NEHEMAÏAH 6 - Khasi CL Bible (BSI)

Ki jingïasylla pyrshah ïa u Nehemaïah

¹ U Sanballat, u Tobiah, u Geshem bad kiba sah na ki nongshun jong ngi, ki la ïohsngew ba ngi la lah pyndep ïa ka jingtei ïa ka kynroh bad ba ym don shuh ki jinglait thliew ha ka, wat la ngim pat shym la pynïeng ki khyrdop ha ki jaka ban shna ïa ki.

² Kumta u Sanballat bad u Geshem ki phah khubor sha nga, da kaba ai jingmut ba ngan ïakynduh bad ki ha kawei na ki nongrit jong ka Madan Ono. Kane ka la long ka buit sianti jong ki ban pyrshang ban buh ïa nga ha ka jingma.

³ Nga phah nonglamktien ban ong ïa ki, “Nga dang leh ka kam badonkam bad ngam lah ban leit hiar shata. Ngan ym shah ban pynsangeh ïa ka kam tang namar ban leit ïashem ïa phi.”

⁴ Ki phah ïa nga ïa kajuh ka khubor saw sien, bad ha man la ki sien, nga phah ïa kijuh ki jubab.

⁵ Kumta u Sanballat u phah ïa uwei na ki shakri jong u sha nga ryngkat bad ka khubor kaba san, kane kawei ha ka rukom jong ka shithi ka bym shym la shon muhor.

⁶ La thoh: “U Geshem u ong ïa nga ba ka don ka hamsaïa kaba ïaid kylleng hapdeng ki jaitbynriew kaba don marjan, ba ma phi bad ka jaitbynriew Jiw phi don jingthmu ban ïaleh pyrshah bad dei na kane ka daw balei ba phi la tei pat ïa ka kynroh. U ong ruh ba phi thmu ban pynlong ïa lade u syiem

⁷ bad ba phi la pynbeit ba katto katne ki nongïathuhlypa kin pynbna ha Jerusalem ba phi long u syiem ka Judah. U syiem, khlem pep, un ïohsngew shaphang kane, kumta nga ai jingmut ba ma phi bad nga ngin ïakynduh ban ïakren halor kane ka kam.”

⁸ Nga phah ka jubab sha u: “Ym don na kaei kaba phi ong ba ka long kaba dei. Phi la shu thaw hi da lade.”

⁹ Ki pyrshang ban pyntieng ïa ngi ban pynsangeh ïa ka kam. Nga la duwai, “Hynrei mynta, A Blei, pynlong khlaiñ ïa nga!”

¹⁰ Hamar kane ka por, nga leit ban jngoh ïa u Shemaïah, u khun jong u Delaïah bad u ksiew jong u Mehetabel, u bym shym lah ban mih na ïing jong u. U ong ïa nga, “Ma phi bad nga, ngi dei ban ïaleit bad rieh lang ha ka Jaka Kyntang jong ka Templ bad khang tala ïa ki jingkhang, namar kin wan ban pynïap ïa phi.”

¹¹ Nga jubab, “Ngam dei u briew uba shait phet bad rieh. Hato phi pyrkhat ba ngan pyrshang ban pynim ïa la ka jingim da kaba rieh ha ka Templ? Ngan ym leh kumta.”

¹² Haba nga la pyrkhat bha ïa ka, nga sngewthuh ba U Blei um pat shym la kren ha u Shemaïah, hynrei ba u Tobiah bad u Sanballat ki la pynbam pisa ïa u ban ai ïa nga ïa kane ka jingmaham.

¹³ Ki la pyndonkam ïa u ban pyntieng ïa nga sha ka jingleh pop, khnang ba ki lah ban pynsniew ïa nam babha jong nga bad pynjahburom ïa nga.

¹⁴ Nga duwai, “A Blei, to kynmaw ïa kaei kaba u Tobiah bad u Sanballat ki la leh bad to pynshitom ïa ki. To kynmaw ïa kato ka kynthei, ka Noadaïah, bad baroh kiwei ki nongïathuhlypa kiba la pyrshang ban pyntieng ïa nga.”

Ka jingpyndep ïa ka jingtrei

¹⁵ Hadien sanphew ar sngi jong ka jingtrei, ïa ka kynroh baroh kawei la pyndep ha ka sngi kaba arphew san jong u bnai Elul.

¹⁶ Haba ki nongshun jong ngi kiba don ha ki jaitbynriew sawdong jong ngi ki ïohsngew ïa kane, ki la sngewthuh ba ki la poi ha ka jinglehrain, namar baroh ki tip ba ïa ka jingtrei la pyndep da ka jingïarap U Blei.

¹⁷ Hapdeng kane ka por baroh, ki nongïalam ki Jiw ki la ïadon hapdeng ka jingïathoh shithi bad u Tobiah.

¹⁸ Bun ki briew ha Judah ki la ïalong ha ka liang jong u na ka bynta u kthaw jong u, u Shekanaïah, uba long u Jiw, u khun jong u Arah. Nalor kata, u Jehohanan, u khun jong u, u la shongkurim ïa ka khun u Meshullam, u khun jong u Berekhaïah.

¹⁹ Ki briew ki ïakren ha khmat jong nga shaphang baroh ki kam babha kiba u Tobiah u la leh bad ki ïathuh ha u ïa kiei kiei baroh ba nga la kren. Bad u ïai phah ïa nga ki shithi ban pyrshang ban pyntieng ïa nga.