NONGBISHAR 16 - Khasi CL Bible (BSI)

U Samson ha Gasa

¹ Ha kawei ka sngi u Samson u leit sha Gasa, ka shnong ki Philistia, hangta u ïakynduh ïa ka nuti bad u leit ïathiah bad ka.

² Ki nong Gasa ki shem ba u Samson u don hangta, kumta ki kerkut ïa kata ka jaka bad ki ap ïa u baroh shi miet ha khyrdop shnong. Ki ap jar jar baroh shi miet, da kaba pyrkhat ha lade, “Ngin ap haduh ban da kynjat shai, ban nangta ngin sa pynïap ïa u.”

³ Hynrei u Samson u thiah tang haduh shiteng synñia. U khie nangta bad u bat khak ïa ka khyrdop shnong bad u rat syndon ïa ka — ki jingkhang, ki shawkad, u nar-khang bad baroh. U bah ïa ki ha la ka tyrpeng bad u rah ïa ki baroh artet lynti sha kliar jong u lum uba marpyrshah ïa ka Hebron.

U Samson bad ka Delilah

⁴ Hadien kane, u Samson u ibha ïa kawei ka briew kaba kyrteng ka Delilah, kaba shong basah ha ka Them Sorek.

⁵ Ki san ngut ki syiem Philistia ki leit sha ka bad ki ong, “Khroh ïa u Samson ban ïathuh ha pha balei ba u long uba khlaiñbor bad kumno ngin lah ban jop ïa u, khum ïa u bad pynlong ba un ym lah leh ei ei shuh. Uwei pa uwei na ngi un ai ïa pha mar shihajar shispah tylli ki sbai rupa.”

⁶ Kumta ka Delilah ka ong ha u Samson, “Sngewbha ïathuh ïa nga kaei kaba pynlong ïa phi ban long uba khlaiñbor bha. Lada uno uno u kwah ban khum ïa phi bad pynlong u bym lah shuh ban leh ei ei, da kumno un leh ïa kata?”

⁷ U Samson u jubab, “Lada ki khum ïa nga da ki hynñiew tylli ki 'saisiej thymmai ki bym pat ïap saw, ngan duh bor, bad ngan long uba tlot bor kumba long lem kiwei.”

⁸ Kumta kita ki syiem Philistia ki wanrah ha ka Delilah hynñiew tylli ki 'saisiej thymmai ki bym pat ïap saw, bad ka khum ïa u Samson da ki.

⁹ Ka la pynbeit ban don katto katne ki rangbah ha kawei pat ka kamra, kumta ka pyrta, “Samson! Ki Philistia ki la wan!” Hynrei u bthat ïa kita ki 'saisiej kumba dkut u 'saihon haba dei ding. Kumta kim shym tip satia ïa kaba rieh ka borbah jong u.

¹⁰ Ka Delilah ka ong ha u Samson, “Peit, phi la pynlong ka bieit ïa nga bad phim ïathuh ha nga ïa kaba shisha. Sngewbha ïathuh ïa nga kumno yn lah ban khum ïa phi.”

¹¹ U jubab, “Lada ki khum ïa nga da ki tyllai kiba thymmai ki bym pat la ju pyndonkam, ngan long uba tlot bor kumba long lem kiwei.”

¹² Kumta ka Delilah ka shim ki tyllai kiba thymmai bad ka khum ïa u. Nangta ka pyrta, “Samson! Ki Philistia ki la wan!” Ki rangbah ki ap ha kawei pat ka kamra. Hynrei u bthat ïa kita ki tyllai na ki ksang'ti jong u kum ïa u 'saihon.

¹³ Ka Delilah ka ong ïa u Samson, “Haduh mynta phi dang pynlong ka bieit ïa nga bad phim ïathuh ïa kaba shisha. Ïathuh ïa nga kumno yn lah ban khum ïa phi.” U jubab, “Lada phi thain ïa kine ki kynthrong shñiuh jong nga hynñiew tylli bad phi pynskhem ïa ki da ki snar ïingjaiñ, ngan long uba tlot bor kumba long lem kiwei.”

¹⁴ Ka Delilah nangta ka kynoi thiah ïa u, ka shim ïa kita ki kynthrong shñiuh jong u, bad ka thain hynñiew tylli ïa ki. Ka pynskhem ïa ki da ki snar ïingjaiñ bad ka pyrta, “Samson! Ki Philistia ki la wan!” Hynrei u khie joit bad u law pynsynjor ïa la u shñiuh na kata ka jingthain.

¹⁵ Kumta ka ong ha u, “Kumno phi lah ban ong ba phi ieit ïa nga haba phim mut kumta? Phi pynlong ka bieit ïa nga la lai sien, bad phim pat shym la ïathuh satia ha nga kaei kaba pynlong ïa phi uba khlaiñbor bha.”

¹⁶ Ka ïai kylli ïa u kawei ka sngi hadien kawei pat. U da ngiah hi shoiñ bad thait ïa ka jingthlia jong ka ïa u shaphang kata.

¹⁷ Ha kaba khatduh u ïathuh ha ka ïa ka jingshisha. “Ïa u shñiuh jong nga ym pat ju khap,” u ong, “Ïa nga la pynkyntang sha U Blei kum u Nasir naduh ka por ba kha ïa nga. Lada la khi ïa u shñiuh jong nga, ngan duh noh ïa ka bor bad ngan long uba tlot kumba long lem kiwei.”

¹⁸ Haba ka Delilah ka sngewthuh ba u la ïathuh ha ka ïa ka jingshisha, ka phah ktien sha ki syiem Philistia bad ka ong, “Wan biang sa shisien. U la ïathuh ha nga ïa ka jingshisha.” Kumta ki la ïawan bad ki wanrah artat ïa ki sbai rupa.

¹⁹ Ka Delilah ka kynoi thiah ïa u Samson ha pneh jong ka bad nangta ka khot ïa uwei u briew, uba khi noh ïa kita ki hynñiew tylli ki kynthrong shñiuh jong u Samson. Kumta ka sdang ban pynsaja ïa u, naba u la duh noh ïa ka bor jong u.

²⁰ Nangta ka pyrta, “Samson! Ki Philistia ki la wan!” U khie joit bad u pyrkhat, “Ngan pynsynjor bad pyllait war, kumba mynshuwa.” Um shym tip ba U Trai u la iehnoh ïa u.

²¹ Ki Philistia ki kem ïa u bad ki khlaw ïa ki khmat jong u. Ki ïalam ïa u sha Gasa, ki teh ïa u da ki kynjri rnong, bad ki pyntrei ïa u ha ka kor tylliat hapoh byndi.

²² Hynrei u shñiuh u sdang ban san biang.

Ka jingïap u Samson

²³ Ki syiem Philistia ki ïalumlang ban ïaleh sngewbha bad ban ai ïa ka jingainguh kaba khraw ïa u Dagon u blei jong ki. Ki ïarwai, “U blei jong ngi u la ai ha ngi ka jingjop ïa u Samson u nongshun jong ngi.”

^24-25 Ki ïalehkmen para ma ki, kumta ki ong “Khot ïa u Samson, bad ngin phah ïa u ban pynbyrngia ïa ngi!” Haba ki la wallam ïa u Samson na ka byndi, ki phah ba un pynbyrngia ïa ki bad ki pynïeng ïa u hapdeng ki rishot. Haba ki briew ki la ïohi ïa u, ki rwai ïaroh sha u blei jong ki: “U blei jong ngi u la ai ha ngi ka jingjop halor u nongshun jong ngi, uba la pynjot ïa ka ri jong ngi bad uba la pynïap shibun na ngi!”

²⁶ U Samson u ong ïa u khynnah uba btin ïa u na ka kti, “Ai ba ngan ktah ïa ki rishot kiba kyrshan ïa kane ka ïing. Nga kwah ban shaniah ha ki!”

²⁷ Kata ka ïing ka khapngiah da ki shynrang bad ki kynthei. Ki syiem Philistia baroh san ngut ki don hangta, bad ki don kumba lai hajar ngut ki rangbah bad ki kynthei halor tnum ïing, kiba khmih kai ïa u ba u pynbyrngia ïa ki.

²⁸ Te u Samson u duwai, “A Trai Bakhraw, to kynmaw ïa nga, ai ha nga ïa ka bor sa tang shisien, khnang ba tang da kane ngan lah ban pynhiarkput ïa ki Philistia namar ba ki la khlaw ïa ki khmat jong nga baroh ar.”

²⁹ U Samson u bat ïa kita ki rishot pdeng ar tylli kiba kyrshan ïa kata ka ïing. Da kaba buh ïa kawei ka kti ha uwei u rishot bad kawei pat ha uwei u rishot, u khynñiat pyrshah ïa ki

³⁰ bad u pyrta, “Ai ngan ïap bad ki Philistia!” U khynñiat da ka bor jong u baroh, bad kata ka ïing ka la khyllem halor ki san ngut ki syiem bad ki briew baroh kiba don ha ka. U Samson u la pynïap kham bun ha ka por ba u ïap ban ïa kita kiba u la pynïap mynba u dang im.

³¹ Ki para bad ki ba-ha-ïing jong u baroh ki wan shim bad rah noh ïa ka met jong u. Ki shim pat ïa u bad ki tep ïa u ha ka jingtep u Manoah u kpa jong u, kaba hapdeng ka Sorah bad ka Eshtaol. U la long u nongïalam ïa ki Israel arphew snem.