NONGBISHAR 2 - Khasi CL Bible (BSI)

U Angel jong U Trai ha Bokhim

¹ U angel jong U Trai u leit na Gilgal sha Bokhim bad u ong ha ki Israel, “Nga la shim ïa phi na Ijipt bad wallam ïa phi sha ka ri kaba nga la kular ha ki kpa tymmen jong phi. Nga la ong, ‘Ngan ym pynkheiñ lano lano ïa ka jutang jong nga bad phi.

² Phim dei ban ïateh jutang bad ki briew kiba shong ha kane ka ri. Phi dei ban pynpra ïa ki duwan jong ki.’ Hynrei phim shym la leh ïa kaei kaba nga la bthah ïa phi. Phi la leh pynban ïa kaba pyrshah!

³ Kumta nga ong ïa phi mynta ba ngan ym beh noh ïa kine ki briew katba phi nang ïaid sha khmat. Kin long ki nongshun jong phi, bad phin shah riam da ka jingmane ïa ki blei jong ki.”

⁴ Haba u angel u la kren ïa kane, ki paid Israel baroh ki la sdang ban ïam,

⁵ bad dei namar kata keiñ ba ïa ka jaka la khot ka Bokhim. Hangta ki la ai jingkñia ha U Trai.

Ka jingïap u Joshua

⁶ U Joshua u la phah ïa ki paid Israel ha la ka lynti, bad uwei pa uwei u briew u la leit ban shim kynti ïa la ka bhah jong ka ri.

⁷ Katba u Joshua u dang im, ki paid Israel ki shakri ïa U Trai, bad wat hadien ka jingïap jong u ki ïai leh kumta katba dang im ki nongïalam kiba la ïohi da lade ïa kiei kiei kiba khraw kiba U Trai u la leh na ka bynta ki Israel.

⁸ U Joshua u shakri U Trai, u khun jong u Nun, u la ïap ha ka rta kaba shispah shiphew snem.

⁹ La tep ïa u ha ka ri kynti jong u hi ha Timnath Serah ha ka ri lum Ephraim kaba shaphang shatei jong u Lum Gaash.

¹⁰ Kata ka pateng bynriew baroh ka la ïap, bad ka pateng bynriew kaba bud ka la klet ïa U Trai bad ïa kaei kaba u la leh na ka bynta ki Israel.

Ki Israel ki sangeh ban mane ïa U Trai

¹¹ Nangta ki paid Israel ki la leh pop pyrshah ïa U Trai bad ki la sdang ban shakri ïa ki Baal.

¹² Ki la sangeh ban mane ïa U Trai, U Blei ki kpa tymmen jong ki, U Blei uba la wallam ïa ki na Ijipt, bad ki la sdang ban mane ïa kiwei pat ki blei, ki blei jong ki jaitbynriew kiba don sawdong jong ki. Ki mane dem ïa ki, bad ki la pynlong ïa U Trai ban bitar.

¹³ Ki la sangeh ban mane ïa U Trai bad ki la shakri ïa ki blei Baal bad Astarte.

¹⁴ Bad kumta U Trai u bitar lep ïa ki Israel bad u la shah ïa ki nonglute ban tur ïaleh bad lute ïa ki. U shah ïa ki nongshun kiba sawdong jong ki ban thombor ïa ki, bad ki Israel kim lah shuh ban ïada ïa lade.

¹⁵ Man ka por ba ki leit sha ka thma, U Trai u long pyrshah ïa ki, kumba u la lah ong ba un leh kumta. Ki la don ha ka jingkhuslai bakhraw.

¹⁶ Nangta U Trai u la ai ha ki Israel ïa ki nongïalam kiba la pyllait im ïa ki na ki nonglute.

¹⁷ Hynrei ki Israel kim shym shahshkor ïa la ki nongïalam. Ki Israel kim shym la ïaineh ha U Trai bad ki la mane ïa kiwei pat ki blei. Ki kpa jong ki, ki la kohnguh ïa ki hukum jong U Trai, hynrei kane ka pateng bathymmai shen ka la sangeh ban leh kumta.

¹⁸ Man ba U Trai u ai ha ki Israel ïa u nongïalam, U Trai u ïarap ïa uta u nongïalam bad u pyllait im ïa ki briew na ki nongshun jong ki katba uta u nongïalam u dang im. U Trai u sngewsynei ïa ki namar ba ki la ud ha ki jingshitom bad jingshah banbeiñ jong ki.

¹⁹ Hynrei haba u nongïalam u ïap, ki briew ki phai biang sha la ki rukom barim bad ki im kham sniew ban ïa ka pateng ba ha shuwa. Ki shakri bad mane ïa kiwei ki blei, bad da ka jingtamsneng ki ïai leh ïa la ki rukom bymman.

²⁰ Nangta U Trai u bitar lep ïa ki Israel, bad u ong, “Kane ka jaitbynriew ka la pynkheiñ ïa ka jutang kaba nga la hukum ïa ki kpa tymmen jong ki ban sumar. Namar ba kim shym la kohnguh ïa nga,

²¹ ngan ym beh shuh ïa kano kano na ki jaitbynriew kiba dang don ha ka ri haba u Joshua u la ïap.

²² Ngan pyndonkam ïa ki ban shem la kine ki Israel kin bud ne em ïa ki lynti jong nga, kumba ki kpa tymmen jong ki, ki la leh.”

²³ Kumta U Trai u la shah ïa kine ki jaitbynriew ban ïaisah ha ka ri; um shym la ai ha u Joshua ka jingjop halor jong ki, lymne beh noh shen ïa ki hadien ka jingïap jong u Joshua.