NEHEMAÏAH 8 - Khasi CL Bible (BSI)

U Esra u pule ïa ka Hukum ha u paidbah

¹ Haba la poi u bnai uba hynñiew, ki briew ka Israel ki la ïashong ïasah ha ki shnong. Ha ka sngi banyngkong jong uta u bnai, ki la ïalumlang ha Jerusalem, ha ka jaka basawdong hapoh ka Khyrdop Um. Ki ong ïa u Esra, u lyngdoh bad u riewstad ka Hukum ïa kaba U Trai u la ai ha ki Israel lyngba u Moses, ban wanrah ïa ka kitab jong ka Hukum.

² Kumta u Esra u wanrah ïa ka sha ka jaka kaba u paidbah u la ïalumlang — ki rangbah, ki kynthei bad ki khynnah kiba la san kiba la lah ban sngewthuh.

³ Hangta ha ka jaka basawdong hajan ka khyrdop u pule ïa ka Hukum ha ki naduh dang step phyrngab haduh shiteng sngi, bad baroh ki ïasngap bha.

⁴ U Esra u ïeng ha ka jaka ba kham kynjang ba la shna da ka dieng ïa kaba la shna khnang na ka bynta kata ka por. Kine ki briew ki ïeng ha ka liang kamon jong u: U Mattithaïah, u Shema, u Anaïah, u Uriah, u Hilkaïah, bad u Maaseïah; bad kine pat ki ïeng ha ka liang kadiang jong u: u Pedaïah, u Mishael, u Malkhijah, u Hashum, u Hashbaddanah, u Sekharaïah bad u Meshullam.

⁵ Katba u Esra u ïeng hangta ha ka jaka bakynjang ba kham hajrong ïa u paidbah, ki khmat jong ki, ki peit beit sha u. Tang shu plied ïa ka kitab, baroh ki ïa-ïeng.

⁶ U Esra u ong, “Ïaroh ïa U Trai, U Blei uba khraw!” Baroh u paidbah u rah la ki kti shajrong bad ong, “Amen! Amen!” Ki dem khohsiew ha ka jingshakri, ki phai ki khmat jong ki sha khyndew.

⁷ Nangta ki ïeng ha la ki jaka, bad kine ki Lebi ki batai ïa ka Hukum ha ki: u Jeshua, u Bani, u Sherebaïah, u Jamin, u Akkub, u Shabbethai, u Hodaïah, u Maaseïah, u Kelita, u Asaraïah, u Josabad, u Hanan, bad u Pelaïah.

⁸ Ki ai ka jingpynkylla da ka ktien bad ki batai ïa ka khnang ba u paidbah u lah ban sngewthuh ïa ka.

⁹ Haba u paidbah u ïohsngew ïa kaei kaba ka Hukum ka dawa ïa ki, la pynkhih ïa ki dohnud jong ki bad ki sdang ban ïam. Kumta u Nehemaïah, uba long u lat, u Esra, uba long u lyngdoh bad u riewstad ka Hukum, bad ki Lebi kiba dang batai ïa ka Hukum, ki la ong ha u paidbah, “Kane ka sngi ka long kaba khuid ha U Trai U Blei jong phi, kumta phim dei ban sngewsih ne ïam.

¹⁰ Mynta leit noh sha la ïing bad bam bad dih sngewbha. Ïasam ïa ka jingbam bad ka waiñ bad kito ki bym dap bym biang. Mynta ka sngi ka long kaba khuid ha U Trai jong ngi, kumta wat sngewsih. Ka jingkmen kaba U Trai u la ai ha phi kan pynlong khlaiñ ïa phi.”

¹¹ Ki Lebi ki la pynjai jai ïa u paidbah bad ong ha ki ban ym sngewsih ha kum kata ka sngi kaba khuid.

¹² Kumta u paidbah u leit noh sha la ïing bad bam bad dih da kaba kmen bad ïasam ïa kaei kaba ki don bad kiwei pat, namar ki la sngewthuh ïa kaei kaba la pule ha ki.

Ka Jingkhawai Niam Ki Ïingtrep

¹³ Ha ka sngi kaba bud, ki rangbah kur, ryngkat bad ki lyngdoh bad ki Lebi, ki leit sha u Esra ban pule bniah ïa ka jinghikai jong ka Hukum.

¹⁴ Ki shem ha ka Hukum kaba U Trai u la ai lyngba u Moses, ba ka la hukum ïa ki Israel ban shong ban sah ha ki jakarieh bashipor ha ka por jong ka Jingkhawai Niam Ki Ïingtrep.

¹⁵ Kumta ki ai ïa kine ki jingbthah bad ki phah ïa ki sha baroh ha Jerusalem bad kiwei pat ki nongbah bad ki shnong: “Khie leit sha ki lum bad pom ïa ki tnat na ki dieng Kseh, ki dieng Olib, ki dieng Martl, ki dieng Tlai bad kiwei ki dieng, ban shna ïingtrep kat kum ki jingbthah ba la thoh ha ka Hukum.”

¹⁶ Kumta ki briew ki la ïoh ïa ki tnat bad shna ïa ki ïingtrep halor ki tnum ïing ba madan jong ki ïing jong ki, ha la ki jaka, ha ka phyllaw ka Templ, bad ha ki jaka paidbah basawdong hajan ka Khyrdop Um bad hajan ka Khyrdop Ephraim.

¹⁷ Baroh ki briew kiba la wan phai na ka jinglongmraw, ki la shna ïa ki jakarieh bad shong hapoh jong ki. Kane ka la long ka sien kaba nyngkong ba la leh naduh ki sngi u Joshua u khun jong u Nun, bad baroh ki la kmen haduh katta katta.

¹⁸ Naduh ka sngi kaba nyngkong jong ka Jingkhawai Niam haduh ka sngi kaba khatduh, ki pule ïa ki bynta jong ka Hukum U Blei man ka sngi. Ka Jingkhawai Niam ka la long na ka bynta hynñiew sngi, bad ha ka sngi kaba phra, ka la don ka jingpynkut ïa ka Jingkhawai Niam kumba la ong ha ka Hukum.