïai don ha ki lieng. Ki jait Asher ki shongduh harud ka duriaw, Ki ïai don harud ka duriaw.

¹⁸ Hynrei ki briew ka Sebulun bad Naphtali, Ki kheiñduh la ka jingim ha ka madan thma.

¹⁹ Ha Taanakh, harud ka wahduid jong ka Megiddo, Ki syiem ki la wan bad ïaleh; Ki syiem Kanaan ki la ïaleh, Hynrei kim shym ïoh rah ïa kano kano ka rupa.

²⁰ Ki khlur ki ïaleh na sahit bneng; Katba ki dang ïaid sha shiliang ka sahit bneng, Ki la ïaleh pyrshah ïa u Sisera.

²¹ Ka jingshlei um ha ka Kishon ka la rong noh ïa ki — Ka lat lat ka wah Kishon. Ngan nang ïaid, nang ïaid shaphrang, da ka jingkhlaiñ!

²² Nangta ki kulai kin wan ïaid, Ki da kyrdem ïa ka khyndew da ki poh'jat jong ki.

²³ “Buh ka jingtim halor ka Meros,” ong u angel jong U Trai, “Ka jingtim, ka jingtim halor kito kiba sah hangta. Kim shym la wan ïarap ïa U Trai, Kim shym wan kum ki shipai ban ïaleh pyrshah na ka bynta jong u.”

²⁴ Kaba donbok tam na ki kynthei ka dei ka Jael, Ka tnga jong u Heber u jait Ken; Kaba donbok tam na ki kynthei kiba shong ha ki dara.

²⁵ U Sisera u pan um, hynrei ka ai ha u da ka dud; Ka wanrah malai ïa u ha ka pliang kaba itynnat.

²⁶ Ka la shim ïa u snar pynskhem dara ha kawei ka kti, Bad ïa u tyrnem jong u nongtrei ha kawei pat ka kti; Ka tied ïa u Sisera bad ka pynpait ïa ka shynrong khlieh jong u; Ka pynpei phlait lyngba ka khlieh.

²⁷ U hap da ki khohsiew, U kyllon kram bad u thiah lyngktar ha ki kjat jong ka. Ha ki kjat jong ka u hap da ki khohsiew bad u kyllon; U kyllon kram ha madan, uba la ïap.

²⁸ Ka kmie jong u Sisera ka la khmih na ka jingkhangïit; Ka la phngoid na shadien ka jingker. “Balei ka kali ïapom jong u ka slem ban wan?” ka la ong. “Balei ki kulai jong u ki tud ban wan phai?”

²⁹ Ki paralok bastad ki phai ktien ïa ka, Bad ka ïai-ong shi ong kumta ha lade,

³⁰ “Ki dang ïawad ïa kiei kiei ban kurup bad ïabynta, Kawei lane ar ngut ki kynthei na ka bynta uwei uwei u shipai, ka jaiñ baremdor na ka bynta u Sisera, bad ki jaiñ ba la thain itynnat na ka bynta ka ryndang jong ka syiem.”

³¹ Ai ba ki nongshun jong me baroh kin ïap kumta, A Trai hynrei ai ba ki paralok jong me kin tyngshaiñ kum ka sngi kaba mih! Bad la don ka jingsuk ha ka ri haduh sawphew snem.