NONGBISHAR 12 - Khasi CL Bible (BSI)

U Jephthah bad ki Ephraim

¹ Ki rangbah Ephraim ki khreh ban ïaleh thma; ki jam ïa ka wah Jordan sha Saphon bad ki ong ha u Jephthah, “Balei phi leit ïaleh ïa ki Ammon khlem da khot lem ïa ngi ban leit lang bad phi? Ngin thang im ïa me hapoh ïing!”

² Hynrei u Jephthah u ong ha ki, “Ma nga bad ki briew jong nga ngi don ka jingïakajia kaba jur bad ki Ammon. Nga la khot ïa phi, hynrei phim shym la wan pyllait ïa nga na ki.

³ Haba nga la ïohi ba phim shym wan ïarap ïa nga, nga la kheiñduh ïa la ka jingim bad nga jam ïa u pud ban ïaleh pyrshah ïa ki; bad U Trai u la ai ha nga ka jingjop halor jong ki. Te balei pat phi wan ban ïaleh ïa nga mynta?”

⁴ Hangta u Jephthah u lumlang ïa ki rangbah Gilead baroh, ki ïaleh ïa ki rangbah Ephraim, bad u jop ïa ki. (Naba ki Ephraim ki ong, “Phi ki Gilead kiba ha Ephraim bad Manasseh phi dei ki nongphetwir na Ephraim!”)

⁵ Khnang ban khangkdong ïa ki Ephraim, ki Gilead ki knieh ïa ki jaka na kiba lah ban jam ïa ka wah Jordan. Haba uno uno u Ephraim uba pyrshang ban phet u pan jingbit ban jam sha shiliang, ki rangbah Gilead ki kylli, “Phi dei u Ephraim?” Lada u ong, “Em.”

⁶ Ki bthah ïa u ban ong, “Shibboleth.” Hynrei un ong “Sibboleth,” namar um nang kynnoh beit ïa ka. Kumta ki kem bad ki pynïap ïa u ha kawei na kita ki jaka na kiba dei ban jam ïa ka Jordan. Sawphew ar hajar ngut ki Ephraim ki shah pynïap ha kata ka por.

⁷ U Jephthah u ïalam ïa ki Israel hynriew snem. Hadien kata u la ïap bad la tep ïa u ha shnong jong u kaba ha Gilead.

U Ibsan, u Elon, bad u Abdon

⁸ Hadien u Jephthah, u Ibsan uba na Bethlehem u ïalam ïa ki Israel.

⁹ U don laiphew ngut ki khun shynrang bad laiphew ngut ki khun kynthei. U pynshongkurim ïa la ki khun kynthei shabar na ka kur ka jait, bad u wanrah pat laiphew ngut ki samla kynthei nabar ka kur ka jait la jong ba kin shongkurim bad ki khun shynrang jong u. U Ibsan u ïalam ïa ki Israel hynñiew snem,

¹⁰ hadien kata u la ïap, bad la tep ïa u ha Bethlehem.

¹¹ Hadien u Ibsan, u Elon uba na Sebulun u ïalam ïa ki Israel shiphew snem.

¹² Hadien kata u la ïap, bad la tep ïa u ha Aijalon kaba ha ri Sebulun.

¹³ Hadien u Elon, u Abdon u khun jong u Hillel uba na Pirathon u ïalam ïa ki Israel.

¹⁴ U don sawphew ngut ki shynrang bad laiphew ngut ki ksiew shynrang, bad baroh hynñiewphew ngut ki don la ki jong ki kada. U Abdon u ïalam ïa ki Israel phra snem,

¹⁵ hadien kata u la ïap bad la tep ïa u ha Pirathon ha ka ri ki Ephraim ha ka ri lum jong ki Amalek.