NONGBISHAR 3 - Khasi CL Bible (BSI)

Ki jaitbynriew kiba dang sah ha ka ri

¹ Kumta te, U Trai u iehnoh katto katne ki jaitbynriew ha ka ri ban tynjuh ïa ki Israel ki bym pat mad ïa ki thma ha ri Kanaan.

² U la leh ïa kane khnang ban hikai ïa kawei pa kawei ka pateng jong ki Israel shaphang ka thma, khamtam ïa kito ki bym pat ju mad ïa ka thma mynshuwa.

³ Kito kiba dang sah ha kata ka ri ki long ki san ngut ki syiem Philistia, ki Kanaan baroh, ki Sidon, bad ki Hib kiba shong ha ki Lum Lebanon naduh u Lum Baal Hermon haduh ka Khim Hamath.

⁴ Kine ki long ban tynjuh ïa ki Israel, ban lap la kin kohnguh ne em ïa ki hukum ba U Trai u la ai ha ki kpa tymmen jong ki da u Moses.

⁵ Bad kumta ki paid Israel ki la shongduh hapdeng ki Kanaan, ki Hit, ki Amor, ki Peris, ki Hib, bad ki Jebus.

⁶ Ki la ïashongkha khleh bad ki, bad ki la mane ïa ki blei jong ki.

U Othniel

⁷ Ki paid Israel ki la klet ïa U Trai U Blei jong ki; ki la leh pop pyrshah ïa u bad mane ïa ki bleithaw Baal bad Asherah.

⁸ Kumta U Trai u la bitar lep ïa ki Israel bad u shah ïa u Kushan Rishathaim u syiem ka Mesopotamia ban jop ïa ki. Bad u synshar halor jong ki haduh phra snem.

⁹ Te ki Israel ki la kyang ha U Trai, bad u la phah ïa uwei u briew ban pyllait ïa ki. Une u dei u Othniel, u khun jong u Kenas uba dei u para jong u Kaleb.

¹⁰ U Mynsiem jong U Trai u la wan ha u, bad u kylla long u nongïalam jong ki Israel. U Othniel u leit sha ka thma, bad U Trai u la ai ha u ka jingjop halor u syiem ka Mesopotamia.

¹¹ La don ka jingsuk ha ka ri haduh sawphew snem, bad nangta u Othniel u la ïap.

U Ehud

¹² Ki paid Israel ki la leh pop biang pyrshah ïa U Trai. Namar kane keiñ U Trai u la pynkhlaiñbor ïa u Eglon u syiem ka Moab ban ïa ki Israel.

¹³ U Eglon u la ïasoh lang bad ki Ammon bad ki Amalek; kine ki la jop ïa ki Israel bad ki la ïohknieh ïa ka Jerikho, ka nongbah ki dieng Tlai.

¹⁴ Ki Israel ki la hap hapoh u Eglon haduh khatphra snem.

¹⁵ Nangta ki Israel ki la kyang jam ha U Trai, bad u la phah ïa uwei u briew ban pyllait ïa ki. Une u dei u Ehud, u briew uba trei da kadiang, u khun jong u Gera na ka jait Benjamin. Ki paid Israel ki phah ïa u Ehud ban leit ai ïa ki jingai sngewbha sha u Eglon u syiem Moab.

¹⁶ U Ehud u shna da lade hi kawei ka waitlam arliang syrti kaba shi phut shiteng ka jingjrong. U teh ïa ka ha ka liang kamon jong u hapoh la ki jaiñkup.

¹⁷ Nangta u leit rah ïa ki jingai sngewbha sha u Eglon, uba long u briew uba sngaid shibun.

¹⁸ Haba u Ehud u la dep ai ha u ïa ki jingai sngewbha, u la ong ha ki rangbah kiba la kit ïa kita ban leit phai noh pat sha ïing.

¹⁹ Hynrei u Ehud ïa lade u la kylla dien ha ki maw ba la ohdur hajan Gilgal, u la leit biang sha u Eglon, bad u ong, “Syiem Kynrad, nga don ka khubor barieh na ka bynta jong phi.” Kumta u syiem u hukum ïa la ki shakri, “Ieh ïa ngi tang baroh ar ngut!” Bad baroh ki la ïamih shabar.

²⁰ Nangta, katba u syiem u dang shong hangta marwei ha la ka kamra shong pyngngad halor tnum ïing, u Ehud u la leit sha u, bad u ong, “Nga don ka khubor na U Blei sha phi.” U syiem u la ïeng joit.

²¹ U Ehud pat da la ka kti kadiang u sei ïa ka waitlam na ka liang kamon jong u bad u dung pynngam ïa ka ha ka kpoh jong u syiem.

²² Ka waitlam baroh kawei lem bad ka sping ka la rung shapoh bad ka khleiñ ka la tap ïa ka. U Ehud um shym la sei ïa ka na ka kpoh jong u syiem, bad ka la pei bla shadien, hapdeng ki kjat jong u.

²³ Nangta u Ehud u la mihnoh shabar, u khang ïa ki jingkhang hadien jong u, u khang tala ïa ki, bad u leit noh.

²⁴ Ki shakri ki la ïawan bad ïohi ba ki jingkhang ki dang khang, Hynrei ki shu pyrkhat ba u syiem u don hapoh bad ba u dang leit rud.

²⁵ Ki la ap haduh ba ki dang lah ban ap, hynrei haba um shym la plie ïa ka jingkhang, ki la shim ïa u shabi bad plie ïa ka. Bad hangta u don u kynrad jong ki, u da thiah ïap ha madan.

²⁶ U Ehud u la ïohphet katba ki dang ïa-ap. U la leit narud ki maw ba la ohdur bad u leit poi sha Seirah.

²⁷ Haba u poi hangta ha ka ri lum ki Ephraim, u la put ïa ka turoi ban khot ïa ki paid Israel sha ka thma; nangta u la ïalam ïa ki arsut na ki lumrit.

²⁸ U ong ha ki, “Bud ïa nga! U Trai u la ai ha phi ka jingjop halor ki Moab, ki nongshun jong phi.” Kumta ki la bud arsut ïa u Ehud bad ki la ïohknieh ïa ka jaka ha kaba ki Moab ki dei ban jam ïa ka Jordan; kim shym pyllait wat tang uwei u briew ruh ban jam.

²⁹ Ha kata ka sngi ki la pynïap kumba shiphew hajar ngut ki shipai Moab kiba kynsai tam; ym don uwei na ki ruh uba lait im.

³⁰ Ha kata ka sngi ki Israel ki la jop ïa ki Moab, bad ka jingsuk ka la don ha ka ri haduh phraphew snem.

U Shamgar

³¹ U nongïalam uba bud u dei u Shamgar, u khun jong u Anath. Une ruh u la pyllait ïa ki Israel, bad u la leh kumta da kaba pynïap hynriewspah ngut ki Philistia da u dieng ñiah masi.