NEHEMAÏAH 7 - Khasi CL Bible (BSI)

¹ Bad mynta ïa ka kynroh la dep tei pat, ïa ki khyrdop la pynïeng ha ki jaka jong ki, bad ïa ki nongap phira ka templ, ki dkhot ka kynhun rwai ba la pynkyntang bad kiwei pat ki Lebi, la buh ki kam na ka bynta jong ki.

² Nga buh ar ngut ki rangbah ban peit ïa ka jingpynïaid ïa ka nongbah Jerusalem: u Hanani, uba shi para bad nga, bad ïa u Hananaïah, u rangbah shipai jong ka kut. U Hananaïah u long u briew ïa uba lah ban shaniah bad u briew uba sheptieng ïa U Blei, u bym don kum ma u.

³ Nga la ong ïa ki ban ym plie ïa ki khyrdop ka Jerusalem ha ka por mynstep haduh ka por ba la mih sngi bha bad ban khang ïa ki haba ki nongap phira kim don ha ka jingtreikam ha ka por sep sngi. Nga la ong ruh ïa ki ban thung ki nongap phira napdeng ki briew kiba shong basah ha Jerusalem bad ban buh ïa katto katne na ki ha ki jaka ba la jied khnang bad ïa kiwei pat ban ïaid pahara ïa ki jaka sawdong jong ki ïing jong ki hi.

Ka thup kyrteng jong kito kiba la wan phai na ka jingshah ringmraw

⁴ Ka Jerusalem ka long ka nongbah kaba ïar, hynrei ym don bun ki briew kiba shong basah ha ka, bad ym pat don bun ki ïing ba la tei ha ka.

⁵ U Blei u la pynkhih ïa ka mynsiem jong nga ban ïalum ïa ki briew bad ki nongïalam jong ki bad ki rangbah synshar bad ban khmih ïa ki jingbuh jingkynmaw ha ki ïing ki sem jong ki. Nga shem ïa ki jingbuh jingkynmaw ïa kito kiba la wan phai nyngkong na ka jinglongmraw, bad kane ka dei ka jingtip ba nga la ïoh:

⁶ Bun na kiba shah ringmraw, ki la mihnoh na ka probins Babilon bad wan phai sha Jerusalem bad Judah, uwei pa uwei sha la ka jong ka nongbah. Ki longïing jong ki, ki la shong la sah ha ka jingshah ringmraw ha Babilon naduh ba u syiem Nebukhadnessar u la rah ïa ki shata kum ki koidi.

⁷ Ki nongïalam jong ki, ki long u Serubbabel, u Joshua, u Nehemaïah, u Asaraïah, u Raamaïah, u Nahamani, u Mordekai, u Bilshan, u Mispereth, u Bigbai, u Nehum bad u Baanah.

^8-25 Kane ka long ka thup kyrteng jong ki kur jong ki Israel, ryngkat bad kito kiba na kawei kawei ka kur, kiba la wan phai na ka jingshah ringmraw: Parosh — Ar hajar shispah hynñiewphew ar ngut Shephataïah — Laispah hynñiewphew ar ngut Arah — Hynriewspah sanphew ar ngut Pahath Moab (ki khun ki ksiew u Jeshua bad u Joab) — Ar hajar phraspah khatphra ngut Elam — Shihajar arspah sanphew saw ngut Sattu — Phraspah sawphew san ngut Sakkai — Hynñiewspah hynriewphew ngut Binnui — Hynriewspah sawphew phra ngut Bebai — Hynriewspah arphew phra ngut Asgad — Ar hajar laispah arphew ar ngut Adonikam — Hynriewspah hynriewphew hynñiew ngut Bigbai — Ar Hajar hynriewphew hynñiew ngut Adin — Hynriewspah sanphew san ngut Ater (la khot ruh Hesekaïah) — Khyndaiphew phra ngut Hashum — Laispah arphew phra ngut Besai — Laispah arphew saw ngut Hariph — Shispah khat-ar ngut Gibeon — Khyndaiphew san ngut

^26-38 Ki briew kiba ki kpa tymmen jong ki kiba la shong la sah ha kine ki shnong ruh ki la wan phai: Bethlehem bad Netophah — Shispah phraphew phra ngut Anathoth — Shispah arphew phra ngut Beth Asmabeth — Sawphew ar ngut Kiriath Jearim, Khephrirah bad Beeroth — Hynñiewspah sawphew lai ngut Ramah bad Geba — Hynriewspah arphew wei ngut Mikhmash — Shispah arphew ar ngut Bethel bad Ai — Shispah arphew lai ngut Kawei pat ka Nebo — Sanphew ar ngut Kawei pat ka Elam — Shihajar arspah sanphew saw ngut Harim — Laispah arphew ngut Jerikho — Laispah sawphew san ngut Lod, Hadid bad Ono — Hynñiewspah arphew wei ngut Senaah — Lai hajar khyndaispah laiphew ngut

^39-42 Kane ka dei ka thup kyrteng jong kiba na ka kur lyngdoh kiba wan phai na ka jingshah ringmraw: Jedaïah (ki khun ki ksiew jong u Jeshua) — Khyndaispah hynñiewphew lai ngut Immer — Shihajar sanphew ar ngut Pashhur — Shihajar arspah sawphew hynñiew ngut Harim — Shihajar khathynñiew ngut

^43-45 Ki kur jong ki Lebi kiba wan phai na ka jingshah ringmraw: Jeshua bad Kadmiel (ki khun ki ksiew jong u Hodabaïah) — Hynñiewphew saw ngut Ki nongtem nongput ka Templ (ki khun ki ksiew jong u Asaph) — Shispah sawphew phra ngut Ki nongap phira ka Templ (ki khun ki ksiew jong u Shallum, u Ater, u Talmon, u Akkub, u Hatita bad Shobai) — Shispah laiphew phra ngut

^46-56 Ki kur jong ki nongtrei ka Templ kiba wan phai na ka jingshah pynryngkang par: Siha, Hasupha, Tabbaoth, Keros, Sia, Padon, Lebana, Hagaba, Shalmai, Hanan, Giddel, Gahar, Reaïah, Resin, Nekoda, Gassam, Ussa, Paseah, Besai, Meunim, Nephushesim, Bakbuk, Hakupha, Harhur, Baslith, Mehida, Harsha, Barkos, Sisera, Temah, Nesaïah, bad Hatipha.

^57-59 Ki kur ki shakri u Solomon kiba wan phai na ka jingshah ringmraw: Sotai, Sophereth, Perida, Jaalah, Darkon, Giddel, Shephataïah, Hattil, Pokhereth Hassebaim bad Amon.

⁶⁰ Baroh ki khun ki ksiew jong ki nongtrei ka Templ bad ki shakri u Solomon kiba la wan phai na ka jingshah ringmraw ki long laispah khyndaiphew ar ngut.

^61-62 Ki don hynriewspah sawphew ar ngut kiba dei na ki kur u Delaïah, u Tobiah bad u Nekoda kiba la wan phai na ki shnong ka Tel Melah, Tel Harsha, Kherub, Addon bad Immer; hynrei kim shym la lah ban pynshisha ba ki dei kiba hiarpateng na ki Israel.

^63-64 Kine ki kur lyngdoh kim shym shem jingbuh jingkynmaw ban pynshisha ïa ka jinghiarpateng na ki kpa tymmen: Hobaïah, Hakkos bad Barsillai. (U kpa tymmen jong ka kur lyngdoh jong u Barsillai u la shongkurim ïa ka kynthei na ka kur u Barsillai jong ka Gilead bad shim ïa ka kyrteng jong ka kur u kthaw jong u.) Namar ba kim shym la lah ban pynshisha mano ba dei ki kpa tymmen jong ki, ym shym la pdiang ïa ki kum ki lyngdoh.

⁶⁵ U lat uba dei u Jiw u ong ïa ki ba kim lah ban bam ïa ki jingbam ba la kñia ha U Blei haduh ban da don u lyngdoh uba lah ban pyndonkam ïa u Urim bad u Thummim.

^66-69 Baroh kiba wan phai na ka jingshah ringmraw ki long — Sawphew ar hajar laispah hynriewphew ngut. Ki shakri shynrang bad kynthei — Hynñiew hajar laispah laiphew hynñiew ngut. Ki nongput nongtem shynrang bad kynthei — Arspah sawphew san ngut. Ki kulai — Hynñiewspah laiphew hynriew tylli. Ki khashor — Arspah sawphew san tylli. Ki ut — Sawspah laiphew san tylli. Ki kada — Hynriew hajar hynñiewspah arphew tylli.

^70-72 Bun ki briew kiba la synñiang ban ïarap ban siew ïa ka jinglut na ka bynta ka jingpynbha pat ïa ka Templ: U lat — Phra kilo ka ksiar; sanphew tylli ki pliang lehniam; sanspah laiphew tylli ki jaiñkup na ka bynta ki lyngdoh. Ki rangbah kur — Shispah hynriewphew phra kilo ka ksiar; Shihajar arspah sanphew kilo ka rupa. Kiba sah na ki briew — Shispah hynriewphew phra kilo ka ksiar; Shispah sawphew kilo ka rupa; Hynriewphew tylli ki jaiñkup na ka bynta ki lyngdoh.

⁷³ Ki lyngdoh, ki Lebi, ki nongap phira ïa ka Templ, ki nongtem nongput, kiba bun na ki riewpaidbah, ki nongtrei ka Templ — baroh u paid Israel — ki la shongduh ha ki shnong bad nongbah jong ka Judah.