NEHEMAÏAH 9 - Khasi CL Bible (BSI)

Ki briew ki phla ïa la ki pop

^1-2 Ha ka sngi kaba arphew saw jong ujuh u bnai, ki Israel ki ïalumlang ban shahjingit ban pynpaw ka jingsngewsih na ka bynta ki pop jong ki. Ki la lah pynïakhlad ïa lade na ki nongwei baroh. Ki phong ki jaiñ khain bad sleh pui pui ha ki khlieh jong ki kum ka dak jong ka jingsngewsih. Nangta ki ïeng bad sdang ban phla ïa ki pop kiba ma ki bad ki kpa tymmen jong ki, ki la leh.

³ Kumba lai kynta, ïa ka Hukum jong U Trai U Blei jong ki, la pule ha ki, bad ha ki lai kynta kiba bud, ki phla ïa la ki pop bad mane ïa U Trai U Blei jong ki.

⁴ Ka don ka jaka bakynjang, na ka bynta ki Lebi bad halor jong ka, u ïeng u Jeshua, u Bani, u Kadmiel, u Shebanaïah, u Bunni, u Sherebaïah, u Bani, bad u Khenani. Ki la duwai jam ha U Trai U Blei jong ki.

⁵ Kine ki Lebi harum ki ai ïa ka jingkhot sha ka jingmane: u Jeshua, u Kadmiel, u Bani, u Hashabneïah, u Sherebaïah, u Hodaïah, u Shebanaïah, bad u Pethahaïah. Ki ong: “Ïeng bad ïaroh ïa U Trai U Blei jong phi; ïaroh ïa u junom la junom! Ai ba baroh kin ïaroh ïa ka kyrteng badonburom jong u, wat la ym don ka jingïaroh ba kynja briew kaba khraw palat.”

Ka jingduwai ka jingphla

⁶ Bad nangta ki Israel ki duwai ïa kane ka jingduwai: “Ma me, Ko Trai, tang ma me hi marwei me long U Trai; me thaw ïa ki bneng bad ki khlur jong ka sahit bneng. Me thaw ïa ka ryngkew bad ïa ka duriaw bad baroh kiba don ha ki; me ai jingim ïa baroh. Ki bor ha bneng ki dem bad ki mane ïa me.

⁷ Ma me, A Trai U Blei me la jied ïa u Abram bad me ïalam ïa u na ka Ur ha Babilon; me pynkylla ïa ka kyrteng jong u sha u Abraham.

⁸ Me shem ba u ïaineh ha me, bad me pynlong ka jingïateh kular bad u. Me kular ban ai ha u ïa ka ri ki Kanaan, ka ri jong ki Hit bad ki Amor, ka ri ki Peris, ki Jebus bad ki Girgash, kan long ka ri ha kaba ki khun ki ksiew jong u kin shong kin sah. Me bat ïa la ka kular, namar me long uba ïaineh.

⁹ “Me ïohi kumno ki kpa tymmen ki la shahshitom ha Ijipt; me ïohsngew ïa ka jingkhot jong ki na ka bynta ka jingïarap ha ka Duriaw Basaw.

¹⁰ Me pynjia ki kambah baphylla pyrshah ïa u Pharoah, pyrshah ïa ki rangbah synshar ki briew jong ka ri jong u, namar me tip kumno ki la banbeiñ ïa ki briew jong me. Me la jop ha kata ka por, ka nam kaba me dang don ha kane ka sngi.

¹¹ Lyngba ka duriaw me pynlong ka lynti ïaid na ka bynta ki briew jong me bad me ïalam ïa ki lyngba ka khyndew ba-rkhiang. Ïa kito kiba beh ïa ki, me pynïap jyllop ha ka um bajylliew, kum u maw uba ngam ha ka duriaw ba-atphyllung.

¹² Da u lyoh me ïalam ïa ki ha ka por mynsngi, bad mynmiet me pynshai ïa ka lynti jong ki da ka ding.

¹³ Ha u Lum Sinai me wan hiar na bneng; me kren ha ki briew bad me ai ïa ki, ki hukum babha bad ki jinghikai baskhem.

¹⁴ Me hikai ïa ki ban sumar khuid ïa ki sngi Sabbaton, bad lyngba u shakri jong me u Moses me ai ha ki ïa ki hukum jong me.

¹⁵ “Haba ki thngan, me ai kpu ïa ki na bneng, bad ka um na u mawsiang haba ki sliang. Me ong ïa ki ban shimti bad pynïaid ïa ka ri kaba me la kular ban ai ha ki.

¹⁶ Hynrei ki kpa tymmen jong ngi ki la sarong bad eh dohnud bad kyntait ban kohnguh ïa ki hukum jong me.

¹⁷ Ki la kyntait ban kohnguh; ki la klet ïa baroh kaba me la leh; ki la klet noh ïa ki kambah kiba me la leh. Ha ka jingsarong jong ki, ki la jied u nongïalam ban ïalam biang ïa ki sha ka jinglongmraw ha Ijipt. Hynrei me long U Blei uba map; me long uba dap da ka jingaiei bad ka jingieit, uba suki ban bitar. Ka jingisynei jong me ka long kaba khraw; mem shym iehnoh ïa ki.

¹⁸ Ki la thaw bleithaw ha ka dur jong u khun masi bad ong ba u dei u blei uba la ïalam ïa ki na Ijipt! Haduh katno ki la pynjahburom ïa me, Ko Trai!

¹⁹ Hynrei mem shym iehnoh ïa ki hangta ha ka ri shyiap, namar ka jingisynei jong me ka long kaba khraw. Mem shym la shim noh ïa u lyoh lane ïa ka ding uba pyn-i ha ki ïa ka lynti mynsngi bad mynmiet.

²⁰ Ha ka jingbha jong me, me ong ïa ki ïa kaei kaba ki dei ban leh; me la bsa ïa ki da ka manna bad ai um ïa ki ban dih.

²¹ Lyngba sawphew snem ha ka ri shyiap me pynbiang ïa baroh kaba ki donkam; ki sopti ba ki phong kim shym la jot noh, bad ki kjat jong ki kim shym la sieb bad pang.

²² “Me la shah ïa ki ban jop ïa ki jaitbynriew bad ki hima, ïa ki ri kiba markhap bad ki. Ki jop ïa ka ri ki Heshbon, ha kaba u Sihon u synshar, bad ïa ka ri ki Bashan, ha kaba u Og u long syiem.

²³ Me ai ïa ki, ki khun kiba bun kat ki khlur ha sahit bneng, bad me la shah ïa ki ban jop bad ban shong ban sah ha ka ri kaba me la kular ha ki kpa tymmen ban ai ha ki.

²⁴ Ki la jop ïa ka ri Kanaan; me la jop ïa ki briew kiba shong hangta. Me la ai ïa ki briew jong me ka bor ban leh ïa kaba ki sngewbha bad ki briew bad ki syiem ka Kanaan.

²⁵ Ki briew jong me ki la jop ïa ki nongbah ba la ker kynroh, ki ri baseisoh, ki ïing ba-dap da ka spah, ki pukri ba la dep tih lypa, ki dieng Olib, ki diengsoh, ki bri sohwaiñ. Ki bam ïa baroh kaba ki kwah bad ki man sngaid; ki lehkmen ha baroh kiei kiei kiba bha kiba me la ai ïa ki.

²⁶ “Hynrei ki briew jong me ki ïaleh pyrshah bad leh bymkohnguh ïa me; ki phai dien noh na ka Hukum jong me. Ki pynïap ïa ki nongïathuhlypa kiba maham ïa ki,

²⁷ kiba ong ïa ki ba ki dei ban phai pat sha me. Ki la ñiewbeiñ ïa me na ka por sha ka por, ba kumta me shah ïa ki nongshun jong ki ban jop bad synshar ïa ki. Ha ka jingeh jong ki, ki khot ïa me na ka bynta ka jingïarap, bad me jubab ïa ki na bneng. Ha ka jingisynei bakhraw me phah ki nongïalam ïa ki kiba pyllait ïa ki na ki nongshun jong ki.

²⁸ Haba ka jingsuk ka la wan, ki leh pop biang, bad me shah biang ïa ki nongshun ban jop ïa ki. Pynban ki kylla-kaba-mut bad kyrpad ïa me ban pynim ïa ki, ha bneng me ïohsngew, bad na ka por sha ka por me pyllait ïa ki ha ka jingisynei bakhraw jong me.

²⁹ Me maham ïa ki ban kohnguh ïa ki jinghikai jong me, hynrei ha ka jingsarong ki kyntait ïa ki hukum jong me, wat la kaba sumar ïa ka Hukum ka long ka lynti sha ka jingim. Kiba mutlop bad kiba ehrang, ki kyntait ban kohnguh.

³⁰ Na kawei ka snem sha kawei pat, ha ka jingïaishah me la maham ïa ki. Me pyrsad mynsiem ïa ki nongïathuhlypa jong me ban kren, hynrei ki briew jong me ki long kyllut, kumta me shah ïa kiwei pat ki jaitbynriew ban jop ïa ki.

³¹ Bad pynban, namar ka jingkhraw ka jingisynei jong me, mem shym iehnoh ne pynjot ïa ki. Me long U Blei ka jingaiei bad ka jingisynei!

³² “A Blei, U Blei jong ngi, katno me long uba khraw! Katno me long uba shyrkhei bad uba donbor! Me batskhem ïa ki kular ka jingïateh jutang. Naduh ka por ba ki syiem Assyria ki banbeiñ ïa ngi, wat haduh kane ka por, haduh katno ngi shahshitom! Ki syiem jong ngi, ki nongïalam jong ngi, ki lyngdoh jong ngi bad ki nongïathuhlypa, ki kpa tymmen jong ngi, bad baroh ki briew jong ngi ki shitom. To kynmaw haduh katno ngi la shahshitom!

³³ Me leh ïa kaba dei ban pynshitom ïa ngi; Me long uba ïaineh, wat la ngi la leh pop.

³⁴ Ki kpa tymmen jong ngi, ki syiem jong ngi, ki nongïalam jong ngi bad ki lyngdoh Kim shym la sumar ïa ka Hukum jong me. Kim shym la sngap ïa ki hukum bad ki jingmaham jong me.

³⁵ Da ki jingkyrkhu jong me, ki syiem ki la synshar ïa ki briew jong me haba ki shong ki sah ha ka ri kaba ïar bad kaba seisoh ba me la ai ïa ki; hynrei kim shym la phai noh na ka pop ban shakri ïa me.

³⁶ Bad mynta ngi long ki mraw ha ka ri ba me la ai ïa ngi, kane ka ri baseisoh kaba ai jingbam ïa ngi.

³⁷ Kaei kaba ka ri ka pynmih ka leit sha ki syiem kiba me la buh halor jong ngi namar ba ngi la leh pop. Ki leh katba ki sngewbha ïa ngi bad ïa ki jingri jong ngi, bad ngi don ha ka jinglanot kaba khraw!”

Ki briew ki soi ka jingïakut

³⁸ Namar baroh kata kaba la jia, ma ngi, ki Israel, hangne ngi pynlong ka jingïakut bakyntang da ka jingthoh, bad ki nongïalam jong ngi, ki Lebi jong ngi, bad ki lyngdoh jong ngi ki buh ïa ki jingshon muhor ha ka.