NONGBISHAR 1 - Khasi CL Bible (BSI)

Ki jait Judah bad Simeon ki jop ïa u Adonibesek

¹ Hadien ka jingïap u Joshua, ki paid Israel ki kylli ïa U Trai, “Mano na ki jait jong ngi kaba dei ban leit nyngkong ban tur ïaleh ïa ki Kanaan?”

² U Trai u jubab, “Ka jait Judah kan leit nyngkong. Nga ai ha ki ban bat synshar ïa ka ri.”

³ Ki paid Judah ki ong ha ki paid Simeon, “Ale leit bad ngi sha ka ri ba la ai ha ngi, bad ngin ïakhun lang ïa ki Kanaan. Nangta ngin ïaleit bad phi sha ka ri kaba la ai ha phi.” Kumta ki jait Simeon

⁴ bad Judah ki la leit ryngkat sha ka thma. U Trai u la ai ha ki ka jingjop halor ki Kanaan bad ki Peris, bad ki la jop ïa ki shiphew hajar ngut ki rangbah ha Besek.

⁵ Ki la lap ïa u Adonibesek hangta bad ki ïaleh pyrshah ïa u.

⁶ U la phet krad, hynrei ki la beh ïa u, kem ïa u bad ki ot noh ïa ki 'tikmie bad ki 'jatkmie jong u.

⁷ U Adonibesek u ong, “Hynñiewphew ngut ki syiem ba la shah ot ki 'tikmie bad ki 'jatkmie ki hap ban tam jingbam na khrum miej jong nga. U Blei u la leh mynta ïa nga ïa kaei kaba nga la leh ïa ki.” La ïalam ïa u sha Jerusalem, ha kaba u la ïap.

Ki Judah ki jop ïa ka Jerusalem bad ka Hebron

⁸ Ki paid Judah ki la tur ïaleh ïa ka Jerusalem bad ki kurup ïa ka. Ki pynïap ïa ki briew jong ka bad ki wiang ding ïa ka nongbah.

⁹ Hadien kane, ki leit ban ïaleh ïa ki Kanaan kiba shong ha ka ri lum, ha ki trai ki lum, bad ha ka ri ryngkhiang kaba shaphang shathie.

¹⁰ Ki la ïaid pyrshah ïa ki Kanaan kiba shong basah ha ka nongbah Hebron, ïa kaba la ju khot ka Kiriath Arba. Hangta ki la jop ïa ki kur jong u Sheshai, u Ahiman bad u Talmai.

U Othniel u jop ïa ka nongbah Debir

¹¹ Nangta ki rangbah Judah ki la ïaid pyrshah ïa ka nongbah Debir, ha kata ka por la khot kyrteng ka Kiriath Sepher.

¹² Uwei na ki, uba kyrteng u Kaleb u ong, “Ngan ai ïa ka khun jong nga ka Akhsah ban shongkurim ïa u briew uba jop ha kaba kurup ïa ka Kiriath Sepher.”

¹³ U Othniel, u khun jong u Kenas, u para jong u Kaleb, u la ïohknieh ïa ka nongbah; kumta u Kaleb u la ai ha u ïa la ka khun kynthei ban shongkurim.

¹⁴ Ha ka sngi kyntiew kurim, u Othniel u kyntu ïa ka, ban pan lyngkha na u kpa jong ka. Ka la hiar na ka kada jong ka, bad u Kaleb u kylli ïa ka aïu ka kwah.

¹⁵ Ka jubab, “Nga kwah katto katne ki pukri um. Ka jaka ba phi la ai ïa nga ka don ha ka ri ryngkhiang.” Kumta u Kaleb u ai ha ka ïa ki umpohliew kiba haneng bad kiba harum.

Ki jingjop jong ki jait Judah bad Benjamin

¹⁶ Ki khun ki ksiew jong u kthaw kurim u Moses, na ka jait Ken, ki la leit ryngkat bad u paid Judah na Jerikho, ka nongbah ki dieng Tlai, sha ka ri shrah ha ka phang bashathie jong ka Arad ha Judah. Ki shongduh hangta hapdeng ki Amalek.

¹⁷ Ki paid Judah ki la leit ryngkat bad ki paid Simeon, bad ki la jop ïa ki Kanaan kiba shong ha ka nongbah Sephath. Ki la buh ka jingtim halor ka nongbah, ki la pynjot thiaw ïa ka, bad ki la ai kyrteng ïa ka, ka Hormah.

^18-19 U Trai u la ïarap ïa ki paid Judah, bad ki la shim kynti ïa ka ri lum. Hynrei kim shym la kurup ïa ka Gasa, ka Ashkelon, lane ka Ekron lem bad ki jaka sawdong jong ki. Kine ki briew kiba shong basah harud duriaw ki don ïa ki kali ïapom da ka nar, bad kumta ki paid Judah kim shym la lah ban beh krad ïa ki.

²⁰ Kumba u Moses u la hukum, la ai ïa ka Hebron ha u Kaleb, uba la beh noh na ka nongbah ïa ki lai tylli ki kur kiba hiarpateng na u Anak.

²¹ Hynrei ki briew na ka jait Benjamin kim shym la beh noh ïa ki Jebus kiba shong basah ha Jerusalem, bad ki Jebus ki dang shong hangta bad ki paid Benjamin naduh kata ka por.

Ki jait Ephraim bad Manasseh ki jop ïa ka Bethel

^22-23 Ki jait Ephraim bad Manasseh ki la leit ban tur ïaleh ïa ka nongbah Bethel, kaba ha kata ka por la khot kyrteng ka Lus. U Trai u la ïarap ïa ki. Ki la phah ïa ki nongsyntiat sha ka nongbah,

²⁴ kiba la ïohi ïa uwei u briew uba wan mih bad ki ong ha u, “Pyni ïa ngi kumno ngin ïohrung shapoh ka nongbah bad ngin ym pynmynsaw ïa phi.”

²⁵ Kumta u la pyn-i ïa ki, bad ki paid Ephraim bad Manasseh ki la pynïap ïa uwei pa uwei hapoh ka nongbah, lait tang une u briew bad ka longïing jong u.

²⁶ Kham hadien u la leit sha ri ki Hit, u la tei hangta kawei ka nongbah, bad u khot kyrteng ïa ka, ka Lus, kaba dang dei hi ka kyrteng jong ka.

Ki briew ki bym shym la shah beh ha ki Israel

²⁷ Ki jait Manasseh kim shym la beh noh ïa ki briew kiba shong basah ha Beth Shan, Taanakh, Dor, Ibleam, Megiddo bad ha ki nongrit kiba hajan; ki Kanaan ki dang shong hangta.

²⁸ Haba ki Israel ki la khlaiñbor, ki la pynbor ïa ki Kanaan ban trei na ka bynta jong ki, hynrei kim shym la beh noh ïa ki baroh.

²⁹ Ki jait Ephraim kim shym la beh noh ïa ki Kanaan kiba shong ha ka nongbah Geser, bad kumta kita ki Kanaan ki ïaishong hangta hapdeng jong ki.

³⁰ Ki jait Sebulun kim shym la beh noh ïa ki briew kiba shong ha ki nongbah Kitron bad Nahalal; bad kumta ki Kanaan ki ïaishong hapdeng jong ki bad la pynbor ban trei na ka bynta jong ki.

³¹ Ki jait Asher kim shym la beh noh ïa ki briew kiba shong ha ki nongbah Akko, Sidon, Ahlab, Akhsib, Helbah, Aphek, bad Rehob.

³² Ki paid Asher ki shong bad ki Kanaan kiba ha kita ki jaka naba kim shym la beh ïa ki.

³³ Ki jait Naphtali kim shym la beh ïa ki briew kiba shong ha ki nongbah Beth Shemesh bad ha Bethanath. Ki paid Naphtali ki shong bad ki Kanaan kiba ha kita ki jaka, hynrei ki la pynbor ïa ki ban trei na ka bynta jong ki.

³⁴ Ki Amor ki beh da ka bor ïa ki briew na ka jait Dan sha ka ri lum bad kim shah ïa ki ban wan hiar sha ri thor.

³⁵ Ki Amor ki dang sah ha Aijalon, Shaalbim, bad ha u Lum Heres, hynrei ki jait Ephraim bad Manasseh ki buh hapoh ka jingsynshar jong ki bad ki pynbor ïa ki ban trei na ka bynta jong ki.

³⁶ Shatei na Sela, u pud ka Edom u ïaid lyngba ka Khim Akrabbim.