NONGBISHAR 4 - Khasi CL Bible (BSI)

Ka Deborah bad u Barak

¹ Hadien ba u Ehud u la ïap, ki paid Israel ki leh pop biang pyrshah ïa U Trai.

² Kumta U Trai u shah ba kin shahjop ha u Jabin, u syiem Kanaan uba la synshar ha ka nongbah Hasor. U rangbah ai hukum jong ka kynhun shipai jong u, u dei u Sisera, uba shong ha Harosheth-jong-ki-Jentil.

³ U Jabin u don khyndaispah tylli ki kali ïapom kiba da ka nar, bad u la synshar ïa ki Israel da kaba banbeiñ bad lehbor haduh arphew snem. Nangta ki paid Israel ki la kyang jam ha U Trai ban ïoh jingïarap.

⁴ Mynta ka Deborah, ka tnga jong u Lappidoth, ka long ka nongïathuhlypa, bad ka shakri kum ka nongbishar ïa ki Israel ha kata ka por.

⁵ Ka ju shong hapoh uwei u Dieng Tlai hapdeng ka Ramah bad ka Bethel ha ka ri lum Ephraim, bad ki paid Israel ki ju leit hangta na ka bynta ki jingbishar jong ka.

⁶ Ha kawei ka sngi ka la phah khot ïa u Barak u khun jong u Abinoam na ka nongbah Kedesh kaba ha Naphtali bad ka ong ha u, “U Trai, U Blei ki Israel, u la ai ha me ïa kane ka hukum: ‘Shim shiphew hajar ngut ki rangbah na ki jait Naphtali bad Sebulun bad ïalam ïa ki sha u Lum Tabor.

⁷ Ngan wallam ïa u Sisera, u rangbah ai hukum jong ka kynhun shipai jong u Jabin, ban ïaleh pyrshah ïa phi ha ka wah Kishon. Un don ki kali ïapom bad ki shipai, hynrei ngan ai ha me ka jingjop halor jong u.’ ”

⁸ U Barak u jubab, “Ngan leit lada phin leit ryngkat bad nga; hynrei lada phim leit bad nga, nga ruh ngan ym leit.”

⁹ Ka jubab, “Ñiuma, ngan leit ryngkat bad phi, hynrei phin ym ïoh burom ei ei ïa ka jingjop, namar U Trai un aiti ïa u Sisera ha ka kynthei.” Kumta ka Deborah ka leit bad u Barak sha Kedesh.

¹⁰ U Barak u la khot ïa ki jait Sebulun bad Naphtali sha Kedesh, bad shiphew hajar ngut ki rangbah ki la bud ïa u. Ka Deborah ka la leit bad u.

¹¹ Ha kajuh ka por, u Heber u jait Ken u pynïeng la ka dara marjan ïa ka Kedesh hajan u dieng Sning ha Saanannim. U la kynriah noh na kiwei pat ki jait Ken, ki khun ki ksiew jong u Hobab, u kynum jong u Moses.

¹² Haba u Sisera u tip ba u Barak u la leit kiew sha u Lum Tabor,

¹³ u la khot ïa ki khyndaispah tylli ki kali ïapom kiba da ka nar bad ïa ki rangbah jong u baroh, bad u la phah ïa ki na Harosheth-jong-ki-Jentil sha ka wah Kishon.

¹⁴ Nangta ka Deborah ka ong ïa u Barak, “Khie leit! U Trai u ïalam ïa me! Ha kane ka sngi u la ai ha me ka jingjop halor u Sisera.” Kumta u Barak u la leit arsut na u Lum Tabor lem bad ki shiphew hajar ngut ki rangbah jong u.

¹⁵ Haba u Barak u tur ïaleh lem bad la ka kynhun shipai, U Trai u buh ïa u Sisera ha ka jingshaïong jingmut lem bad ki kulai ïapom bad ki rangbah jong u baroh. U Sisera u hiar na la ka kali ïapom bad u phet ïap da ka kjat.

¹⁶ U Barak u beh kthong ïa ki kali ïapom bad ïa ka kynhun shipai sha Harosheth-jong-ki-Jentil, bad la pynïap plain ïa ka kynhun shipai jong u Sisera. Ym don uwei ruh u briew uba lait im.

¹⁷ U Sisera u phet ïap sha ka dara jong ka Jael, ka tnga jong u Heber u jait Ken, namar u Jabin u syiem ka Hasor u don ha ka jingïasuk bad ka longïing jong u Heber.

¹⁸ Ka Jael ka mih shabar ban ïakynduh ïa u Sisera bad ka ong ha u, “Ale shapoh, kynrad; wan sha ka dara jong nga. Wat sheptieng.” Kumta u leit shapoh, bad ka pynrieh ïa u hadien ka pyrda.

¹⁹ U ong ïa ka, “Sngewbha ai umdih ïa nga; nga sliang.” Ka plied ïa ka pla snieh dud bad ka ai dih ïa u, bad ka la pynrieh biang ïa u.

²⁰ Nangta u ong ïa ka, “Ïeng ha ka jingkhang jong ka dara, bad lada uno uno u wan bad kylli ïa phi la hangne don briew ne em, sa ong em.”

²¹ U Sisera u la thait haduh katta katta ba u da ïohthiah jar. Nangta ka Jael ka shim ïa u tyrnem bad u snar pynskhem dara, ka la leit mian mian sha u, bad ka pynïap ïa u da kaba sah ïa u snar na ka moi moi jong u ha ban da pei phlait haduh khyndew.

²² Haba u Barak u wan wad ïa u Sisera, ka Jael ka mih shabar ban ïakynduh ïa u, bad ka ong ha u, “Ale hangne! Ngan pyn-i ha phi ïa u briew uba phi wad.” Kumta u la leit shapoh bad ka, bad hangta ha madan don u Sisera, uba la ïap, bad u snar pynskhem dara lyngba ka khlieh jong u.

²³ Ha kata ka sngi U Blei u ai ha ki Israel ka jingjop halor u Jabin, u syiem Kanaan.

²⁴ Ki thom sa thom pyrshah ïa u haduh ba ki da pynjot thiaw ïa u.