NEHEMAÏAH 5 - Khasi CL Bible (BSI)

Ka jingbanbeiñ ïa kiba duk

¹ Hadien katto katne por, bun na ki briew, kynthup ïa ki shynrang bad ki kynthei, ki sdang ban ujor pyrshah ïa ki para Jiw jong ki.

² Katto katne ki ong, “Ngi don ki longïing baheh, ngi donkam kew ban pynim ïa lade.”

³ Kiwei pat ki ong, “Ngi la bynda ïa ki pynthor bad ki bri sohwaiñ bad ki ïing jong ngi ban ïoh kew uba biang ban lait na ka jingshahthngan.”

⁴ Sa kiwei ki ong, “Ngi hap ban pan pisa kylliang ban siew ïa ka khajna syiem halor ki pynthor bad ki bri sohwaiñ.

⁵ Ngi long na kajuh ka jaitbynriew kum ki para Jiw jong ngi. Hato ki khun ki kti jong ngi kim long kumjuh kum ki jong ki? Hynrei ngi la hap ban pynlong mraw ïa ki khun ki kti jong ngi. Ïa ki katto katne ki khun kynthei jong ngi, la lah die ïa ki kum ki mraw. Ngim donbor ei ei namar ïa ki pynthor bad ki bri sohwaiñ la shim noh na ngi.”

⁶ Haba nga ïohsngew ïa ki jingujor jong ki, nga la bitar bad kut jingmut ban leh ei ei.

⁷ Nga la pynrem ïa ki nongïalam bad ki rangbah synshar jong ki paidbah bad ong ïa ki, “Phi la banbeiñ ïa la ki para ki hynmen jong phi!” Nga la khot ïa ka jingïalang paidbah ban pynbeit ïa ka jingeh bad nga ong,

⁸ “Katba ngi lah, ngi la ïathied pat ïa ki para Jiw ïa kiba la die sha ki nongwei. Mynta phi pynlong ïa la ki para ki hynmen jong phi ban die ïa lade ha phi, ki para Jiw jong ki!” Ki nongïalam ki la sngap jar bad kim don ei ei ban ong.

⁹ Nangta nga ong, “Kaei kaba phi leh ka long kaba bakla! Phi dei ban kohnguh ïa U Blei bad leh ïa kaei kaba dei, khnang ba phin ym pynlong ïa ki nongshun jong ngi, ki Jentil, ïa kano kano ka daw ba kin krenbeiñ ïa ngi.

¹⁰ Nga la shah ïa ki briew ban shim pisa kylliang bad u kew na nga, bad kumjuh ruh ki paralok jong nga bad ki briew kiba trei na ka bynta jong nga. To mynta ngin ym ïa-dawa shuh ïa ka jingpynphai biang ïa ka pisa.

¹¹ Map noh ïa ki ram kiba ki shah ïa phi — ka pisa, u kew, ka waiñ lane ka umphniang Olib. Pynphai noh shisyndon sha ki ïa ki pynthor, ki bri sohwaiñ, ki khlaw Olib bad ki ïing!”

¹² Ki nongïalam ki la jubab, “Ngin leh kumba phi ong. Ngin ai noh ïa ka jaka bad ngin pyrshang ban ym lum shuh ïa ki ram.” Nga khot ïa ki lyngdoh bad pynlong ïa ki nongïalam ban smai ha khmat jong ki ban bat ïa ka kular kaba ki la lah khlei.

¹³ Nangta nga shim ïa ka jaiñ ba nga teh sawdong ïa ka syngkai jong nga bad kynther ïa ka. “Kumne U Blei un kynther ïano ïano na phi u bym bat ïa la ka kular,” nga ong. “U Blei un shim noh ïa ki ïing jong phi bad ïa kiei kiei baroh ba phi don, bad un iehnoh ïa phi khlem don ei ei shuh.” Baroh kiba don hangta ki ong, “Amen!” bad ki ïaroh ïa U Trai. Bad ki nongïalam ki bat ïa ka kular jong ki.

Ka jingbymkhwan myntoi u Nehemaïah

¹⁴ Ha baroh ki khat-ar snem ba nga long u lat jong ka ri Judah, naduh ka snem kaba khat-ar ba u Artakserksis u long u patsha haduh ka snem kaba arphew ar, ki ba-ha-ïing jong nga lymne ma nga, ngi ïabam ïa ka jingbam ba ngi dei ban ïoh kum u lat.

¹⁵ Uwei pa uwei u lat uba don ha ka kam ha shuwa jong nga, u la long ka jingbankhia ïa ki briew bad ki ju dawa sawphew ki pisa rupa shi sngi na ka bynta ka jingbam bad ka waiñ. Wat ki shakri jong ki, ki ju banbeiñ ïa ki briew. Hynrei ngam shym leh kumta, namar nga burom ïa U Blei.

¹⁶ Nga sei ïa ka bor jong nga baroh na ka bynta ka jingtei pat ïa ka kynroh bad ngam shym wad ban ïoh kano kano ka jingdon jingem. Baroh kiba trei na ka bynta jong nga, ki ïasnoh ha ka jingtei pat ïa ka kynroh.

¹⁷ Man ka por, nga ai jingbam ha ka miej jong nga ïa shispah sanphew ngut ki Jiw bad ki nongïalam jong ki, nalor ki briew kiba wan sha nga na ki jaitbynriew kiba don sawdong.

¹⁸ Man ka sngi nga ai uwei u masi, hynriew tylli na ki langbrot babha tam, bad bun tylli ki syiar bad man ka shiphew sngi nga pynbiang ka waiñ thymmai. Hynrei nga tip kiei ki jingkit bakhia ki briew ki hap ban shah, kumta ngam shym la dawa ïa ka baibam kaba u lat u don hok ban ïoh.

¹⁹ Nga duwai ha me, A Blei, to kynmaw ban kyrkhu na ka bynta kaei kaei baroh ba nga la leh na ka bynta kane ka jaitbynriew.